រាជធានីភ្នំពេញ ៖ សមាសភាពគូប្រកួតប្រដាល់មិត្តភាពអន្តរជាតិនៅលើសង្វៀនទូរទស្សន៍ស៊ីអិនស៊ីក្នុងកម្មវិធីកំពូលអ្នកប្រយុទ្ធកណ្ដាប់ដៃដែកនាថ្ងៃអាទិត្យទី២០ សីហា វេលាម៉ោង១១ព្រឹក មានចំនួន២គូ និងគូប្រកួតមិត្តភាពធម្មតាមានចំនួន៣គូ ។
គូអន្តរជាតិទី១ កីឡាករ ឡុង ជិន មកពីក្លិបខ្លារខិនមានឫទ្ធិ ត្រូវជួបប្រកួតជាមួយកីឡាករថៃឈ្មោះកាត់តាន់យូ សីតកាំណាន់លឺ ក្នុងប្រភេទទម្ងន់៥៧គីឡូក្រាម។
កីឡាករថៃរូបនោះមិនធ្លាប់មកប្រកួតនៅលើសង្វៀនស្រុកខ្មែរពីមុនមកទេ ទើបអត់មានអ្នកណាដឹងពីថ្វីដៃប្រកួតរបស់គេថាខ្លាំងប៉ុនណា ។ ប៉ុន្តែបើយោងតាមប្រវត្តិប្រកួត៧០ដង ឈ្នះ៥០ដង ចាញ់១៨ដង ស្មើ២ដង និងផ្ដួលគូប្រកួតឱ្យសន្លប់៨ដងអាចឱ្យគេវាយតម្លៃបានថាកីឡាករថៃរូបនេះមានសមត្ថភាពមិនជាអន់ប៉ុន្មានឡើយ ។
ចំណែកឡុង ជិន ដែលធ្លាប់ប្រកួត៤៣ដង ឈ្នះ៣៤ដង ចាញ់៧ដង ស្មើ៣ដង និងផ្ដួលគូប្រកួតឱ្យសន្លប់១០ដង មិនដឹងថាមានវាសនាយ៉ាងណាទេ ។
គូអន្តរជាតិទី២ កីឡាករ ថុល មករា មកពីក្លិបឃ្លាំងមឿងកីឡា ត្រូវជួបប្រកួតជាមួយកីឡាករថៃឈ្មោះ ហ្វាមីឆៃ ស.រឿងឆៃ ក្នុងប្រភេទទម្ងន់៦៣,៥គីឡូក្រាម ។ កីឡាករថៃរូបនេះក៏មិនធ្លាប់មកប្រកួតនៅលើសង្វៀនស្រុកខ្មែរពីមុនមកដែរ ប៉ុន្តែប្រវត្តិប្រកួតមិនអន់នោះទេ ។ ហ្វាមីឆៃ ស.រឿងឆៃ ធ្លាប់ឡើងសង្វៀនប្រកួត៨០ដង ឈ្នះ៦០ដង ចាញ់១៨ដង ស្មើ២ដង និងធ្លាប់ផ្ដួលគូប្រកួតឱ្យសន្លប់១២ដង ក្នុងពេលថុល មករា ធ្លាប់ប្រកួត៥៩ដង ឈ្នះ៣៩ដង ចាញ់១៩ដង ស្មើ១ដង និងផ្ដួលគូប្រកួតឱ្យសន្លប់១៦ដង ។ យោងតាមប្រវត្តិប្រកួតថុល មករា ហាក់ចាញ់ប្រៀបគូប្រកួតទើបគេពិបាកប៉ាន់ស្មានពីលទ្ធផលចុងក្រោយ ដូច្នេះមានតែរង់ចាំមើលការប្រកួតជាក់ស្ដែងនៅលើ
សង្វៀនប៉ុណ្ណោះ។
រីឯគូប្រកួតមិត្តភាពធម្មតាវិញកីឡាករ ចេង គា មកពីក្លិបសាលវ័ន្តកីឡា ប្រកួតជាមួយកីឡាករ ទេស ជីវ៉ា មកពីក្លិបកងពលតូចលេខ៧០ ។ កីឡាករ សៅ ប៊ុនធឿន មកពីក្លិបតាព្រហ្មមានជ័យ ប្រកួតជាមួយកីឡាករ ឫទ្ធិ ប្រាក់ប៊ិន មកពីក្លិបកងពលតូចលេខ៧០ និងកីឡាករ ឡុង ចំរើន មកពីក្លិបខ្លារខិនមានឫទ្ធិ ប្រកួតជាមួយកីឡាករ សៀន វិបុល មកពីក្លិបរាជសីហ៍ខេត្តរតនគីរី ។
នៅលើសង្វៀននិងថ្ងៃដដែលវេលាម៉ោង២រសៀលក៏មានការប្រកួតប្រដាល់លក្ខណៈមិត្តភាពរវាងកីឡាករកម្ពុជានិងកម្ពុជាចំនួន៦គូជូនទស្សនិកជនដែលនិយមទស្សនាកីឡាប្រដាល់កម្សាន្តនាថ្ងៃសម្រាកចុងសប្ដាហ៍ ។
កីឡាករដែលត្រូវមានមុខប្រកួតនៅថ្ងៃអាទិត្យនោះមានកីឡាករ អេអាំម៉ារីន ភូថង មកពីក្លិបអេភូថងកីឡា ប្រកួតជាមួយកីឡាករ សុខុន រីហ្គេន មកពីក្លិបកុមារទេព ។ កីឡាករ លីន វណ្ណៈ មកពីក្លិបបុរីរាជសីហ៍ ប្រកួតជាមួយកីឡាករ អេ សារិន មកពីក្លិបអេភូថងកីឡា ។
កីឡាករ សៅ វណ្ណា មកពីក្លិបសុភានូមានជ័យ ប្រកួតជាមួយកីឡាករ សំខាន់ ប៉ាវចិន មកពីក្លិបរ៉ាហាប់ស្វាយប៉ាក ។ កីឡាករ សេង កំសត់ មកពីក្លិបគីសែមានឫទ្ធិ ប្រកួតជាមួយកីឡាករ លី តឿន មកពីក្លិបមកុដរាជសីហ៍ ។ កីឡាករ ចាន់ សំអាត មកពីក្លិបអប់រំកាយស្រុកអន្លង់វែង ប្រកួតជាមួយកីឡាករ ថា សារុន មកពីក្លិបបន្លឺណេអង់ និងគូចុងក្រោយកីឡាករ ម៉ាត់ ពន្លក មកពីក្លិបមរតកគុនខ្មែរ ប្រកួតជាមួយកីឡាករ សំអាត សុភាព មកពីក្លិបកុលបុត្រគុនខ្មែរ ៕
ចែករំលែកព័តមាននេះ