មនុស្ស៤នាក់រួមទាំងលោក សួន សេរីរដ្ឋា ត្រូវសមត្ថកិច្ចចាប់ខ្លួន
រាជធានីភ្នំពេញ ៖ តាមសេចក្តីរាយការណ៍មិនទាន់ជាផ្លូវការបានឲ្យដឹងកាលពីរសៀលថ្ងៃទី១៣ សីហា នេះថា មានមនុស្ស៤នាក់ រួមទាំងលោក សួន សេរីរដ្ឋា
រាជធានីភ្នំពេញ ៖ តាមសេចក្តីរាយការណ៍មិនទាន់ជាផ្លូវការបានឲ្យដឹងកាលពីរសៀលថ្ងៃទី១៣ សីហា នេះថា មានមនុស្ស៤នាក់ រួមទាំងលោក សួន សេរីរដ្ឋា ប្រធានគណបក្សអំណាចខ្មែរ ត្រូវបានសមត្ថកិច្ចឃាត់ខ្លួន ពាក់ព័ន្ធនឹងវោហាប្រធានគណបក្សមួយនេះ បានប្រើពាក្យសម្ដី និងខ្លឹមសារដ៏ឆ្កួតលីលា បង្ហោះតាមបណ្តាញសង្គមហ្វេសប៊ុក ប្រមាថមើលងាយធ្វើឲ្យប៉ះពាល់ដល់ដល់ថ្នាក់ដឹកនាំប្រទេស កំពូលស្ថាប័នកងខេមរភូមិន្ទទាំងមូល នូវព្រឹត្តិការប្រឈមមុខដាក់គ្នារវាងកងទ័ពកម្ពុជា និងកងទ័ពឡាវ នៅព្រំដែនខេត្តស្ទឹងត្រែង។ ប្រភពឲ្យដឹងថា មនុស្ស៤នាក់នោះ មានលោក សួន សេរីរដ្ឋា ប្រធានគណបក្សអំណាចខ្មែរ ជំនួយការម្នាក់ អង្គរក្សម្នាក់ អ្នកបើកបររថយន្តម្នាក់ និងអ្នកជំនាញកុំព្យូទ័រម្នាក់។
លោក សួន សេរីរដ្ឋា និងមនុស្សស្និទ្ធ៣នាក់ទៀត ត្រូវកម្លាំងសមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញឃាត់ខ្លួន នៅចំណុចស្ពានព្រែកព្នៅ ខណ្ឌព្រែកព្នៅ បន្ទាប់ពីលោក និងមនុស្ស៣នាក់នោះបានវិលមកពីខេត្តកំពង់ចាមចូលមករាជធានីភ្នំពេញ។ ក្រោយពេលឃាត់ខ្លួននារសៀលថ្ងៃទី១៣ សីហា នោះ សមត្ថកិច្ចបាននាំលោក សួន សេរីរដ្ឋា ទៅឆែកឆេរលំនៅឋានរបស់លោក ដែលស្ថិតនៅក្នុងបុរីប៉េង ហួត តាមបណ្តោយផ្លូវ ជា សុផារ៉ា សង្កាត់.ខណ្ឌឬស្សីកែវ ដើម្បីរកវត្ថុតាងបន្ថែមដែលជាប់ពាក់ពន្ធ។ ការនាំខ្លួនលោក សួន សេរីរដ្ឋា ទៅឆែកឆេរលំនៅដ្ឋាននោះ សមត្ថកិច្ចបានដាក់ពង្រាយកងកម្លាំងការពារយ៉ាងមុតមាំ មិនមានការអនុញ្ញាតឲ្យអ្នករស់នៅ ក្នុងបុរី ប៉េងហួត ចេញចូលរហេតរហូតទេ រួមទាំងអ្នកកាសែតផងដែរ។ បន្ទាប់ពីឆែកឆេរអស់រយៈពេលច្រើនម៉ោង ក៏ត្រូវបានបញ្ចប់ទៅវិញតែលទ្ធផលយ៉ាងណានោះ សមត្ថកិច្ចមិនបានទម្លាយឲ្យដឹងដែរ។
សមត្ថកិច្ចបង្ហើបឲ្យដឹងថា ការចាប់ខ្លួនលោក សួន សេរីរដ្ឋា ត្រូវបានធ្វើឡើង បន្ទាប់ពីលោកបានបង្ហោះសារនៅថ្ងៃទី១២ សីហា ២០១៧ ប្រមាថដល់កងទ័ពខ្មែរ ដែលខ្លឹមសារយ៉ាងដូច្នេះថា (ពេលសង្គ្រាមកើតឡើងជាមួយនឹងប្រទេសលាវ នោះលទ្ធផលវាហ្នឹងមិនខុសពីសង្គ្រាម ដែលកើតឡើងជាមួយនឹងប្រទេសសៀមទេ ! គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរនឹងឡើងបុណ្យសក្តិ ប្រមូលបានលុយកាក់សប្បាយជាមួយស្រីញី យ៉ាងគគ្រឹកគគ្រេង ! ។ ពីព្រោះកន្លងមកដូចយើងដឹងហើយ សង្គ្រាមដែលកើតឡើងជាមួយនឹងប្រទេសសៀម គឺស្លាប់តែកូនខ្មែរអ្នកស្នេហាជាតិ ដែលចូលប្រយុទ្ធនៅជួរមុខទេ។
ចំណែកឯពួកមេៗ ពាក់ផ្កាយ និង កូនលោកធំៗ ដែលនៅជួរក្រោយចេញមុខចេញមាត់នោះ ប្រមូលលុយ ប្រមូលលាភ ហើយដេកតែម៉ាស៊ីនត្រជាក់ជាមួយស្រីកំដរ ក៏ឡើងបុណ្យឡើងផ្កាយដែរ។ សារបង្ហោះលើសង្គមហ្វេសប៊ុករបស់លោក សួន សេរីរដ្ឋា ប្រធានគណបក្សអំណាចខ្មែរ បានធ្វើឲ្យដុតរោលក្តៅ ដល់មេបញ្ជាការកងទ័ពខ្មែរពេញទូទាំងប្រទេស កើតទុក្ខមិនសុខចិត្តនូវពាក្យពេចន៍ជេរប្រមាថនោះ។ ដូច្នោះហើយបានជាកម្លាំងរាជរដ្ឋាភិបាល ត្រូវបង្ខំចិត្តស្ទាក់ចាប់ខ្លួនលោក សួន សេរីរដ្ឋា ភ្លាម បើទុកយូរបន្តិចខ្លាចកើតមានអំពើហិង្សាណា មួយ ចេញពីសំណាក់កងកម្លាំងប្រដាប់អាវុធមកពីខាងយោធា ដែលទ្រាំមិនបាននូវសម្ដីអត់គំរបនោះ)៕
ចែករំលែកព័តមាននេះ