WB ៖ កម្ពុជាត្រូវពង្រឹងសមត្ថភាព និងធនធានបន្ថែម
រាជធានីភ្នំពេញ ៖ កម្ពុជាអាចរក្សាកំណត់ត្រាដ៏រឹងមាំរបស់ខ្លួនលើគន្លងនៃកំណើនសេដ្ឋកិច្ច ការកាត់បន្ថយភាពក្រីក្រ និងទទួលបានកំណើនប្រកបដោយបរិយាប័ន្ន ដោយផ្តោតលើវិស័យអាទិភាព
រាជធានីភ្នំពេញ ៖ កម្ពុជាអាចរក្សាកំណត់ត្រាដ៏រឹងមាំរបស់ខ្លួនលើគន្លងនៃកំណើនសេដ្ឋកិច្ច ការកាត់បន្ថយភាពក្រីក្រ និងទទួលបានកំណើនប្រកបដោយបរិយាប័ន្ន ដោយផ្តោតលើវិស័យអាទិភាព
រាជធានីភ្នំពេញ ៖ កម្ពុជាអាចរក្សាកំណត់ត្រាដ៏រឹងមាំរបស់ខ្លួនលើគន្លងនៃកំណើនសេដ្ឋកិច្ច ការកាត់បន្ថយភាពក្រីក្រ និងទទួលបានកំណើនប្រកបដោយបរិយាប័ន្ន ដោយផ្តោតលើវិស័យអាទិភាពគន្លឹះមួយចំនួន ។ ទោះបីយ៉ាងណា កម្ពុជាត្រូវការពង្រឹងទាំងសមត្ថភាព និងធនធានបន្ថែមទៀត ដើម្បីឱ្យកំណើននេះមានស្ថិរភាពនាពេលអនាគតយូរអង្វែង ។ នេះបើយោងតាមរបាយការណ៍ថ្មីចុងក្រោយរបស់ធនាគារពិភពលោក ហៅកាត់ថា (WB) ។
របាយការណ៍មានចំណងជើងថា ការវិនិច្ឆ័យស្ថានភាពប្រទេសមានលក្ខណៈជាប្រព័ន្ធ គឺធ្វើឡើងដើម្បីកំណត់ការប្រឈមនានា និងឱកាសជាគន្លឹះសំខាន់សម្រាប់ស្ថិរភាពកំណើន និងការកាត់បន្ថយភាពក្រីក្រនៅកម្ពុជា ។ តាមរបាយការណ៍របស់ធនាគារពិភពលោក ឱ្យដឹងដែរថា ដោយសារតែកម្ពុជាបានរំកិលខ្លួនឡើងជាប្រទេសមានប្រាក់ចំណូលមធ្យមកម្រិតទាប កម្ពុជានឹងជួបនូវការធ្លាក់ចុះនៃការអនុគ្រោះផ្នែកជំនួញ និងហិរញ្ញប្បទានពីម្ចាស់ជំនួយ ។ តម្លៃទាបនៃផលិតផលកសិកម្ម ជាមួយការកើនឡើងនៃប្រាក់ខែ វានឹងតម្រូវឱ្យមានការបង្កើនផលិតភាពផលិត និងតម្លៃបន្ថែមដើម្បីបន្តការប្រកួតប្រជែង ។
របាយការណ៍ការវិនិច្ឆ័យស្ថានភាពប្រទេសមានលក្ខណៈជាប្រព័ន្ធលើកទី១សម្រាប់កម្ពុជានេះ បានលើកឡើងនូវវិស័យអាទិភាពចំនួន៣ សម្រាប់រក្សាកំណើនរឹងមាំនៃសេដ្ឋកិច្ចកម្ពុជា ក្នុងនោះកម្ពុជាត្រូវការបង្កើនភាពប្រកួតប្រជែង និងពិពិធកម្មផ្នែកសេដ្ឋកិច្ច ដើម្បីធានាបាននូវកំណើនខ្ពស់ ការបង្កើតការងារ និងការងារប្រសើរជាងមុន ដោយកាត់បន្ថយចំណាយនៃការបង្កើតនិងដំណើរការអាជីវកម្ម ព្រមទាំងជំរុញការវិនិយោគសាធារណៈ និងឯកសារ ។ កម្ពុជាក៏ត្រូវការផងដែរនូវការកសាងធនធានមនុស្ស ដោយវិនិយោគលើការអភិវឌ្ឍដំបូងនៃកុមារ ជំរុញគុណភាពនៅកម្រិតមធ្យមសិក្សា ឧត្តមសិក្សា និងការគាំពារគ្រួសារនៅពេលជួបវិបត្តិ។ ចំណុចសំខាន់មួយទៀតសម្រាប់ជំរុញកំណើនសេដ្ឋកិច្ចកម្ពុជានាពេលអនាគត គឺត្រូវរក្សា និងអភិវឌ្ឍន៍ធនធានធម្មជាតិ ដោយវិនិយោគលើធនធានធម្មជាតិនៅកម្ពុជា និងលើកកម្ពស់ស្ថិរភាពនិងបរិយាប័ន្ននៃទីក្រុងនានា រួមទាំងពង្រឹងភាពធន់នឹងបម្រែបម្រួលអាកាសធាតុ ។
