ខេត្តកណ្តាល ៖ អស់រយៈពេលជិត១០ឆ្នាំ បុរសម្នាក់បានប្រកបរបរធ្វើចង្ក្រានដី ឬហៅថា ចង្ក្រានលើយ លក់ដើម្បីផ្គត់ផ្គង់ជីវភាពក្នុងគ្រួសារ ។ របរនេះថ្វីដ្បិតតែមិនអាចឲ្យលោកធូរធារដូច
ខេត្តកណ្តាល ៖ អស់រយៈពេលជិត១០ឆ្នាំ បុរសម្នាក់បានប្រកបរបរធ្វើចង្ក្រានដី ឬហៅថា ចង្ក្រានលើយ លក់ដើម្បីផ្គត់ផ្គង់ជីវភាពក្នុងគ្រួសារ ។ របរនេះថ្វីដ្បិតតែមិនអាចឲ្យលោកធូរធារដូចពាណិជ្ជករ ឬអាជីវករ ប៉ុន្តែក៏អាចដោះស្រាយសេដ្ឋកិច្ចគ្រួសារប្រចាំថ្ងៃ និងមិនចាំបាច់ចំណាកស្រុកឃ្លាតឆ្ងាយពីសាច់ញាតិ បងប្អូន និងឪពុកម្ដាយ ។
ទោះបីយ៉ាងណា ប៉ុន្មានឆ្នាំចុងក្រោយនេះ ប្រទេសជាតិកាន់តែវិវត្តន៍ទៅៗ ជីវិតរស់នៅរបស់ពលរដ្ឋកាន់តែទំនើប ធ្វើឲ្យរបរប្រពៃណីមួយចំនួនបាត់បង់ជាបណ្ដើរៗ និងអ្នកជំនាន់ក្រោយស្ទើរតែមិនបានដឹង ។
ស្ថិតក្នុងវ័យ៣២ឆ្នាំ រស់នៅភូមិសំរោងក្អែ ឃុំសំរោងធំ ស្រុកកៀនស្វាយ លោក អ៊ុក សម្ភស្ស បានជួបជាមួយអ្នកយកព័ត៌មានកោះសន្ដិភាព ដោយរៀបរាប់ថា កាលពីដើមឡើយ បងប្រុសបង្កើត និងរូបលោកផ្ទាល់បានទៅនៅស៊ីឈ្នួលធ្វើចង្ក្រានលើយនេះឲ្យគេនៅឯស្រុកផ្សេង ក្នុងរយៈពេលជាច្រើនឆ្នាំ ។
ក្រោយពីខ្លួនមានបទពិសោធន៍ និងស្ទាត់ជំនាញហើយ ពួកលោកក៏បានវិលត្រឡប់មកស្រុកកំណើតវិញ និងរួមដៃគ្នាចាប់ផ្តើមធ្វើអាជីវកម្មនេះលក់នៅផ្ទះដោយខ្លួនឯង ចាប់តាំងពីឆ្នាំ២០០៧ មក ។
លោក សម្ភស្ស និយាយថា ការធ្វើចង្ក្រាននេះ បានជួយសម្រួលដល់ជីវភាពគ្រួសាររបស់លោកមួយកម្រិត ប៉ុន្ដែប៉ុន្មានឆ្នាំចុងក្រោយនេះ ពិបាកលក់បន្តិច ខណៈពលរដ្ឋខ្មែរឥឡូវកាន់តែមានជីវភាពធូរធារប្រសើរឡើង ការរស់នៅក៏ផ្លាស់ប្ដូរ ដោយអ្នកខ្លះងាកមកប្រើចង្ក្រានហ្គាស និងឆ្នាំងដាំបាយអគ្គិសនី គួបផ្សំនឹងមានការនាំចូលចង្ក្រាននេះពីប្រទេសជិតខាងទៀតនោះ ធ្វើឲ្យរបរមួយនេះកាន់តែប្រឈមទៅៗ និងអាចបាត់បង់នាថ្ងៃអនាគត ។ បច្ចុប្បន្ន លោកមានកម្មករ និងជាងជំនាញកំពុងបម្រើការងារទាំងអស់១១នាក់ ។
លោក អ៊ុក សម្ភស្ស បានរៀបរាប់ពីការធ្វើចង្ក្រាននេះថា ៖« ទម្រាំបានចេញជារូបរាងចង្ក្រាននេះ និងយកទៅលក់លើទីផ្សារ គឺមានច្រើនដំណាក់កាលណាស់ » ។ លោកថា ៖«ជាដំបូង យើងត្រូវរកទិញដីឥដ្ឋមកឲ្យបានច្រើន និងដាក់វាត្រាំទឹកក្នុងអាងរយៈពេល១ថ្ងៃ ។ បន្ទាប់ពីត្រាំទឹករួច យើងយកវាដាក់ចូលម៉ាស៊ីនកិនច្របល់លាយជាមួយផេះអង្កាមឲ្យដាច់ទឹក ។ រួចហើយយកមកដាក់ចូលពុម្ព ធ្វើជាតួយកទៅដាក់ហាលថ្ងៃរយៈពេល២ឬ ៣ថ្ងៃ ។ បន្ទាប់មក យកវាទៅចោះរន្ធ និងកាត់មាត់ រួចដាក់ហាល២ឬ៣ថ្ងៃទៀត ។ នៅពេលហាលស្ងួតហើយ យើងយកទៅដាក់ចំហុយក្នុងឡរយៈពេល២យប់៣ថ្ងៃ ទើបយកវាចេញមកស្រោបដែកពីក្រៅ រួចដាក់កញ្ច្រែងលាបពណ៌ សម្រេចតែម្តង » ។
លោកបន្តថា ចំពោះតម្លៃលក់នៅលើទីផ្សារ ចង្ក្រាន១ គឺចន្លោះពី៣.៥០០ ទៅ៥ពាន់រៀល តាមទីជិតទីឆ្ងាយ ព្រោះសព្វថ្ងៃ លោកបានដឹកវាតាមរថយន្តទៅលក់ និងបោះឲ្យម៉ូយ ។ បច្ចុប្បន្ន លោកមានទីផ្សារនៅខេត្តព្រៃវែង ស្វាយរៀង និងបណ្ដាខេត្តមួយចំនួនទៀត ដោយក្នុង១ថ្ងៃ លោកត្រូវដឹកចេញចន្លោះពី១ទៅ២រថយន្ដដើម្បីផ្គត់ផ្គង់លើទីផ្សារ និងទៅតាមការបញ្ជាទិញរបស់អ្នកបោះដុំ ៕
ចែករំលែកព័តមាននេះ