រាជធានីភ្នំពេញ ៖ បុរសម្នាក់ដែលសង្ស័យស្រវឹងស្រានិងជាខ្មាន់កាំភ្លើង បានត្រូវសមត្ថកិច្ចចាប់ដាក់ខ្នោះ បន្ទាប់ពីប្រើកាំភ្លើងខ្លីបាញ់ទៅលើអ្នកបើកបររថយន្តក្រុងអស់ជាច្រើនគ្រាប់ធ្វើឱ្យមានការភ្ញាក់ផ្អើល កាលពីវេលាម៉ោង៨និង៤០នាទីយប់ថ្ងៃទី១៦ ខែសីហា នៅតាមផ្លូវលេខ៥៩៨ មុខឃ្លាំងបញ្ចាំ លី ហួរ ស្ថិតក្នុងសង្កាត់ទួលសង្កែ ខណ្ឌឫស្សីកែវ ។
អ្នកបើកបររថយន្តក្រុងដឹកអ្នកដំណើរដែលរងនូវការបាញ់ស្រោចមកលើរថយន្ត តែសំណាងល្អមិនមានរងរបួសនោះឈ្មោះ ឈឹម គឹមទ្រី ភេទប្រុស អាយុ២៩ឆ្នាំ ជាអ្នកបើកបររថយន្តក្រុងដឹកអ្នកដំណើរឱ្យក្រុមហ៊ុនបូព៌៌ាអាស៊ី ស្នាក់នៅក្នុងសង្កាត់បឹងសាឡាង ខណ្ឌទួលគោក ។
ប្រភពព័ត៌មានពីអ្នកបើកបររថយន្តក្រុងនោះបានឱ្យដឹងថា មុនពេលកើតហេតុគាត់បើករថយន្តក្រុងម៉ាកហ៊ីយ៉ាន់ដាយ ពណ៌ផ្កាឈូកលាយសពាក់ផ្លាកលេខ ភ្នំពេញ ៣D-៤៩០៣ ជិះគ្នា២នាក់ ជាមួយព្រូ មិនមានដឹកអ្នកដំណើរទេ គឺបើកមកពីរង្វង់មូលកាំកូស៊ីធីក្នុងទិសដៅពីត្បូងទៅជើង ។ ខណៈនោះ ស្រាប់តែមានរថយន្តមួយគ្រឿងម៉ាកតូយ៉ូតាព្រូស ពណ៌ស ពាក់ផ្លាកលេខ ភ្នំពេញ ២AP-១៩៣៦ បើកមកតាមក្រោយនិងព្យាយាមជែងទៅមុន តែរូបគាត់មិនព្រមឲ្យជែងទេ ដោយសារមានរ៉ឺម៉កម៉ូតូមួយគ្រឿងបើកនៅខាងមុខ ។
អ្នកបើកបររថយន្តក្រុងរូបនេះបន្តថា ដោយសារការមិនទាន់ឱ្យជែងនោះ ធ្វើឱ្យអ្នកបើកបររថយន្តព្រូសខឹងសម្បា និងដកកាំភ្លើងខ្លីម៉ាកអ៊ែរស្តាល់បាញ់រថយន្តក្រោយចំនួន៧គ្រាប់ និងបាញ់មួយគ្រាប់ទៀតធ្វើឲ្យបែកកញ្ចក់ចំហៀងមួយផ្ទាំង ។ ពេលនោះរូបគាត់ភ័យស្លន់ស្លោយ៉ាងខ្លាំង ហើយខណៈរថយន្តព្រូសបម្រុងជែងរថយន្តគាត់ ប៉ុន្តែគាត់មិនព្រមឱ្យជែងនិងបានកៀបបណ្តាលឱ្យរថយន្តព្រូសខ្ទេចមួយកំណាត់ខាងមុខធ្លាក់កាង ។
អ្នកបើកបររថយន្តក្រុងរូបនេះរៀបរាប់ទៀតថា បន្ទាប់មកគាត់ក៏បើករថយន្តចូលទៅក្នុងចំណតរបស់ក្រុមហ៊ុនបញ្ចាំលីហួរ នៅសង្កាត់ទួលសង្កែ ខណ្ឌឫស្សីកែវ ហើយត្រូវរថយន្តខាងលើដេញតាមក្រោយកៀកជាប់នឹងរថយន្តគាត់ទៀត ទើបបង្កឱ្យមានការភ្ញាក់ផ្អើលដល់នគរ បាលខណ្ឌសែនសុខ និងខណ្ឌឫស្សីកែវ ចុះមកអន្តរាគមន៍ភ្លាមៗ ។ នៅក្នុងការពិនិត្យមើលគឺរថយន្តគាត់ត្រូវបាញ់ចំគូទក្រោយធ្លាយចំនួន៧គ្រាប់ និងបែកកញ្ចក់ខាងស្តាំដោយសារបាញ់ត្រូវមួយគ្រាប់ តែសំណាងល្អដែលអត់មានភ្ញៀវជិះនៅក្នុងរថយន្ត កុំអីអាចមានអ្នករងរបួសមិនខានឡើយ ។
ក្រោយពេលកើតហេតុ សមត្ថកិច្ចបានស្រាវស្រាវរកឃើញសម្បកគ្រាប់ចំនួន៣ និងធ្វើការដកហូតកាំភ្លើងខ្លីពីខ្មាន់កាំភ្លើងរូបនោះ រួចដាក់ខ្នោះនាំយកទៅស្នងការដ្ឋាននគរបាលរាជធានីភ្នំពេញ ដើម្បសាកីសួរជាបន្ត ។បើតាមភាគីរថយន្តព្រូសនិយាយថា មិនមែនសុខៗគាត់ដកកាំភ្លើងយកទៅបាញ់គេនោះទេ គឺមកពីរថយន្តក្រុងបើកកៀបរថយន្តគាត់ហើយអត់ឈប់ ទើបគាត់ខឹងក៏ដេញតាមហើយបាញ់តែម្តង ។ ខ្មាន់កាំភ្លើងមិនទាន់ស្គាល់អត្តសញ្ញាណរូបនេះ និយាយទៀតថា បើសិនជាអ្នកធម្មតាវិញបើកបុកឬកៀបគេហើយរត់បាត់ហើយ ។
ជុំវិញហេតុការណ៍នេះ អ្នកបើកបររថយន្តក្រុងបានទៅដាក់ពាក្យបណ្តឹងនៅស្នងការដ្ឋាននគរបាលធានីភ្នំពេញ ដើម្បីឱ្យសមត្ថកិច្ចចាត់ការទៅតាមនីតិវិធី ។តាមប្រភពព័ត៌មានឱ្យដឹងថា ខ្មាន់កាំភ្លើងរូបនេះឈ្មោះ អេង កុសល អាយុ៣៧ឆ្នាំ មានទីលំនៅផ្ទះលេខD២៤ ផ្លូវលេខ២ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ៕
ចែករំលែកព័តមាននេះ