ផ្សារហេងលី ជាកន្លែងតុបតែងម៉ូតូសម្រាប់យុវវ័យ
រាជធានីភ្នំពេញ ៖ បច្ចុប្បន្ន ការលេងស្តាយ៍ម៉ូតូប្លែកៗតាមរយៈការដោះដូរផ្នែកមួយចំនួន បាននិងកំពុងពេញនិយមពីយុវវ័យ ពិសេសគឺយុវជន ។ ដោយសារតែការនិយមចូលចិត្តបែបនេះ បានធ្វើឱ្យ
រាជធានីភ្នំពេញ ៖ បច្ចុប្បន្ន ការលេងស្តាយ៍ម៉ូតូប្លែកៗតាមរយៈការដោះដូរផ្នែកមួយចំនួន បាននិងកំពុងពេញនិយមពីយុវវ័យ ពិសេសគឺយុវជន ។ ដោយសារតែការនិយមចូលចិត្តបែបនេះ បានធ្វើឱ្យការលក់គ្រឿងបន្លាស់ និងសម្ភារកែច្នៃម៉ូតូនៅម្ដុំផ្សារហេងលី ក្លាយជាកន្លែងសម្រាប់តុងតែង និងកំពុងមានការគាំទ្រច្រើន ។
បើតាមអាជីវករលក់គ្រឿងម៉ូតូ អ្នកស្រី ចែ គីម បានឱ្យដឹងថា យុវវ័យភាគច្រើនលេងកាំ និងកង់ស្ព័រ ដោយក្នុង១ថ្ងៃ គាត់អាចលក់បានពី៤ទៅ៥គូ ។ ចំណែកអាជីវករផ្សេងៗដែលលក់សម្ភារតុបតែងច្រើននោះ ក៏លក់ដាច់ច្រើនផងដែរ ដោយសារតែវាផ្តល់ជម្រើសច្រើនសម្រាប់យុវវ័យក្នុងការសម្រេចចិត្ត ។
អ្នកស្រីបន្តថា ៖« សព្វថ្ងៃនេះ យុវវ័យលេងម៉ូតូច្រើន ជាពិសេស អ្នកជិះម៉ូតូហុងដាឌ្រីម។ នៅពេលម៉ូតូចេញស៊េរីថ្មីៗ យុវវ័យតែងតែយកមកតុបតែង ឬដូរកង់ស្ព័រនៅទីនេះ ។ ចំណែកអ្នកជិះម៉ូតូប្រភេទប្រើលេខអូតូ ក៏មកទម្លាក់បូម ឬដូរសម្បក ដើម្បីឱ្យប្លែក និងចាប់អារម្មណ៍នៅពេលចេញទៅណាម្តងៗ » ។
លោក ខៀវ សូត្រសុគីរ៉ា និស្សិត នៅសាកលវិទ្យាល័យភូមិន្ទភ្នំពេញ ដែលកំពុងឲ្យជាងប្ដូរកង់ និងកាំរន្ទះ បានរៀបរាប់ថា មូលហេតុដែលលោកលេងកង់ស្ព័រ ឬកាំរន្ទះនេះ គឺលោកចូលចិត្តនូវអ្វីដែលថ្មី ហើយប្លែក ។ លោកថា ៖« បើយើងដាក់កង់ធម្មតា អ្នកផ្សេងមើលមក ហាក់ដូចមានលក្ខណៈសាមញ្ញ តែបើយើងដាក់កាំរន្ទះ ឬកង់ស្ព័របែបនេះ ពេលជិះម៉ូតូនៅក្នុងចំណោមអ្នកដទៃ គឺមានលក្ខណៈប្លែកពីគេ ហើយម្យ៉ាងទៀត វាជាចំណង់ចំណូលចិត្តរបស់ខ្ញុំ » ។
និស្សិតរូបនេះលើកឡើងថា លោកចូលចិត្តលេងកង់ស្ព័រនេះរយៈពេល៥ឆ្នាំមកហើយ ។ នៅពេលប្ដូរសម្បក ឬកាំ លោកតែងតែមកប្ដូរនៅទីនេះ ព្រោះវាមានជម្រើសច្រើន។ ចំពោះការចំណាយប្ដូរកង់ស្ព័រ១គូនេះ គឺអស់ប្រាក់៧០ដុល្លារ ។
ចំណែកកសិករម្នាក់មកពីខេត្តកំពត ដែលកំពុងប្ដូរបំពង់ស៊ីមាំងប្រែន បាននិយាយថា ការដែលលោកសម្រេចដាក់បំពង់ស៊ីមាំងប្រែននេះ កន្លងមក លោកធ្លាប់ដឹងថា វាជួយធ្វើឱ្យម៉ូតូរត់ធូរ និងស្ទុះជាងការប្រើបំពង់ស៊ីមាំងធម្មតា ។ ដោយសារតែលោកត្រូវការដឹកសម្ភារទៅចម្ការ លោកក៏ប្ដូរស៊ីមាំងប្រភេទនេះ ដើម្បីកុំឲ្យម៉ូតូយ៉ាប់ម៉ាស៊ីន ៕
ចែករំលែកព័តមាននេះ