រាជធានីភ្នំពេញ ៖ ព្រលានយន្តហោះអន្តរជាតិថ្មីដែលគ្រោងបោះទុនប្រមាណ៩០០លានដុល្លារអាមេរិក នឹងចាប់ផ្តើមសាងសង់នៅឆ្នាំក្រោយនេះ បន្ទាប់ពីកិច្ចព្រមព្រៀង និងនីតិវិធីច្បាប់នានារវាងរាជរដ្ឋាភិបាល និងក្រុមហ៊ុនវិនិយោគបានបញ្ចប់រួចរាល់ហើយ ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានថ្លែងតាមទូរស័ព្ទនាព្រឹកថ្ងៃទី១៤ សីហា ថា ព្រលានយន្តហោះដែលមានទីតាំងស្ថិតក្នុងស្រុកសូត្រនិគម ខេត្តសៀមរាប លាតសន្ធឹងលើផ្ទៃដី ប្រមាណ៧៥០ហិកតា នឹងចាប់ផ្តើមសាងសង់នៅឆ្នាំក្រោយនេះហើយ គឺនៅតែក្នុងដំណាក់កាលចរចារវាងរាជរដ្ឋាភិបាល និងក្រុមហ៊ុនវិនិយោគព្រលានយន្តហោះកម្ពុជាSCAប៉ុណ្ណោះ ។ លោកបន្តថា បច្ចុប្បន្ន ក្រុមហ៊ុនដែលទទួលបានសិទ្ធិវិនិយោគព្រលាននេះ គឺក្រុមហ៊ុន YUNAN Development Group បានចាប់ផ្តើមឈូសពង្រាបដី និងដោះមីនជាបណ្តើរៗហើយ ។
លោកបន្តថា ព្រលានយន្តហោះនេះនឹងសាងសង់ជា២ដំណាក់កាល ដោយដំណាក់កាលទី១ គ្រោងចំណាយថវិកា៥០០លានដុល្លារ ដែលអាចចុះចតយន្តហោះខ្នាតមធ្យមប្រភេទ 4E និងដំណាក់កាលទី២ ទើបអាចចុះចតយន្តហោះខ្នាតយក្សបាន ។ នៅដំណាក់កាលចុងក្រោយនេះ គ្រោងចំណាយថវិកាជាង៣០០លានដុល្លារបន្ថែមទៀត ។ លោកបន្តថា ការសាងសង់ព្រលានយន្តហោះនេះអាចចំណាយពេលពី៣ទៅ៥ឆ្នាំ ដើម្បីបញ្ចប់ទាំងដំណាក់កាលទី១ និងទី២ ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី ថ្លែងថា ភ្ញៀវទេសចរអន្តរជាតិបានកើនឡើងនៅគ្រប់តំបន់ក្នុងបណ្តាប្រទេសអាស៊ាន ហើយកម្ពុជាក៏កំពុងទទួលបានភ្ញៀវទេសចរកាន់តែច្រើនផងដែរ ។ ហេតុនេះ ការសាងសង់ព្រលានយន្តហោះថ្មីនេះ ពិតជាសក្តានុពលមួយសម្រាប់កម្ពុជា ក្នុងការទាក់ទាញភ្ញៀវទេសចរអន្តរជាតិនានា ជាពិសេស ភ្ញៀវទេសចរ និងអ្នកជំនួញចិន ដែលបាននិងកំពុងកើនឡើងយ៉ាងគំហុកនៅកម្ពុជា ។ លោកបន្តថា ពេលព្រលានយន្តហោះថ្មីដំណើរការចេញជារូបរាង នឹងអាចអនុញ្ញាតឲ្យយន្តហោះខ្នាតធំៗចុះចតបាន ព្រោះគម្រោងរបស់វិនិយោគិនចិនចូលមកវិនិយោគ គឺមានគោលដៅទាក់ទាញក្រុមហ៊ុនអាកាសចរណ៍មកពីជុំវិញពិភពលោក ។
លោកបន្តថា ៖« យើងស្វាគមន៍ និងរីករាយចំពោះដំណឹងនេះ ហើយយើងរីករាយនឹងសមិទ្ធផលថ្មីនេះ ដែលនឹងផ្តល់ផលប្រយោជន៍ផ្នែកសេដ្ឋកិច្ច និងទេសចរណ៍ដល់កម្ពុជាបន្ថែមទៀត» ។
លោក ហូ វណ្ឌី បន្ថែមថា ព្រលានយន្តហោះថ្មីនេះ ក៏ជាការភ្ជាប់ជាមួយហេដ្ឋារចនាសម្ព័ន្ធ ដែលបានអភិវឌ្ឍន៍កាន់តែល្អប្រសើរពីរាជរដ្ឋាភិបាល ដើម្បីភ្ជាប់ទៅកាន់រមណីយដ្ឋានទេសចរណ៍ល្បីៗនៅជុំវិញតំបន់នេះ ដូចជា ប្រាសាទអង្គរ ប្រាសាទព្រះវិហារ ប្រាសាទកោះកេរ្ត៍ និងប្រាសាទសម្បូរព្រៃគុកដែលទើបបានដាក់បញ្ចូលជាសម្បត្តិបេតិកភណ្ឌវប្បធម៌ពិភពលោក កាលពីពេលថ្មីៗនេះផងដែរ ។
តាមរបាយការណ៍ក្រសួងទេសចរណ៍ រយៈពេល៦ខែដើមឆ្នាំ២០១៧ ភ្ញៀវទេសចរអន្តរជាតិមកទស្សនាកម្ពុជា ទាំងផ្លូវទឹក ផ្លូវគោក និងផ្លូវអាកាសសរុបមានចំនួន២.៦៦២.៦៧៩នាក់ កើនឡើង១២,៨% ធៀបនឹងរយៈ ពេលដូចគ្នាឆ្នាំ២០១៦ ក្នុងនោះ តាមផ្លូវអាកាសចំនួន១.៦០៥.៦៦៤នាក់ ។ រយៈពេលឆមាសទី១ឆ្នាំនេះដែរ ខេត្តសៀមរាបបានទទួលស្វាគមន៍ទេសចរអន្តរជាតិចំនួន១.២៣៣.៣៩៦នាក់ កើនឡើង១២,៦% ៕
ចែករំលែកព័តមាននេះ