ខេត្តបាត់ដំបង ៖ សេចក្តីរាយការណ៍បឋមឱ្យដឹងថា នាព្រឹកថ្ងៃទី១៦ សីហា នេះ កម្លាំងនគរបាលប៉ុស្តិ៍សង្កាត់ចំការសំរោង បានធ្វើការចុះទៅទីតាំងទទួលទិញ-បញ្ចាំគ្រឿងសម្ភារជាច្រើន ដែលខុសប្រក្រតីចំនួន២កន្លែង ស្ថិតក្នុងភូមិវត្តលាភ សង្កាត់ចំការសំរោង ក្រុងបាត់ដំបង ដើម្បីឱ្យធ្វើកិច្ចសន្យា ។
សេចក្តីរាយការណ៍បន្តថា ម្ចាស់ទីតាំងខាងលើ ទី១-ឈ្មោះមី ភេទប្រុស ដែលគ្រប់គ្នាស្គាល់ថា ជាអ្នករកស៊ីរបរនេះល្បីខ្លាំងបំផុត និងទី២-ឈ្មោះលី វិទូ ដែលទាំង២ទីតាំងនេះ គឺស្ថិតក្នុងភូមិជាមួយគ្នា ។ ប្រភពបន្តថា ការចុះទៅរបស់កម្លាំងសមត្ថកិច្ចនេះ គឺចុះទៅឱ្យម្ចាស់ទីតាំងត្រូវធ្វើកិច្ចសន្យាបញ្ឈប់ការទទូលទិញ ឬទទូលបញ្ចាំពីអតិថិជនទៀត ប៉ុន្តែអនុញ្ញាតឱ្យលក់របស់ដែលមានស្រាប់នៅក្នុងហាង ។
គួរបញ្ជាក់ថា ការចុះបង្ក្រាបនេះ គឺដោយយោងក្នុងខេត្តដំបងសព្វថ្ងៃ កំពុងកើតមានករណីចោរធ្វើសកម្មភាពលួចយ៉ាងកក្រើក ស្ទើរតែគ្រប់ទីកន្លែង និងនៅតាមបណ្តាស្រុកមួយចំនួនផង ទើបនៅព្រឹកថ្ងៃទី១៦ សីហា នេះ កម្លាំងនគរបាលប៉ុស្តិ៍សង្កាត់ចំការសំរោងបើកប្រតិបត្តិការចុះទាំង២ទីតាំងនេះដំបូងគេ ។
បើតាមប្រភពចុងក្រោយបានបង្ហើបថា ស្ទើរគ្រប់បណ្តាហាងបញ្ចាំទាំងអស់ក្នុងក្រុងបាត់ដំបងគេដឹងថា គឺសុទ្ធតែបានបង់ប្រាក់ខែទៅឱ្យសមត្ថកិច្ចស្ទើររាល់ខែទៅហើយ ទើបពួកគេរកស៊ីបានស្រួលបែបនេះ ។
ជុំវិញករណីអំពើចោរកម្មដែលកំពុងកក្រើកក្នុងខេត្តបាត់ដំបងនេះ ត្រូវបានស្នងការរងខេត្ត លោកឧត្តមសេនីយត្រី ជេត វណ្ណនី បានទទួលស្គាល់ថា អំពើរចោរកម្មពិតជាកំពុងកើតឡើងមែន ហើយលោកថា ករណីខ្លះត្រូវបានកំណត់មុខសញ្ញាហើយ ជាពិសេស ក្រុមចោរឆក់ ។ លោកស្នងការរងបានបញ្ជាក់ថា លោកស្នងការខេត្តបានប្រជុំដាក់ផែនការឲ្យកម្លាំងតាមស្រុក និងក្រុង ត្រូវពង្រឹងកម្លាំងតាមគោលដៅជាប្រចាំ ដើម្បីទប់ស្កាត់និងបង្ក្រាបបទល្មើស។ ប៉ុន្តែលោកបានបញ្ជាក់បន្ថែមថា លោកស្នងការខេត្តកំពុងជម្រុញឲ្យកម្លាំងជំនាញស៊ើបអង្កេតស្រាវជ្រាវ ដើម្បីកំណត់មុខសញ្ញាក្រុមចោរលួច ចោរឆក់ដ៍កក្រើកនេះហើយ។
ជាមួយនិងសកម្មភាពចោរឆក់ ចោរលួចដ៏កក្រើកនេះ ប្រជាពលរដ្ឋបានបង្ហាញពីការព្រួយបារម្ភយ៉ាងខ្លាំង ពីអសន្តិសុខនៅក្នុងមូលដ្ឋាន និងពីសុវតិ្ថភាពក្នុងការធ្វើដំណើរតាមដងផ្លូវ ។ ពលរដ្ឋបានលើកឡើងថា អំពើរចោរកម្មដែលកំពុងរីករាលដាលស្ទើរគ្រប់ស្រុក និងនៅក្នុងក្រុងនេះ ដោយសារបច្ចុប្បន្នល្បែងស៊ីសងគ្រប់ប្រភេទកំពុងរីករាលដាលស្ទើរគ្រប់កន្លែងដែរ។ ជាពិសេសនៅក្នុងក្រុងបាត់ដំបង ដែលជាសម្បុកល្បែងស៊ីសង និងសម្បុកចោរកម្ម ខណ:សមត្ថកិច្ខក្រុងបាត់ដំបង ហាក់បាត់ម្ចាស់ការក្នុងការទប់ស្កាត់ ឬបង្ក្រាប ។
ចែករំលែកព័តមាននេះ