រាជធានីភ្នំពេញ ៖ យុវជនម្នាក់ជិះម៉ូតូ ZOOMER X ចេញពីកោះពេជ្រប្រញាប់ទៅយកមិត្តភក្តិនៅម្តុំសួនច្បារក្ដាន់ពីរ បានបើកជែងខាងឆ្វេងរថយន្តមួយគ្រឿងទៀត បណ្តាលឲ្យទាក់ដៃចង្កូតនឹងកញ្ចក់រថយន្ត ដួលបោកនឹងថ្នល់ អូសជាង២០ម៉ែត្រ ទាំងមនុស្ស និងម៉ូតូស្លា.ប់ភ្លាមៗនៅនឹងកន្លែងកើតហេតុ
រាជធានីភ្នំពេញ ៖ យុវជនម្នាក់ជិះម៉ូតូ ZOOMER X ចេញពីកោះពេជ្រប្រញាប់ទៅយកមិត្តភក្តិនៅម្តុំសួនច្បារក្ដាន់ពីរ បានបើកជែងខាងឆ្វេងរថយន្តមួយគ្រឿងទៀត បណ្តាលឲ្យទាក់ដៃចង្កូតនឹងកញ្ចក់រថយន្ត ដួលបោកនឹងថ្នល់ អូសជាង២០ម៉ែត្រ ទាំងមនុស្ស និងម៉ូតូស្លាប់ភ្លាមៗនៅនឹងកន្លែងកើតហេតុ យ៉ាងអាណោចអាធ័ម ហេតុការណ៍ដ៏រន្ធត់នេះ បង្កឲ្យមានការភ្ញាក់ផ្អើលឡើងកាលពីវេលាម៉ោង០៩យប់ ថ្ងៃទី១៤ ខែសីហា ឆ្នាំ២០១៧ ត្រង់ចំណុចមុខអគារសន្តិភាព តាមបណ្តោយមហាវិថីសហព័ន្ធរុស្ស៉ី ស្ថិតក្នុងសង្កាត់ស្រះចក ខណ្ឌដូនពេញ ។
ជនរងគ្រោះមានឈ្មោះ គួយ ឆេកូ ភេទប្រុស អាយុ១៩ឆ្នាំ មុខរបរជាសន្តិសុខ ស្នាក់នៅម្តុំគីឡូលេខ៩ សង្កាត់ច្រាំងចំរេះទី២ ខណ្ឌឬស្សីកែវ មានស្រុកកំណើតនៅភូមិជុំរះពេន ស្រុកសំរោង ខេត្តតាកែវ ជិះម៉ូតូមួយគ្រឿងម៉ាក ZOOMER-X ពណ៌ក្រហម ពាក់ស្លាកលេខ ភ្នំពេញ ១GC-៨២០៩ ។
តាមប្រភពព័ត៌មានពីកន្លែងកើតហេតុ បានឲ្យដឹងថា ៖ នៅមុនពេលកើតហេតុ គេឃើញជនរងគ្រោះជិះមួយគ្រឿងម៉ាក ZOOMER-X ទើបតែជិះចេញមកពីកោះពេជ្រ ហើយប្រញាប់ទៅយកមិត្តភក្តិនៅម្តុំសួនច្បារក្ដាន់ពីរ ដោយធ្វើដំណើរតាមបណ្តោយមហាវិថីសហព័ន្ធរុស្ស៉ី ទិសដៅពីកើតទៅលិចក្នុងល្បឿនបោះពួយយ៉ាងលឿន ។ លុះមកដល់ចំណុចកើតហេតុ ក៏បានបើកជែងខាងឆ្វេងរថយន្តមួយគ្រឿង មិនចាំម៉ាក ដែលបើកបរស្របទិសគ្នា បណ្តាលឲ្យម៉ូតូរងគ្រោះទាក់ដៃចង្កូតនឹងកញ្ចក់មើលក្រោយរថយន្ត ដួលបោកនឹងថ្នល់អូសប្រមាណជា២០ម៉ែត្រស្លាប់ភ្លាមៗនៅនឹងកន្លែងកើតហេតុ ។ ចំណែកឯរថយន្តបានបើករត់គេចខ្លួនបាត់ស្រមោល ។
ក្រោយកើតហេតុសាច់ញាតិរបស់ជនរងគ្រោះបានមកដល់កន្លែងកើតហេតុ និងបានស្រែកទ្រហោយំគួរឲ្យសោកសង្វេគ ។ បន្ទាប់មកសមត្ថកិច្ចជំនាញបានធ្វើការវាស់វែងយកម៉ូតូទៅរក្សទុកនៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញ ដើម្បីរងចាំប្រគល់ទៅឲ្យសាច់ញាតិជនរងគ្រោះនៅពេលក្រោយ ។ ចំណែកឯសពបុរសរងគ្រោះត្រូវបានសមត្ថកិច្ចប្រគល់ទៅឲ្យសាច់ញាតិដឹកយកទៅធ្វើបុណ្យទៅតាមប្រពៃណីនៅឯខេត្តតាកែវ ៕
ចែករំលែកព័តមាននេះ