ខេត្តបន្ទាយមានជ័យ ៖ សិប្បកម្មផលិតទឹកសុទ្ធមួយកន្លែង រងការចោទប្រកាន់ថា បង្ហូរទឹកបំផ្លាញផ្លូវ ធ្វើឲ្យអ្នកស្រុកពិបាកឆ្លងកាត់ប្រៀបដូចមានផ្លូវ តែធ្វើដំណើរមិនបាន សូម្បីតែយានយន្តក៏ត្រូវផ្ញើគេរាល់យប់ ។
ខេត្តបន្ទាយមានជ័យ ៖ សិប្បកម្មផលិតទឹកសុទ្ធមួយកន្លែង រងការចោទប្រកាន់ថា បង្ហូរទឹកបំផ្លាញផ្លូវ ធ្វើឲ្យអ្នកស្រុកពិបាកឆ្លងកាត់ប្រៀបដូចមានផ្លូវ តែធ្វើដំណើរមិនបាន សូម្បីតែយានយន្តក៏ត្រូវផ្ញើគេរាល់យប់ ។
ទីតាំងរងការចោទប្រកាន់ខាងលើ ស្ថិតនៅភូមិមិត្តភាព ក្រុងប៉ោយប៉ែត ពលរដ្ឋជាច្រើនគ្រួសារដែលរស់នៅសងខាងផ្លូវចំណុចកើតហេតុ បានរអ៊ូរទាំថា ផ្លូវមួយខ្សែនេះពិបាកធ្វើដំណើជិត៣ឆ្នាំមកហើយ ពោលគឺតាំងពីគេបង្កើតសិប្បកម្មនោះមក ។
ពួកគាត់បន្តថា បញ្ហាវាផ្តើមចេញពីសិប្បកម្មនោះបង្ហូរទឹកចូលប៊ីដុងលើដងផ្លូវ បង្ហៀរទឹកខួបប្រាំងវស្សា ។ ពួកគាត់ថា ផ្លួវមួយខ្សែនេះ មានភក់ និងដក់ទឹក ខួបប្រាំងទាំងវស្សាតែម្តង ហើយថា ពីមុនអាចធ្វើដំណើបានខ្លះ តែបច្ចុប្បន្នគ្រប់គ្នា មិនអាចឆ្លងកាត់ផ្លូវនោះបានទេ ព្រោះម្ចាស់សិប្បកម្មចតរថយន្តតូចធំលើកដាក់ និងបញ្ចូលទឹកចូលប៊ីដុងលើរថយន្តនៅទីនោះ ។
ម្យ៉ាងដើមផ្លូវចូលទៅផ្ទះពួកគាត់ក្លាយជាអូរទៅហើយ ព្រោះសិប្បកម្មនេះ បង្ហូរទឹកខួបប្រាំងវស្សា ។ ពួកគាត់ថា បច្ចុប្បន្នកុំថាឡើយតែបើកបរយានយន្ត សូម្បីតែដើរឆ្លងកាត់មិនបានផង រហូតអ្នកមានរថយន្តត្រូវចំណាយប្រាក់ផ្ញើគេពេលយប់ថែមទៀត ។
ពួកគាត់ថា បច្ចុប្បន្ននាំគ្នាធ្វើដំណើរកាត់ដីឡូត៍គ្មានអ្នករស់នៅឆ្ពោះទៅផ្លូវមួយទៀត ប៉ុន្តែពួកគាត់ថាថ្ងៃទី២៤ ខាងមុខនេះ ដីឡូត៍ដែលធ្លាប់ដើកាត់នោះ ម្ចាស់គេ នឹងមកធ្វើផ្ទះរស់នៅ ។ ដោយការបារម្មណ៍បញ្ហាគ្មានផ្លូវឆ្លងកាត់នាពេលខាងមុខ ពួកគាត់ក៏អំពាវនាវសុំអាជ្ញាធរមានសមត្ថកិច្ចមេត្តាជួយពិនិត្យមើលបញ្ហានេះផង ។
ទាក់ទិនករណីនេះ ម្ចាស់សិប្បកម្មមិនអាចសុំការបំភ្លឺបានទេ ប៉ុន្តែស្ត្រីម្នាក់ដែលលើកទូរស័ព្ទ អះអាងថាជាអ្នកគ្រប់គ្រងទូទៅ បានប្រាប់តាមទូរស័ព្ទថា ការពិតទឹកដែលដក់លើផ្លូវនោះ វាមិនមែនកើតចេញតែពីសិប្បកម្មរបស់គាត់នោះទេ គឺវាហូរពីចំណុចផ្សេងៗមក ។
ស្ត្រីដដែលបន្តថា កន្លងមកខាងក្រុមហ៊ុនគាត់បានស្នើសុំអាជ្ញាធរ ដើម្បីអភិវឌ្ឍន៍ផ្លូវ តែអាជ្ញាធរភូមិ មិនឯកភាព ទើបកើតមានបញ្ហាដល់បច្ចប្បន្ន ។ លោក សន មុន្នី មេភូមិមិត្តភាព ប្រាប់តាមទូរស័ព្ទថា ករណីខាងលើពិតជាកើតមានមែន ។ លោកមេភូមិបន្តថា កន្លងមកខាងក្រុមហ៊ុនអភិវឌ្ឍន៍ផ្លូវ បានដឹកលូទៅដាក់ពង្រាយគ្រោងធ្វើហើយ តែដោយសារខ្លាចប៉ះពាល់ទុយោទឹករបស់ក្រុមហ៊ុនទឹកស្អាត (អានកូ) ក៏ដកវិញ ។
លោកបន្តថា លោក និងលោក ហាក់ សុផល បានព្យាយាមទៅជួបក្រុមហ៊ុនទឹកស្អាត (អានកូ) ៣ដងមកហើយ ដើម្បីឲ្យជួយសម្រួលចំណុចប៉ះពាល់ ប៉ុន្តែមិនទាន់មានការឆ្លើយតប ។ កោះសន្តិភាពមិនអាចទំនាក់ទំនងខាងក្រុមហ៊ុនទឹកស្អាត (អានកូ) បានទេ នៅរសៀលថ្ងៃទី១៥ ខែសីហា ឆ្នាំ២០១៧ នេះ ព្រោះមិនស្គាល់លេខទូរស័ព្ទ ៕
ចែករំលែកព័តមាននេះ