រាជធានីភ្នំពេញ ៖ សេចក្តីរាយការណ៍បន្តថា ករណីប្រទះឃើញសាកសពបុរសម្នាក់អណ្តែតទឹកនោះ គិតនៅត្រឹមម៉ោងជាង២រសៀលថ្ងៃទី១៧ សីហា ដដែលនេះ ត្រូវបានស្គាល់អត្តសញ្ញាណសាកសពហើយ បន្ទាប់ពីមានក្រុមគ្រួសារសាច់ញាតិ បានមកពិនិត្យនិងទាក់ទងមកប៉ុស្តិ៍នគរបាលជ្រោយចង្វាររួចមក ។
សេចក្តីរាយការណ៍បន្តថា សាកសពមានឈ្មោះតាំង អ៊ី ហៅកាំង អាយុ៣២ឆ្នាំ ជាកម្មករសំណង់ មានទីលំនៅជិតផ្សារដេប៉ូក្នុងខណ្ឌទួលគោក រាជធានីភ្នំពេញ ។
បើតាមការរៀបរាប់ពីសាច់ញាតិថា កាលពីវេលាម៉ោង០៨ និង៣០នាទីយប់ថ្ងៃទី១៥ សីហា កន្លងមក ជនរងគ្រោះបានឈ្លោះជាមួយស្ត្រីជាប្រពន្ធក្រោយ រឿងសុំលុយ៥ម៉ឺនរៀលមិនបាន ព្រោះជននេះយកទៅលេងល្បែង ទើបប្រពន្ធមិនព្រមឱ្យ ក៏ស្រាប់តែកើតមានទំនាស់គ្នាយ៉ាងខ្លាំង ហើយជននេះបានដើរចេញពីផ្ទះទាំងយប់ មកកាន់ស្ពានជ្រោយចង្វារលោតទឹកសម្លាប់ខ្លួន។ លុះនៅព្រឹកថ្ងៃទី១៧ សីហា នេះ សាកសពក៏បានអណ្តែតឡើងបង្កភ្ញាក់ផ្អើលតែម្តង ។
គួររំលឹកថា នៅវេលាព្រឹកម៉ោង៨ថ្ងៃទី១៧ សីហា មានការឆោឡោមួយបានកើតឡើង ក្រោយពីប្រទះឃើញសពបុរសម្នាក់អណ្តែតទឹកជាប់នឹងដើមត្រែង ហេតុការណ៍នេះ បានកើតឡើងនៅក្នុងភូមិដើម.គ សង្កាត់ព្រែកតាសេក ខណ្ឌច្រោយចង្វារ ។ សាកសពដែលអណ្តែតទើរជាប់នឹងដើមត្រែងនោះ ជាសពមនុស្សប្រុសដែលគេសង្ស័យថា ជាសពរបស់បុរសម្នាក់ដែលលោតទឹកសម្លាប់ខ្លួនកាលពីថ្ងៃទី១៥ សីហា នៅលើស្ពានច្រោយចង្វារ ។
ក្រោយពីមានការប្រទះឃើញសាកសពខាងលើ សមត្ថកិច្ចក៏បានចុះទៅដល់កន្លែងកើតហេតុ តែមិនទាន់បានស្រង់សពដែលទើរនឹងដើមត្រែងនោះឡើងគោកនៅឡើយទេ ហើយក៏មិនទាន់ស្គាល់អត្តសញ្ញាណរបស់សពនៅឡើយដែរ ដោយសារសភាពសពមានការហើម ។
ចែករំលែកព័តមាននេះ