កាសែតចិនព្រមានលោកត្រាំពីហានិភ័យ
កាសែតរដ្ឋរបស់ចិនបានព្រមានកាលពីថ្ងៃចន្ទថា លោកប្រធានាធិបតី ដូណាល់ ត្រាំ (Donald Trump) អាចនឹងបង្កឲ្យមានសង្គ្រាមពាណិជ្ជកម្ម ប្រសិនបើលោកចាប់ផ្តើមបន្តផែនការស៊ើបអង្កេតថា
ទីក្រុងប៉េកាំង ៖ កាសែតរដ្ឋរបស់ចិនបានព្រមានកាលពីថ្ងៃចន្ទថា លោកប្រធានាធិបតី ដូណាល់ ត្រាំ (Donald Trump) អាចនឹងបង្កឲ្យមានសង្គ្រាមពាណិជ្ជកម្ម ប្រសិនបើលោកចាប់ផ្តើមបន្តផែនការស៊ើបអង្កេតថា ប្រទេសចិនកំពុងតែលួចបច្ចេកវិទ្យារបស់សហរដ្ឋអាមេរិកឬទេ ។
អ្នកស្រាវជ្រាវម្នាក់ក្នុងក្រុមប្រឹក្សាក្រសួងពាណិជ្ជកម្មបានសរសេរក្នុងកាសែត China Daily ថា ប្រសិនបើលោកត្រាំ សម្រេចថា ចាប់ផ្តើមការស៊ើបអង្កេតនោះ អាចនឹងបង្កឲ្យមានភាពតានតឹងកាន់តែខ្លាំងឡើង ជាពិសេស ទាក់ទិននឹងកម្មសិទ្ធិបញ្ញា ។
មន្ត្រីខាងលើបានប្រាប់អ្នកកាសែតកាលពីថ្ងៃសៅរ៍ថា លោកត្រាំ នឹងបញ្ជាឲ្យចាប់ផ្តើមការស៊ើបអង្កេតនៅក្រោមច្បាប់ពាណិជ្ជកម្មឆ្នាំ១៩៧៤ ទាក់ទិននឹងប្រទេសចិនលួចបច្ចេកវិទ្យារបស់សហរដ្ឋអាមេរិក និងបញ្ហាកម្មសិទ្ធិបញ្ញា ។
អ្នកសរសេរអត្ថបទឈ្មោះ Mei Xinyu ជាអ្នកស្រាវជ្រាវក្នុងវិទ្យាស្ថានកិច្ចសហប្រតិបត្តិការពាណិជ្ជកម្ម និងសេដ្ឋកិច្ចអន្តរជាតិរបស់ក្រសួងខាងលើ និយាយថា ការសម្រេចចិត្តប្រើប្រាស់ច្បាប់ពាណិជ្ជកម្មដើម្បីធ្វើឲ្យការធ្វើពាណិជ្ជកម្មជាមួយចិនមានសមភាពនោះ អាចនឹងបង្កឲ្យមានសង្គ្រាមពាណិជ្ជកម្ម ។
អ្នកសរសេររូបនេះមិនបានផ្តល់ព័ត៌មានលម្អិតទាក់ទិននឹងការឆ្លើយតបរបស់ចិនទេ ប៉ុន្តែច្បាប់របស់ប្រទេសនេះផ្តល់ឆន្ទានុសិទ្ធិដល់និយ័តករសម្រេចថា ក្រុមហ៊ុនបរទេសអាចធ្វើអ្វីបានខ្លះក្នុងប្រទេសចិន ។
ប្រសិនបើចាប់ផ្តើមការស៊ើបអង្កេតនោះ សហរដ្ឋអាមេរិកអាចនឹងស្នើឲ្យមានការដោះស្រាយ តាមរយៈអង្គការពាណិជ្ជកម្មពិភពលោក ឬវិធីផ្សេងទៀត ។
កាសែតខាងលើនិយាយថា សកម្មភាពរបស់សហរដ្ឋអាមេរិកដែលធ្លាប់បានបញ្ចេញមកលើប្រទេសចិននៅក្រោមច្បាប់ឆ្នាំ១៩៧៤ មិនបានបង្កផលប៉ះពាល់ខ្លាំងដល់ចិនទេ ។ ពួកគេកត់សម្គាល់ថា ប្រទេសចិនបានលូតលាស់ក្លាយជាអ្នកនាំចេញធំជាងគេ និងមានរូបិយប័ណ្ណបរទេសច្រើនជាងគេក្នុងពិភពលោក ៕
ចែករំលែកព័តមាននេះ