រាជធានីភ្នំពេញ ៖ សេចក្តីរាយការណ៍បន្តថា ក្រោយការឃាត់ខ្លួនសាកសួររយៈពេល២ថ្ងៃ គិតនៅព្រឹកថ្ងៃទី១៨ សីហា នេះ សមត្ថកិច្ច បានបញ្ចប់ការសាកសួរទៅលើជនជាតិចិនចំនួន២៣១នាក់នោះហើយ ដែលធ្វើឡើងនៅក្នុងអគារខុនដូ ដែលកម្លាំងបានឃាត់ខ្លួនពួកគេជាក់ស្តែង ស្ថិតលើផ្លូវ៥៧៨ សង្កាត់បឹងកក់២ ខណ្ឌទួលគោក រាជធានីភ្នំពេញ ក្រោយសង្ស័យថា ពួកគេទាំងនោះមានជាប់ពាក់ព័ន្ធករណីចាប់ជម្រិតតាមប្រព័ន្ធអ៊ីនធើរណេត ។
សេចក្តីរាយការណ៍បន្តថា ក្រោយការសាកសួរពីកម្លាំងសមត្ថកិច្ចយើងរួចមក នៅមិនទាន់ដឹងថា តើត្រូវបញ្ជូនពួកគេទៅកាន់ខាងណានោះទេ ខណៈកំពុងកម្លាំងកំពុងរង់ចាំដំណឹងពីសម្តេច ស ខេង ។ ក៏ប៉ុន្តែអាចនឹងបញ្ជូនទៅកាន់អគ្គនាយកដ្ឋានអន្តោប្រវេសន៍ ដើម្បីធ្វើការបន្ត ។
បើតាមព័ត៌មានចុងក្រោយបង្ហើបថា ជនជាតិចិនប្រុស-ស្រីទាំង២៣១នាក់ខាងលើ គឺមិនមានជាប់ករណីចាប់ជម្រិតនោះទេ ប៉ុន្តែពួកគេទាំងនេះ គឺបានប្រព្រឹត្តលេងល្បែងស៊ីសងតាមប្រព័ន្ធអ៊ីនធើរណេតយ៉ាងជាក់ស្តែង នៅក្នុងអគារខុនដូខាងលើនោះ ។
គួររំលឹកថា កាលពីវេលាម៉ោង៣រសៀលថ្ងៃទី១៦ សីហា មានការចុះបង្ក្រាបទៅលើក្រុមជនជាតិចិនចំនួន២៣១នាក់ (ស្រី២៨នាក់) ពាក់ព័ន្ធករណីសង្ស័យចាប់ជម្រិតតាមប្រព័ន្ធអ៊ីនធើរណេត ធ្វើឡើងនៅចំណុចអគារខុនដូមួយកន្លែង ស្ថិតលើផ្លូវ៥៧៨ សង្កាត់បឹងកក់២ ខណ្ឌទួលគោក រាជធានីភ្នំពេញ ។
ប្រតិបត្តិការនេះ ក្រោមការដឹកនាំដោយលោកសៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងលោកឧត្តមសេនីយ៍ឯកអ៊ី សុខឃី ប្រធាននាយដ្ឋានប្រឆាំងភេវរកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ។
ចែករំលែកព័តមាននេះ