ញ៉ាមធ្លាប់បានសម្រេចម្តងដល់លើកទី2ប្រាប់ថាតែមួយភ្លែតទេ…(មានវីដេអូ)
ខេត្តកណ្ដាល ៖ កម្មកររត់តុនៅក្នុងភោជនីយ៍ដ្ឋានម្នាក់បានខ្ចីម៉ូតូរបស់បុរសម្នាក់ទៀតដែលជាអ្នកគិតលុយ
ខេត្តកណ្ដាល ៖ កម្មកររត់តុនៅក្នុងភោជនីយ៍ដ្ឋានម្នាក់បានខ្ចីម៉ូតូរបស់បុរសម្នាក់ទៀតដែលជាអ្នកគិតលុយនៅក្នុងភោជនីយ៍ដ្ឋានជាមួយគ្នាដោយប្រាប់ម្ចាស់ម៉ូតូថា ជិះទៅយកលុយតែមួយភ្លែតប៉ុណ្ណោះ ក៏ស្រាប់តែជិះយកទៅលក់បានលុយចំនួន៧០០ដុល្លារ រួចបានគេចខ្លួនបាត់ស្រមោល ប៉ុន្តែជាង២ខែក្រោយមកទើបត្រូវម្ចាស់ម៉ូតូតាមរកឃើញក៏បានធ្វើការឃាត់ខ្លួនបាន ។ ដែលការចាប់ខ្លួននោះបានធ្វើឡើងកាលពីថ្ងៃទី១៤ ខែសីហា ឆ្នាំ២០១៧ នៅក្នុងភូមិសាស្ត្រសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យម្នាក់នោះឈ្មោះ តែ ណុល អាយុ២៧ឆ្នាំ មុខរបរកម្មកររត់តុនៅក្នុងភោជនីយ៍ដ្ឋានមួយកន្លែង ស្នាក់នៅក្នុងភូមិអូដឹម សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។ ចំណែកម៉ូតូដែលត្រូវជនសង្ស័យខាងលើបោកយកទៅលក់បាត់នោះម៉ាកហុងដាឌ្រីមសេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ១CS-៨៦២៥ ដែលជាកម្មសិទ្ធិរបស់បុរសម្នាក់ឈ្មោះ មាន ម៉ៅ អាយុ២៧ឆ្នាំ មុខរបរអ្នកគិតលុយនៅក្នុងភោជនីយ៍ដ្ឋាននោះដែរ និងស្នាក់នៅកន្លែងធ្វើការនោះ ។
នគរបាលបានឲ្យដឹងថា ហេតុការណ៏រំលោភលើទំនុកចិត្តខាងលើនោះបានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី២២ ខែឧសភា ឆ្នាំ២០១៧ នៅចំណុចភោជនីយ៍ដ្ឋានមួយកន្លែងដែលមានទីតាំងស្ថិតនៅភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល ដោយនៅមុនពេលកើតហេតុជនសង្ស័យបានធ្វើសកម្មភាពខ្ចីម៉ូតូ១គ្រឿងខាងលើពីបុរសអ្នកគិតលុយក្នុងភោជនីយ៍ដ្ឋានជិះ ដោយប្រាប់ថា ទៅយកលុយតែមួយភ្លែតប៉ុណ្ណោះ ប៉ុន្តែមិនបានប្រាប់ថា ទៅយកលុយនៅកន្លែងណាហើយលុយគេជំពាក់ ឬក៏លុយអ្វីផ្សេងនោះឡើយ ។ ខណៈនោះដោយសារតែជាអ្នកធ្វើការជាមួគ្នាទើបជនរងគ្រោះយល់ព្រមឲ្យខ្ចីជិះ និងមិនបាននឹកស្មានថា ជននេះមានគំនិតអាក្រក់បោកប្រាស់បែបនេះឡើយ បន្ទាប់មកក៏ត្រូវបានជននោះជិះយកទៅបាត់មិនត្រឡប់មកវិញសោះ ។ ប្រភពដដែលបានបន្តទៀតថា ក្រោយពេលចាំបាត់ៗទើបជនរងគ្រោះដឹងថា ចាញ់បោកជននោះ បន្ទាប់មកបានតាមរកគ្រប់ទីកន្លែង ប៉ុន្តែមិនបានឃើញឡើយគឺជននោះបានបោះបង់ការងារជាអ្នករត់តុចោល និងបានគេចខ្លួនបាត់រហូតតែម្ដង ទោះជាបែបណាជនរងគ្រោះនៅតែតាមរកគ្រប់ទីកន្លែងដដែល ។
លុះរយៈពេលជាង២ខែក្រោយមករហូតដល់ថ្ងៃទី១៣ ខែសីហា ឆ្នាំ២០១៧ ទើបប្រទះឃើញជននោះកំពុងស្ថិតនៅក្នុងភូមិសាស្ត្រសង្កាត់ចោមចៅក៏បានធ្វើការចាប់ខ្លួនបន្ទាប់មកបាននាំទៅប្រគល់ឲ្យនគរបាលសាកសួរ និង ចាត់ការតាមច្បាប់តែម្ដង ។ ក្រោយនគរបាលសួរនាំជនសង្ស័យរូបនោះបានសារភាពថា ខ្លួនពិតជាបានបោកយកម៉ូតូពីជនរងគ្រោះពិតមែនដោយយកទៅលក់នៅម្ដុំផ្សារហេងលីក្នុងតម្លៃ៧០០ដុល្លារហើយនេះមិនមែនជាលើកទី១នោះទេ ដែលខ្លួនធ្វើសកម្មភាពឆបោកម៉ូតូនោះគឺកាលពី១ឆ្នាំមុនធ្លាប់បានឆបោកយកម៉ូតូអ្នកផ្សេងទៀតបានសម្រេច១គ្រឿង និងបានយកទៅលក់ដែរហើយបានគេចខ្លួនរួចលុះពេលនេះបានបោកយកម៉ូតូអ្នកធ្វើការជាមួយគ្នាក៏ត្រូវអស់លក្ខណ៍ជាប់អន្ទាក់បែបនេះតែម្ដង ៕
ចែករំលែកព័តមាននេះ