អភិបាលរាជធានីបញ្ជាឲ្យចាត់វិធានការ ដើម្បីទប់ស្កាត់កុំឲ្យមានការបាក់ដី
រាជធានីភ្នំពេញ ៖ អភិបាល នៃគណៈអភិបាលរាជធានីភ្នំពេញ លោក ឃួង ស្រេង បានបញ្ជាទៅក្រុមហ៊ុន ប៊ូយ៉ុង ឲ្យចាត់វិធានការជាបន្ទាន់ ដើម្បីទប់ស្កាត់
រាជធានីភ្នំពេញ ៖ អភិបាល នៃគណៈអភិបាលរាជធានីភ្នំពេញ លោក ឃួង ស្រេង បានបញ្ជាទៅក្រុមហ៊ុន ប៊ូយ៉ុង ឲ្យចាត់វិធានការជាបន្ទាន់ ដើម្បីទប់ស្កាត់ធ្វើយ៉ាងណា កុំឲ្យមានការបាក់ដីនៅការដ្ឋានសំណង់ ដែលកំពុងជីកនេះបន្តទៀត បើមិនដូច្នេះទេ វានឹងឈានដល់បាក់ផ្លូវសហព័ន្ធរុស្ស៊ី ដែលប៉ះពាល់យ៉ាងធ្ងន់ធ្ងរ ព្រោះជាផ្លូវអន្តរជាតិយ៉ាងសំខាន់តភ្លាប់ពីកំពង់សោមមកភ្នំពេញ ។
ការជំរុញ និងដាក់បញ្ជាជាបន្ទាន់របស់ លោក ឃួង ស្រេង នេះ ធ្វើឡើងកាលពីព្រឹកថ្ងៃទី១៧ ខែសីហា ឆ្នាំ២០១៧ ខណៈពេលលោកដឹកនាំមន្ត្រីជំនាញ់ពាក់ព័ន្ធ ចុះពិនិត្យផ្ទាល់ទីតាំងបាក់ដីនៅផ្លូវសហព័ន្ធរុស្សី របស់ការដ្ឋានក្រុមហ៊ុន ប៊ូយ៉ុង ។
ក្រោយពីពិនិត្យស្ថានភាពជាក់ស្តែង អភិបាលរាជធានីភ្នំពេញ បានជំរុញឲ្យក្រុមហ៊ុន ប៊ូយ៉ុង ត្រូវតែចាត់វិធានការបច្ចេកទេសជាបន្ទាន់ ដើម្បីទប់ស្កាត់ការបាក់ដីឲ្យទាល់តែបាន និងឲ្យក្រុមហ៊ុនធ្វើការងារទាំងយប់ទាំងថ្ងៃ ដើម្បីទប់ដីដែលបាក់នេះឲ្យបាន និងបន្តការបុកស៊ីផាយឲ្យបានរឹងមាំ នៅផ្នែកខាងផ្លូវសហព័ន្ធរុស្ស៊ីតែម្តង ។
លោក ឃួង ស្រេង មានប្រសាសន៍ថា ក្រុមហ៊ុន ប៊ូយ៉ុង ដែលកំពុងសាងសង់ការដ្ឋាននេះ ត្រូវធ្វើយ៉ាងណាទប់ស្កាត់តាមលក្ខណៈបច្ចេកទេស ដើម្បីកុំឲ្យផ្លូវសហព័ន្ធរុស្ស៊ីជួបរងគ្រោះថ្នាក់ដ៏ការមហន្តរាយ ប្រេះបាក់ស្រុតបន្ថែមពីលើនេះទៀត ។ លោកបន្តថា ក្នុងនាមរដ្ឋបាលរាជធានីភ្នំពេញ និងរាជរដ្ឋាភិបាល ពិតជាបាននឹងកំពុងយកចិត្តទុកដាក់ខ្លាំងណាស់ ក្នុងការលើកទឹកចិត្តចំពោះអ្នកវិនិយោគទុនបរទេស ប៉ុន្តែដូចជាករណីខាងលើនេះ ក្រុមហ៊ុនត្រូវតែយកចិត្តទុកដាក់គិតគូរពីគ្រោះថ្នាក់ដល់ប្រជាពលរដ្ឋផង មិនអាចធ្វើឲ្យប៉ះពាល់ដល់ផលប្រយោជន៍សាធារណៈដែលផ្តើមពីការធ្វេសប្រហែសនោះទេ ។
គួរបញ្ជាក់ផងដែរថា ៖ ក្រុមហ៊ុន ប៊ូយ៉ុង ដែលគេស្គាល់ថាជាក្រុមហ៊ុនសំណង់របស់ប្រទេសកូរ៉េ មានទីតាំងនៅតាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ទឹកថ្លា ខណ្ឌសែនសុខ បានចាប់ផ្តើមបើកការដ្ឋានជីកដីធ្វើចំណតជាច្រើនឆ្នាំហើយ ហើយកាលពីល្ថាចថ្ងៃអាទិត្យ ទី១៣ ខែសីហា ឆ្នាំ២០១៧ កន្លងមកនេះ ខណៈមានភ្លៀងធ្លាក់ខ្លាំង ក៏ស្រាប់តែការដ្ឋានមួយនេះបាក់ដី និងរបងការដ្ឋានជាច្រើនម៉ែត្រ ចូលទៅក្នុងការដ្ឋានតែម្តង ហើយនឹងមានការបាក់រហូតដល់ផ្លូវសហព័ន្ធរុស្ស៊ីបន្ថែមទៀត ទើបអាជ្ញាធរមានវិធានការបែបនេះ ៕
ចែករំលែកព័តមាននេះ