បើលេងសុទ្ធតែស្បៃមុងរាប់ពាន់ម៉ែត្រអ៊ីចឹង តើមានពូជត្រីឯណាសេសសល់ឱ្យនេសាទទៀត
ខេត្តកំពង់ចាម ៖ ក្នុងរដូវបិទនេសាទដោយច្បាប់បានហាមមិនឲ្យប្រើប្រាស់នូវឧករណ៏នេសាទខុសច្បាប់នោះទេ
ខេត្តកំពង់ចាម ៖ ក្នុងរដូវបិទនេសាទដោយច្បាប់បានហាមមិនឲ្យប្រើប្រាស់នូវឧករណ៏នេសាទខុសច្បាប់នោះទេ ប៉ុន្តែផ្ទុយទៅវិញមានពលរដ្ឋខិលខូចបាននាំគ្នាដាក់ស្បៃមុងចាប់យកត្រីគ្រប់ប្រភេទក្នុងដែនអតីតឡូត៏នេសាទលេខ១ ស្ថិតនៅឃុំគៀនជ្រៃ ស្រុកកំពង់សៀម ត្រូវបានកម្លាំងសមត្ថកិច្ចចំរុះចុះបង្ក្រាបនៅថ្ងៃទី១២ សីហា ដោយរឹបអូសបានឧបករណ៏ល្មើសច្បាប់ជាច្រើន និងបានចាក់លែងកូនត្រីទៅក្នុងបឹងធម្មជាតិវិញផងដែរ ។
លោក អ៊ុក ណារិន នាយខណ្ឌរដ្ឋបាលជលផលខេត្តប្រាប់ឲ្យដឹងថា ក្រោយពីបានទទួលការណែនាំពីលោក គួច ចំរើន អភិបាលនៃគណៈអភិបាលខេត្ត និងលោក អេង ជាសាន្ត ប្រតិភូទទួលបន្ទុកប្រធានរដ្ឋបាលជលផលនោះនៅថ្ងៃខាងលើរូបលោកបានដឹកនាំកម្លាំងសមត្ថកិច្ចទាំងបីប្រភេទក្នុងនោះមានអាវុធហត្ថ នគរបាល និងទាហាន រួមទាំងលោកអភិបាលរងស្រុកម្នាក់បានចុះទៅកាន់ឃុំគៀនជ្រៃ ក្រោយពីមានសេចក្តីរាយការណ៏ពីកម្លាំងសម្ងាត់មកថា មានដាក់បទល្មើសនេសាទតាមព្រែកដើម្បីចាប់យកត្រីដោយខុសច្បាប់ក្នុងរដូវហាមឃាត់ ។ លោក អ៊ុក ណារិន នាយខណ្ឌរដ្ឋបាលជលផលខេត្តប្រាប់បន្តថា ជាលទ្ធផលក្នុងប្រតិបត្តិការបង្ក្រាបបទល្មើសនេះបានចំនួន៥ករណីរួមមាន ក្នុងនោះលូស្បៃមុងចំនួន៤ករណី, លូស្បៃមុងចំនួន៥១មាត់, របាំងស្បៃមុងប្រវែង១.៣០០ម៉ែត្រ បង្គោលចម្រឹងចំនួន៦៦៩ដើម ចាក់លែងកូនត្រីចំរុះទៅក្នុងបឹងធម្មជាតិវិញទង្ងន់២៦៩គីឡូក្រាម ត្រង់ចំណុចឈើទាលកោង ចុងព្រែកគៀនជ្រៃ ពាមទន្លា ក្រោយភូមិឥន្ទនេល ឃុំគៀនជ្រៃនោះ ។ ស្របពេលជាមួយគ្នានោះក្នុងថ្ងៃទី១២ សីហា ត្រង់ចំណុចឃុំព្រែកកុយស្រុកកងមាស កម្លាំងជលផលខេត្តក៏បានបង្ក្រាបដាយបានចំនួន២មាត់ផងដែរ ។
លោក អ៊ុក ណារិន នាយខណ្ឌរដ្ឋបាលជលផលខេត្តបញ្ជាក់ថា ចាប់តាំងពីរដូវបិទនេសាទរហូតមកដល់ពេលនេះបទល្មើសនេសាទត្រូវបានកម្លាំងជំនាញចុះបង្ក្រាបដោយ មានសហការជាមួយនឹងអាជ្ញាធរមូលដ្ឋានព្រមទាំងកម្លាំងសមត្ថកិច្ចនោះបានសរុបចំនួន២៦ករណីហើយ តែមិនទាន់មានចាប់ពលរដ្ឋណាម្នាក់បញ្ជូនទៅសាលាដំបូងខេត្តឡើយ ។ តែគ្រាន់តែមានលេខមុខពលរដ្ឋខ្លះបានចេញមកតវ៉ាជាមួយនឹងជលផលក្រោយពីជំនាញបានលើកហេតុផលផ្លូវច្បាប់ថា រដូវបិទនេសាទនេះឧបករណ៏ស្បៃមុងច្បាប់បានហាមឲ្យប្រើប្រាស់នោះទេ ហើយក៏បានណែនាំឲ្យពួកគាត់ងាកទៅរករបរនេសាទស្របច្បាប់វិញដើម្បីឲ្យពពួកមច្ឆារជាតិបាននៅគង់វង្សយូរអង្វែងទៅថ្ងៃខាងមុខ ៕
ចែករំលែកព័តមាននេះ