រាជធានីភ្នំពេញ ៖ ជនសង្ស័យប្រុសស្រីចំនួន៣នាក់ ត្រូវបានកម្លាំងព្រហ្មទណ្ឌខណ្ឌមានជ័យសហការណ៍ជាមួយនឹងនគរបាលប៉ុស្តិ៍បឹងទំពុន ឃាត់ខ្លួនយកទៅសាកសួរ បន្ទាប់ពីឆែកឆេររកឃើញ នូវសាធាតុញៀនចំនួន១៧កញ្ចប់ និងកាំភ្លើងខ្លីចំនួន១ដើម ហេតុការណ៍ឃាត់ខ្លួនធ្វើឡើងនៅវេលាម៉ោង០១និង៣០នាទីរសៀល ថ្ងៃទី១៤ ខែសីហា ឆ្នាំ២០១៧ នៅក្នុងផ្ទះសំណាក់យីហោ កេសរវលក្ខ័ ផ្លូវ៣៧១ ភូមិត្នោតជ្រុំ៣ សង្កាត់បឹងទំពន់ ខណ្ឌមានជ័យ ។
ជនសង្ស័យទី១មានឈ្មោះ ចាន់ ហុងយុក ភេទស្រី អាយុ១៩ឆ្នាំ មុខរបរអ៊ុតសក់ ស្នាក់នៅផ្ទះជួល ភូមិសន្សំកុសល៣ សង្កាត់បឹងទំពុន ខណ្ឌមានជ័យ, ទី២មានឈ្មោះ ជាតិ ភេទប្រុស មុខរបរមិនពិតប្រាកដ ស្នាក់នៅមិនពិតប្រាកដ, និងទី៣ មានឈ្មោះ ជា សុថារឹទ្ធ ភេទប្រុស អាយុ៣១ឆ្នាំ មុខរបរមេការសំណង់ ស្នាក់នៅផ្ទះជួល ម្តុំអូរបែកក្អម ខណ្ឌទួលគោក ដកហូតថ្នាំប្រភេទក្រាមពណ៌សថ្លា តូចធំចំនួន១៧កញ្ចប់ ឧបករណ៍សម្រាប់ប្រើប្រាស់មួយចំនួន កាំភ្លើងខ្លីម៉ាក K54 មួយដើម គ្រាប់ចំនួន៧ និងបង់មួយ ។
តាមសម្តីសមត្ថកិច្ចបានឲ្យដឹងថា ៖ កម្លាំងព្រហ្មទណ្ឌខណ្ឌមានជ័យ សហការណ៍ជាមួយនឹងសមត្ថកិច្ចប៉ុស្តិ៍បឹងទំពុន ដឹកនាំដោយ លោក ហ៊ួរ ម៉េងវ៉ាង អធិការរង ទទួលបន្ទុកនគរបាលយុត្តិធម៍ បានដឹកនាំកម្លាំងចុះទៅឆែកឆេរផ្ទះសំណាក់ខាងលើ រួចហើយបានឃាត់ជនសង្ស័យប្រុសស្រីចំនួន២នាក់ ព្រមទាំងដកហូតបានថ្នាំញៀនចំនួន១៥កញ្ចប់ យកមកសាកសួរ នៅប៉ុស្តិ៍នគរបាលបឹងទំពុន រួចហើយបានឈានទៅធ្វើការឃាត់ខ្លួន ជនសង្សយ័ម្នាក់ទៀត ឈ្មោះ ជា សុថារិទ្ធ នៅម្តុំសាលាអង្គអេង សង្កាត់បឹងកេងកង២ ខណ្ឌចំការមន ដកហូតបានថ្នាំញៀន ចំនួន២កញ្ចប់តូច និងកាំភ្លើងខ្លីមួយដើម យកទៅសាកសួរផងដែរ ។
នៅពេលសមត្ថកិច្ចសាកសួរ ជនសង្ស័យបានសារភាពថា ៖ ពួកគេពិតជាបានជួញដូរ និងប្រើប្រាស់ នៅគ្រឿងញៀនទាំងនេះពិតប្រាកដមែន ចំណែកកាំភ្លើងវិញ គឺពួកគេបានខ្ចីពីមិត្តភក្តិរបស់គេម្នាក់ ទៅយកមកធ្វើសកម្មភាពផ្សេងៗ ។
ក្រោយពេលកើតហេតុ បន្ទាប់ពីសាកសួរ ជនសង្ស័យព្រមទាំងវត្ថុតាំង ត្រូវបានសមត្ថកិច្ចកសាងសុំណុំរឿងបញ្ជួនខ្លួនទៅអធិការដ្ឋានខណ្ឌមានជ័យ ដើម្បីចាត់ការបន្ត ៕
ចែករំលែកព័តមាននេះ