រាជធានីភ្នំពេញ ៖ នារសៀលថ្ងៃទី១៥ ខែសីហា ឆ្នាំ២០១៧ ចៅក្រមសាលាដំបូងរាជធានីភ្នំពេញ លោក កោ វណ្ឌី បានប្រកាសសាលក្រមផ្តន្ទាទោសឈ្មោះ គុយ សិទ្ធិសក្កិ ភេទប្រុស អាយុ២៦ឆ្នាំ មុខរបរជាមន្រី្តពន្ធនាគារ ដាក់ពន្ធនាគារកំណត់១ឆ្នាំ និងសងជំងឺចិត្តទៅដើមបណ្ដឹងឈ្មោះ សុខ ចិន្តា ហៅកញ្ញា វ៉ាន់ លីឡា ចំនួន២០០លានរៀល និងទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ ក្រោមការចោទប្រកាន់ពីបទ ហិង្សាដោយចេតនា និងចែកចាយរូបអាសអាភាស តាមមាត្រា២១៧ និងមាត្រា៣៨.៣៩ ប្រព្រឹត្តកាលពីថ្ងៃទី២៦ ខែកុម្ភៈ ឆ្នាំ២០១៦ ។
សវនាការនេះ ធ្វើការជំនុំជម្រះកាលពីរសៀលថ្ងៃទី២៤ ខែកក្កដា ឆ្នាំ២០១៧ សវនាការនោះអវត្តមានជនជាប់ចោទឈ្មោះ គុយ សិទ្ធិសក្កិ ដោយមានមេធាវីការពារសិទ្ធិ តែបានអានចម្លើយរបស់ជនជាប់ចោទនៅដំណាក់ការចៅក្រមស៊ើបសួរ ជនជាប់ចោទឆ្លើយថា ខ្លួនបានស្គាល់ សុខ ចិន្តា ហៅ វ៉ាន់ លីឡា តាមហ្វេសប៊ុក កាលពីឆ្នាំ២០១៤ ហើយដល់ឆ្នាំ២០១៥ ក៏បានស្រលាញ់គ្នា ហើយក៏បាននាំទៅលេងផ្ទះ និងជួបប៉ាម៉ាក់ ។ ចំណែករឿងដែលចោទថា បង្ហោះរូបអាសអាភាស ខ្លួនមិនបានដឹងទេ និងសុំឲ្យតុលាការជួយរកយុត្តិធម៌ឲ្យខ្ញុំផង ។
ចំណែកចម្លើយដើមបណ្តឹង សុខ ចិន្តា បានស្នើសុំឲ្យតុលាការផ្តន្ទាជនជាប់ចោទទៅតាមផ្លូវច្បាប់ ហើយដើមបណ្តឹង ក៏អវត្តមានក្នុងពេលសវនាការដែរ ។ មេធាវីការពារសិទ្ធិឲ្យដើមបណ្ដឹងលោក នួន បូរ៉ា បាននិយាយនៅពេលសវនាការថា កាលពីថ្ងៃទី២៦ ខែកុម្ភៈ ឆ្នាំ២០១៦ លោក គុយ សិទ្ធិសក្កិ និងដើមបណ្តឹង សុខ ចិន្តា ហៅ វ៉ាន់ លីឡា បានឈ្លួសគ្នា ហើយលោក គុយ សិទ្ធិសក្កិ ក៏វាយដើមបណ្តឹង សុខ ចិន្តា ពេលនោះជនរងគ្រោះ ក៏បានបើទ្វារឡានចេញរត់ឲ្យគេជួយ ហើយពេលនោះ លោក គុយ សិទ្ធិសក្កិ ក៏បានបើកឡានរបស់ជនរងគ្រោះចេញទៅ ហើយនៅក្នុងឡាននោះ ក៏មានកាបូប ទូរស័ព្ទ របស់ជនរងគ្រោះផងដែរ ដោយរយៈពេលជិត១០ថ្ងៃ បានយកមកប្រគល់ឲ្យវិញ ។
ហើយចំណែករូបដែរបានបង្ហោះនោះ គឺដោយសារតែការស្រលាញ់គ្នា និងគិតថានឹងបានគ្នាជាប្តីប្រពន្ធ ទើបមានការថតផ្ញើឲ្យគ្នាមើល ដោយសារតែលោក គុយ សិទ្ធិសក្កិ នៅរៀនឯបរទេស ។ លោកមេធាវី ក៏បានបញ្ជាក់ផងដែលថា ដើមបណ្តឹងកញ្ញា សុខ ចិន្តា បានទាមទារជំងឺចិត្តចំនួន៥០ម៉ឺនដុល្លារ ។ តំណាងអយ្យការអមសាលាដំបូងរាជធានីភ្នំពេញ លោក សេង ហៀង ធ្វើសេចក្តីសន្និដ្ឋានតាមការអានចម្លើយរបស់ជនជាប់ចោទ និងជនរងគ្រោះ ពិតជាមានអំពើហិង្សា ដោយចេតនា និងចែកចាយរូបអាសអាភាសពិតមែន តំណាងអយ្យការនៅតែតម្កល់បទចោទនៅដ៏ដែល ៕
ចែករំលែកព័តមាននេះ