ផ្តន្ទាទោសស្ត្រីជនជាតិមូដូវីម្នាក់ករណីនាំមនុស្សឆ្លងដែនខុសច្បាប់
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញនៅព្រឹកថ្ងៃទី១៥ ខែសីហា ឆ្នាំ២០១៧
រាជធានីភ្នំពេញ ៖ ចៅក្រមសាលាដំបូងរាជធានីភ្នំពេញនៅព្រឹកថ្ងៃទី១៥ ខែសីហា ឆ្នាំ២០១៧ បានប្រកាសសាលក្រមសម្រេចផ្ដន្ទាទោសស្ត្រីជនជាតិមូដាវីម្នាក់ដាក់ពន្ធនាគារកំណត់៨ឆ្នាំ និងបង្គាប់ឲ្យសងដើមបណ្ដឹងលើទឹកប្រាក់ចំនួន៣០លានរៀលពីបទ នាំចេញដោយមិនស្របច្បាប់ដោយមានគោលដៅពាក់ព័ន្ធករណីនាំមនុស្សឆ្លងដែនមកបង្ខំឲ្យធ្វើការក្នុងកម្ពុជា ។ សាលក្រមនេះបានប្រកាសធ្វើឡើងនៅចំពោះមុខជនជាប់ចោទ និងបើកផ្លូវទុកសិទ្ធិឲ្យប្ដឹងឧទ្ធរណ៍តាមកំណត់ច្បាប់ ។
ជនជាប់ចោទឈ្មោះ Bejenari Liudmila ហៅ លីនដា ភេទស្រី អាយុ២៦ឆ្នាំ ជនជាតិមូដូវី ជាអ្នកគ្រប់គ្រងហាងហ្គាដូស្រា និងហាងភីហ្សាអ៊ីតាលី មានអាស័យដ្ឋានមុនពេលចាប់ខ្លួននៅផ្ទះលេខ១១០AEo ផ្លូវលេខ១៣៦ សង្កាត់ផ្សារកណ្ដាល២ ខណ្ឌដូនពេញ ។ ជនជាប់ចោទត្រូវបានសមត្ថកិច្ចចាប់ខ្លួនកាលពីថ្ងៃទី១៩ ខែមិថុនា ឆ្នាំ២០១៦ នៅក្នុងហាងភីហ្សាអ៊ីតាលី និងត្រូវបានចៅក្រមស៊ើបសួរសម្រេចឃុំខ្លួននៅថ្ងៃទី២២ ខែមិថុនា ដាក់ពន្ធនាគារព្រៃសជាបណ្តោះអាសន្ន ។
ដើមចមបណ្តាលឲ្យឃុំខ្លួនស្ត្រីរូបនេះកាលពីអំឡុងឆ្នាំ២០១៤ ជនជាប់ចោទបានល្បួងនាំឆ្លងដែនយកចេញនារីម្នាក់ជនជាតិរ៉ូម៉ានី អាយុ១៩ឆ្នាំ ចូលមកប្រទេសកម្ពុជា ដើម្បីឲ្យធ្វើការក្នុងហាងស្រារបស់គេ ។ ក្រោយមកជនរងគ្រោះចង់ត្រឡប់ទៅស្រុកកំណើតវិញ ប៉ុន្តែជនជាប់ចោទមិនឲ្យទៅហើយថែមទាំងបង្ខំឲ្យធ្វើការដើម្បីកាត់ប្រាក់ ។ ដោយយោងទៅលើការកៀបសង្កត់ទាំងផ្លូវកាយ និងផ្លូវចិត្តយ៉ាងដូច្នេះ ជនរងគ្រោះក៏បានសម្រេចចិត្តទាក់ទងរកសមត្ថកិច្ចនៅកម្ពុជាប្តឹងឲ្យជួយចាត់ការលើជនជាប់ចោទតាមនីតិវិធី ។ ក្រោយពីមានពាក្យបណ្តឹងនោះ នាយកដ្ឋាននគរបាលប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃចាប់ខ្លួនជនសង្ស័យដើម្បីយកមកផ្តន្ទាទោសតាមផ្លូវច្បាប់នេះ ៕
ចែករំលែកព័តមាននេះ