ខេត្តមណ្ឌលគិរី ៖ អភិបាលខេត្តមណ្ឌលគិរីបានថ្លែងថា បេក្ខភាពដែលជាប់និទ្ទេសAក្នុងការប្រលងបាក់ឌុបក្នុងខេត្តមណ្ឌលគិរីលោកនឹងផ្តល់ម៉ូតូ១គ្រឿងជូន
ខេត្តមណ្ឌលគិរី ៖ អភិបាលខេត្តមណ្ឌលគិរីបានថ្លែងថា បេក្ខភាពដែលជាប់និទ្ទេសAក្នុងការប្រលងបាក់ឌុបក្នុងខេត្តមណ្ឌលគិរីលោកនឹងផ្តល់ម៉ូតូ១គ្រឿងជូន ថ្លែងក្នុងពិធីជួបសំណេះសំណាលជាមួយលោកគ្រូ អ្នកគ្រូ និងសិស្សនុសិស្សរៀនបំប៉ន ដើម្បីត្រៀមប្រលងសញ្ញាប័ត្រមធ្យមសិក្សាទុតិយភូមិ នៅវិទ្យាល័យហ៊ុនសែនមណ្ឌលគិរី កាលពីរសៀលថ្ងៃទី១៤ ខែសីហា ឆ្នាំ២០១៧ ។
លោក ស្វាយ សំអ៊ាង អភិបាលខេត្តបានផ្តល់នូវបទពិសោធន៍ និងអនុសាសន៍ល្អៗមួយចំនួនដល់សិស្សានុសិស្សទាំងអស់ ដើម្បីយកទៅអនុវត្តក្នុងថ្ងៃប្រលងឲ្យបានទទួលបានជោគជ័យ ហើយនេះគឺជាឆ្នាំទី៤ហើយក្នុងការកែទម្រង់ស៊ីជម្រៅរបស់ក្រសួងអប់រំយុវជន និងកីឡា ក្នុងការរឹតបន្តឹងលើវិស័យអប់រំដើម្បីធ្វើយ៉ាងណាឲ្យសិស្សានុសិស្សមានចំណេះដឹង និងបញ្ចេញនូវសមត្ថភាពពិតប្រាកដ ។ ជាមួយគ្នានេះដែរអភិបាលខេត្ត បានណែនាំដល់ប្អូនៗសិស្សានុសិស្សទាំងអស់ត្រូវខិតខំសិក្សាស្រាវជ្រាវរកឯកសារផ្សេងៗ និងត្រូវរំឮកមើលមេរៀនឡើងវិញ ដើម្បីជាមូលដ្ឋានក្នុងការប្រលង ជាពិសេសត្រូវប្រឹងប្រែងបញ្ចេញឲ្យអស់ពីសមត្ថភាពរបស់ខ្លួន ដើម្បីទទួលបានជោគជ័យ ។ ដូច្នេះដើម្បីជាការផ្តល់កំលាំងចិត្ត និងលើកទឹកចិត្តដល់សិស្សទាំងអស់ដែលជាប់និទ្ទេសAក្នុងការប្រលងបាក់ឌុបក្នុងនាមលោកជាអភិបាលខេត្តនឹងផ្តល់ម៉ូតូ០១គ្រឿងជូន ហើយសង្ឃឹមថា នៅឆ្នាំនេះប្អូនៗនឹងបន្តយកជ័យលាភីបន្ថែមទៀត ដើម្បីលើកស្ទួយកិត្តិយសរបស់ខេត្ត សាលារៀន គ្រួសារ និងខ្លួនឯងផ្ទាល់តែម្តង ។ ទន្ទឹមនឹងនោះអភិបាលខេត្តមណ្ឌលគិរីក៏បានថ្លែងអំណរគុណចំពោះ លោកគ្រូ អ្នកគ្រូទាំងអស់ ដែលបានចំណាយពេលវេលា ទាំងកម្លាំងកាយចិត្តខិតខំបង្ហាត់បង្រៀនបំប៉នដល់សិស្សបន្ថែមសម្រាប់ត្រៀមប្រលងសញ្ញាប័ត្រមធ្យមសិក្សាទុតិយភូមិឆ្នាំនេះឲ្យទទួលបានជោគជ័យ ។
តាមការបញ្ជាក់របស់ប្រធានមន្ទីរអប់រំយុវជននិងកីឡាខេត្តលោក ទឹម សង្វាត បានឲ្យដឹងថា ការប្រលងសញ្ញាប័ត្រមធ្យមសិក្សាទុតិយភូមិឆ្នាំនេះនឹងប្រព្រឹត្តទៅនៅថ្ងៃទី២១ ខែសីហា មានរយៈពេល២ថ្ងៃ បែកចែកជាពីរមណ្ឌលប្រលង មានថ្នាក់វិទ្យសាស្ត្រ និងថ្នាក់វិទ្យា សាស្ត្រសង្គម ហើយបេក្ខជនទាំងអស់មកពីវិទ្យាល័យក្រុង/ស្រុក ទាំង៥ទូទាំងខេត្តចំនួន៣២០នាក់ ស្រី១៦៨នាក់ ត្រូវមកប្រលងនៅវិទ្យាល័យ ហ៊ុន សែន មណ្ឌលគិរី ៕
ចែករំលែកព័តមាននេះ