នៅក្នុងសន្និសីទសារព័ត៌មានមួយកាលពីព្រឹកថ្ងៃទី១៧ សីហា នៅសណ្ឋាគារឡឺរ៉ូយ៉ាល់ លោក Miguel Eduardo Sanchez សេដ្ឋវិទូជាន់ខ្ពស់ប្រចាំប្រទេសនៃធនាគារពិភពលោក បានឱ្យដឹងដែរថា តាមរយៈរបាយការណ៍ចេញផ្សាយនេះឃើញថា កម្ពុជាបានផ្លាស់ប្តូរពីប្រទេសមានប្រាក់ចំណូលទាប ទៅជាប្រទេសមានប្រាក់ចំណូលមធ្យមកម្រិតទាប ។ ដូចនេះ កម្ពុជាមិនអាចពឹងផ្អែកទៅលើលំហូរជំនួយពីបរទេសទៀតទេ កម្ពុជាត្រូវការជំនួយទាំងនោះមកកសាងសមត្ថភាពជំនួសវិញ តាមរយៈកិច្ចសហការជាមួយវិស័យឯកជន និងសាធារណៈ គឺធ្វើយ៉ាងណា ដើម្បីកាត់បន្ថយភាពក្រីក្ររបស់ប្រជាពលរដ្ឋកម្ពុជា ។
លោកបន្តថា ថ្វីដ្បិតតែប្រជាពលរដ្ឋកម្ពុជានៅពេលបច្ចុប្បន្ន មិនមានភាពក្រីក្រច្រើនក្តី ប៉ុន្តែពួកគាត់ទាំងនោះនៅតែប្រឈមខ្ពស់នឹងភាពក្រីក្រ បើសិនជាគ្មានគោលការណ៍ច្បាស់លាស់ណាមួយសម្រាប់ពួកគាត់ ។ លោកថា ៖« យើងត្រូវការពារប្រជាពលរដ្ឋដែលធ្លាប់ក្រីក្រពីមុន មិនឱ្យត្រឡប់ទៅរកភាពក្រីក្រវិញ ពីព្រោះពេលនេះ ពួកគាត់កំពុងតែស្ថិតនៅក្នុងដំណាក់កាលងាយរងគ្រោះ បើសិនជាយើងទាំងអស់គ្នាបណ្ដែតបណ្ដោយមិនអើពើនឹងពួកគាត់ » ។
លោក ហែម វណ្ណឌី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ឱ្យដឹងថា កម្ពុជា បានខិតខំបំពេញការងារយ៉ាងសកម្មដើម្បីជួយប្រជាពលរដ្ឋឲ្យចាកចេញពីភាពក្រីក្រ ហើយរាជរដ្ឋាភិបាលបានប្ដេជ្ញាបន្តធ្វើឱ្យមានកំណើនប្រកបដោយបរិយាប័ន្ននៅទូទាំងប្រទេស ។ លោកថា ៖« យើងនៅតែបន្តប្ដេជ្ញាបើកទូលាយក្នុងវិស័យជំនួញនិងវិនិយោគ ហើយយើងបន្តគាំទ្រដល់សហគមន៍អន្តរជាតិ ដែលបានជឿជាក់មកលើការរីកចម្រើននៅក្នុងប្រទេសកម្ពុជា » ។
លោកស្រី អ៊ូហ្គាណា ដូប្រាចា នាយិកាគ្រប់គ្រងធនាគារពិភពលោក ប្រចាំកម្ពុជា មានប្រសាសន៍ថា ជាង២ទសវត្សរ៍កន្លងមកនេះ ការសម្រេចបានរបស់កម្ពុជា ក្នុងកំណើនសេដ្ឋកិច្ច និងភាពប្រសើរឡើងនៃការរស់នៅរបស់ប្រជាពលរដ្ឋ គឺបានរីកចម្រើនគួរឱ្យកត់សម្គាល់ ។ ការប្រឈមនានានឹងកើតមាននាពេលខាងមុខ ដោយសារកម្ពុជាមានបំណងប្រាថ្នាចង់បានការប្រកួតប្រជែងសេដ្ឋកិច្ចខ្លាំងជាងមុន, ការបង្កើនផលិតភាពផលិត, ការកសាងស្ថាប័នរឹងមាំនិងមានប្រសិទ្ធភាព ព្រមទាំងការពង្រីកឱកាសសម្រាប់ពលរដ្ឋកម្ពុជាគ្រប់រូប ។
លោកស្រីថា ៖«ធនាគារពិភពលោក នឹងបន្តគាំទ្រកិច្ចខិតខំប្រឹងប្រែងរបស់កម្ពុជា ក្នុងការរក្សាកំណើនសេដ្ឋកិច្ចប្រកបដោយបរិយាប័ន្ន និងកាត់បន្ថយភាពក្រីក្រ » ៕
ចែករំលែកព័តមាននេះ