ខេត្តស្វាយរៀង ៖ លោកយាយវ័យ៦២ឆ្នាំម្នាក់ មានជម្ងឺប្រចាំកាយ ដេកដួលនៅលើកន្ទេលក្នុងខ្ទមស្រេកឃ្លានអាហារ សូមអំពាវនាវរកសប្បុរសជន ដែលមានចិត្តធម៌មេត្តាផ្តល់ស្បៀងអាហារ បរិភោគនូវជីវិតចុងក្រោយ| មុននឹងលាចាកលោកនេះទៅ ។
លោកយាយជាក្រមុំចាស់ មានជីវភាពក្រក្រី និងរស់នៅតែម្នាក់ឯងគ្មានសាច់ញាតិ ឬកូនចៅ កន្លងមកលោកយាយរស់នៅប្រកបមុខរបរដើរស៊ីឈ្នួលធ្វើការឲ្យគេ និងស្ទូងដកធ្វើស្រែចំការដើម្បីបានលុយបន្តិចបន្តួចយកមកចិញ្ជឹមជីវិតដ៏កំសត់មួយនេះ ។
បើតាមប្រជាពលរដ្ឋជាអ្នកជិតខាងរបស់លោកយាយ បានប្រាប់អ្នកសាព័ត៌ឲ្យដឹងថា ៖ លោកយាយមានឈ្មោះ ព្រហ្ម ទ្រី អាយុ៦២ឆ្នាំ រស់នៅភូមិក្តុម្ពីរ ឃុំគោកព្រីង ស្រុកស្វាយជ្រំ ហើយសព្វថ្ងៃនេះធ្លាក់ខ្លួនឈឺ អត់បាយអត់ទឹក អស់រយៈពេលជាងកន្លះខែមកហើយ ម្យ៉ាងវិញទៀតក្នុងខ្ទមកំសត់របស់គាត់ គឺគ្មានអង្ករមួយគ្រាប់នោះទេ ។
ប្រភពខាងលើបានបន្តឲ្យដឹងទៀតថា ៖ សព្វថ្ងៃនេះ បានអ្នកជិតខាង គេមកមើល និងជួយដាំបបរ ទិញទឹកផ្លែឈើ ឲ្យហូបប៉ុណ្ណោះ គឺគ្មានសាច់ញាតិកូនចៅនោះទេ ។ ហើយកាលលោកយាយមិនទាន់ធ្លាក់ខ្លួនឈឺ គឺអាចដើរធ្វើការឲ្យគេគ្រាន់បានលុយមកទិញនុំចំណីម្ហូបអាហារ ដើម្បីចិញ្ជឹមជីវិតដោយខ្លួនឯង តែពេលនេះធ្លាក់ខ្លួន បានអ្នកជិតជួយមើលថែ ដោយអ្នកក្នុងភូមិទាំងអស់ស្រឡាញ់អាណិតអាសូរ ព្រោះគាត់ស្លូតហើយគ្មានគ្រួសារទេ គឺកំព្រាឯកកោរ ហើយកន្លងមក អាជ្ញាធរក៏ធ្លាប់បានឧបត្ថម្ភដល់រូបគាត់ផងដែរ ។
លោកយាយ ព្រហ្ម ទ្រី បានសុំឲ្យអ្នកសារព័ត៌មានជួយផ្សព្វផ្សាយ អំពាវនាវដល់សប្បុរសជនទាំងអស់ ទាំងក្នុងស្រុក និងក្រៅស្រុក មេត្តាជួយឧបត្ថម្ភដល់រូបគាត់ផង ដែលសព្វថ្ងៃធ្លាក់ខ្លួនឈឺ ហើយគ្មានសាច់ញាតិបងប្អូនកូនចៅអ្វីនោះឡើយ និងគ្មានលុយទិញថ្នាំព្យាបាលខ្លួននោះទេ ដេកដួលនៅក្នុងខ្ទមម្នាក់ឯងគ្មានប្រាក់ ដើម្បីឲ្យអ្នកជិតខាងយកលោកយាយទៅមន្ទីរពេទ្យ ដើម្បីព្យាបាលទេដូច្នេះ សូមអំពាវនាវដល់សប្បុរសជនមេត្តា ជួយឧបត្ថម្ភគ្រឿងឧបភោគបរិភោគដល់លោកយាយ នូវជីវិតចុងក្រោយដោយក្តីអាណិតអាសូរ ៕
ចែករំលែកព័តមាននេះ