រថយន្តពន្លះម៉ូតូមួយគ្រឿង អ្នកបើកបររថយន្តរត់បាត់
ខេត្តកំពត ៖ ប្តីប្រពន្ធ២នាក់រងរបួសធ្ងន់ស្រាល ដោយជួបហេតុការណ៍គ្រោះថ្នាក់ចរាចរមួយ បានកើតឡើងកាលពីវេលា ម៉ោង០៣និង៣០នាទីទាបភ្លឺ ថ្ងៃទី១៨ ខែសីហា ឆ្នាំ២០១៧
ខេត្តកំពត ៖ ប្តីប្រពន្ធ២នាក់រងរបួសធ្ងន់ស្រាល ដោយជួបហេតុការណ៍គ្រោះថ្នាក់ចរាចរមួយ បានកើតឡើងកាលពីវេលា ម៉ោង០៣និង៣០នាទីទាបភ្លឺ ថ្ងៃទី១៨ ខែសីហា ឆ្នាំ២០១៧ នៅផ្លូវជាតិលេខ៣ កំពត-ភ្នំពេញ ស្ថិតក្នុងភូមិបឹងតារោង ឃុំព្រៃឃ្មុំ ស្រុកទឹកឈូ ត្រង់ចំណុចចន្លោះបង្គោលគីឡូម៉ែត្រលេខ១ ៤៤-១៤៥ ។
បង្កឡើងដោយរថយន្តម៉ាកសាំយ៉ុង ពណ៌សម្បកឪឡឹកមួយគ្រឿង ពាក់ផ្លាកលេខ ភ្នំពេញ ២AE-៩១០៥ បើកបរក្នុងទិសដៅពីជើងទៅត្បូង លុះដល់កន្លែងកើតហេតុ ក៏ស្រាប់បុកម៉ូតូពីក្រោយពេញទំហឹងក្នុងទិសដៅស្របគ្នា ។ នគរបាលចរាចរណ៍ខេត្តបានឲ្យដឹងថា ៖ អ្នកបើកបរម៉ូតូមានឈ្មោះ ចាន់ ភណ្ឌ័ ភេទប្រុស អាយុ៣២ឆ្នាំ មានទីលំនៅភូមិព្រៃឃ្មុំ ឃុំព្រៃឃ្មុំ ស្រុកទឹកឈូ បានរងរបួសស្រាល អ្នករួមដំណើរឈ្មោះ ភិន ស្រីមុំ ភេទស្រី អាយុ៣០ឆ្នាំ ជាប្រពន្ធបានរងរបួសធ្ងន់ ម៉ូតូម៉ាកសេ១២៥ ពណ៌ខ្មៅ គ្មានផ្លាកលេខ ។
ប្រភពដែលបានឲ្យដឹងថា ៖ រថយន្ត និងម៉ូតូខូចខាត ស្រាល ប៉ុន្តែអ្នកបើកបររថយន្តក្រោយពេលកើតហេតុបានរត់គេចខ្លួនបាត់ បន្សល់ទុករថយន្តនៅកន្លែងកើតហេតុ ត្រូវបានកម្លាំងសមត្ថកិច្ចនាំមករក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្ត រង់ចាំដោះស្រាយតាមផ្លូវច្បាប់នៅពេលក្រោយ ។ ចំណែកជនរងគ្រោះពីរនាក់ប្តីប្រពន្ធ ត្រូវបានសមត្ថកិច្ចចរាចរណ៍ដឹកទៅសង្គ្រោះនៅមន្ទីរពេទ្យបង្អែកខេត្តកំពត ៕
ចែករំលែកព័តមាននេះ