រាជធានីភ្នំពេញ ៖ សេចក្តីរាយការណ៍បន្តថា ករណីជនជាតិចិន២នាក់ដែលគេដឹងថា ស្រវឹងស្រាជោកហើយបានបើករថយន្តទៅបុករថយន្តឡិចស៊ីសចតស្ងៀមរបស់លោក ឃ្លាំង ហួត អភិបាលខណ្ឌជ្រោយចង្វារនោះ គិតត្រឹមវេលាម៉ោង០១រសៀលថ្ងៃទី១៦ សីហា នេះ គឺបានប្រគល់ទៅឱ្យខាងសមត្ថកិច្ច ដើម្បីចាត់ការតាមផ្លូវច្បាប់ហើយ ។
លោកឃ្លាំង ហួត ក៏បានឱ្យដឹងដែរថា គ្រោះថ្នាក់នេះ ប៉ះចំរថយន្តដែលគាត់ចតស្ងៀមមិនមានមនុស្ស ចុះបើបើកបុកអ្នកដទៃវិញ តើប៉ុន្មានដែលមានគ្រោះថ្នាក់ទៅ ។ ប្រភពបន្តថា ទីបំផុតលោកឃ្លាំង ហួត បាននាំយករថយន្តទៅធ្វើការជួសជុលដោយខ្លួនឯង ។
គួររំលឹកថា ជនជាតិចិន២នាក់ ដែលស្រវឹងជោកជាំបានបើករថយន្ត ទៅបុករថយន្តឡិចស៊ីសចតស្ងៀមរបស់លោក ឃ្លាំង ហួត អភិបាលខណ្ឌជ្រោយចង្វា កាលពីវេលាម៉ោង០៩នាទីយប់ថ្ងៃទី១៥ សីហា ស្ថិតនៅសណ្ឋាគារភ្នំពេញ រាជធានីភ្នំពេញ។
លោកអភិបាលខណ្ឌបានប្រាប់ឱ្យដឹងថា៖ «ចិនស្រវឹងជោកជាំនោះបើករថយន្តឡង់គ្រីស្ស័របុកឡានខ្ញុំនៅចតស្ងៀម ។ ទោះចិនក៏ត្រូវតែគោរពច្បាប់ស្រុកខ្មែរដែរ បើសិនជាមិនបានប៉ះឡានខ្ញុំទេ គេអាចបើកបុកមនុស្សបង្កជាគ្រោះថ្នាក់ ព្រោះពួកគេស្រវឹងខ្លាំងណាស់»។ លោកបានបន្តទៀតថា «រឿងហេតុនេះកើតឡើងវេលាម៉ោង៩យប់ នៅសណ្ឋាគារភ្នំពេញ ចិននោះបានបើកបរដោយភាពស្រវឹងជោកមកបុកឡានខ្ញុំចតនៅស្ងៀមធ្វើឱ្យខូចខាតគូទក្រោយ»។ ហើយជារៀងរាល់ល្ងាចលោកអភិបាលខណ្ឌតែងតែទៅត្រាំទឹកក្ដៅ ស្ទីម នៅសណ្ឋាគារភ្នំពេញជាប្រចាំ គឺរយៈពេល១៦ឆ្នាំហើយ។
លោកបានបញ្ជាក់ប្រាប់កោះសន្តិភាពថា៖ «ចំពោះរឿងរ៉ាវនេះ ខ្ញុំមិនគិតរឿងសំណងជាធំទេ គឺចង់ធ្វើតាមច្បាប់ ព្រោះរាល់ថ្ងៃជនជាតិបរទេសក៏ដូចជាខ្មែរ តែងតែបើកបរក្នុងភាពស្រវឹងបង្កភាពគ្រោះថ្នាក់ដល់អាយុជីវិត និងទ្រព្យសម្បត្តិជាច្រើន»។ ជនជាតិចិនទាំងពីររូបនោះ ក៏ត្រូវបានសមត្ថកិច្ចជំនាញនាំខ្លួន និងរថយន្ដទៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញផងដែរ ៕
ចែករំលែកព័តមាននេះ