រាជធានីភ្នំពេញ ៖ កម្លាំងគណៈបញ្ជាការឯកភាព ខណ្ឌចំការមន ដែលធ្វើការដឹកនាំដោយលោក ព្រុំ សំខាន់ អភិបាលខណ្ឌ បានចុះបង្ក្រាបទីតាំងហ្គេមបាញ់ត្រីខុសច្បាប់មួយកន្លែងមួយកន្លែង ដោយធ្វើការដកហូតទូហ្គេមបាញ់ត្រីចំនួន២ទូ និងធ្វើការឃាត់ខ្លួនបុរសអ្នកលេងម្នាក់ នៅក្នុងភូមិសាស្ត្រសង្កាត់បឹងកេងកងទី២។ ប្រតិបត្តិការបង្ក្រាបល្បែងស៊ីសងប្រភេទហ្គេមបាញ់ត្រីនេះបានធ្វើឡើងកាលពីវេលាម៉ោង ៥ និង៤៥នាទីល្ងាច ថ្ងៃទី១៤ ខែសីហា ឆ្នាំ២០១៧ នៅចំណុចផ្ទះលេខ៨៧Eo ផ្លូវលេខ៣០៤ ក្នុងសង្កាត់បឹងកេងកងទី២ ខណ្ឌចំការមន។
លោក ព្រុំ សំខាន់ អភិបាលនៃគណៈអភិខណ្ឌចំការមន បានប្រាប់ឱ្យដឹងថា ពេលនេះដែរកម្លាំងគណៈបញ្ជាការឯកភាពខណ្ឌចំការមន ដែលដឹកនាំដោយរូបលោកផ្ទាល់ បានឆ្មក់ចុះបង្ក្រាបទីតាំងល្បែងស៊ីសងប្រភេទហ្គេមបាញ់ត្រីនៅក្នុងផ្ទះល្វែងមួយកន្លែងខាងលើនេះ។ ដោយក្នុងប្រតិតបត្តិការនេះ កម្លាំងរបស់លោកបានធ្វើការដកហូតទូហ្គេមបាញ់ត្រីចំនួន២ទូ ដែលបានលួចលេងដោយខុសច្បាប់នៅខាងក្នុងផ្ទះល្វែងខាងលើនេះ។
លោកក៏បានប្រាប់បន្តទៀតថា ប្រតិបត្តិការបង្ក្រាបល្បែងស៊ីសងប្រភេទហ្គេមបាញ់ត្រីនៅចំណុចនេះដែរគឺបានធ្វើឡើងក្រោយពីកម្លាំងរបស់លោកបានទទួលនូវការរាយការណ៍ប្រាប់អំពីសំណាក់ប្រជាពលរដ្ឋដែលមានទីលំនៅក្បែរខាងលើ ទើបឈានទៅដល់ការចុះមកបង្ក្រាបតែម្តង ហើយកម្លាំងរបស់លោកក៏នៅតែបន្តចុះប្រតិបត្តិការបង្ក្រាបរាល់ទីតាំងល្បែងស៊ីសងគ្រប់ប្រភេទដែលមាននៅក្នុងភូមិសាស្ត្ររបស់លោកឲ្យអស់ផងដែរ។ ក្រោយពីប្រតិបត្តិការបង្ក្រាបទីតាំងល្បែងស៊ីសងប្រភេទហ្គេមបាញ់ត្រីនៅចំណុចខាងលើ កម្លាំងគណៈបញ្ជាការឯកភាពបានដកហូតទូហ្គេមបាញ់ត្រីទាំង២ទូនោះយកទៅរក្សាទុកនៅសាលាសង្កាត់បឹងកេងកងទី២ ដើម្បីរង់ចាំធ្វើការកម្ទេចចោលជាក្រោយ៕
ចែករំលែកព័តមាននេះ