ជះទឹកបាយដាំពុះដាក់ក្បាលប្រពន្ធ ព្រោះមិនឱ្យលុយទៅទិញស្រាផឹក
ខេត្តកណ្ដាល ៖ បុរសម្នាក់បានត្រូវនគរបាលស្រុកកោះធំចាប់ខ្លួនបន្ទាប់ពីលេងល្បែងចាញ់ផឹកស្រាស្រវឹង
ខេត្តកណ្ដាល ៖ បុរសម្នាក់បានត្រូវនគរបាលស្រុកកោះធំចាប់ខ្លួនបន្ទាប់ពីលេងល្បែងចាញ់ផឹកស្រាស្រវឹង មកផ្ទះវិញសុំលុយប្រពន្ធយកទៅទិញស្រាមិនបានយកទឹកបាយកំពុងដាំពុះជះលើក្បាលប្រពន្ធបណ្ដាលឱ្យរលាកលើផ្ទៃមុខ និងក្បាល ។ ហេតុការណ៍នេះកើតឡើងកាលពីវេលាម៉ោង៤រសៀល ថ្ងៃទី១១ សីហា នៅចំណុចទំនប់៣៨ ក្នុងភូមិព្រែកខ្នាច ឃុំលើកដែក ស្រុកកោះធំ ខេត្តកណ្តាល ។
មន្ត្រីនគរបាលស្រុកកោះធំបានឱ្យដឹងថា ជនសង្ស័យត្រូវបានចាប់ខ្លួនឈ្មោះ ខ្លូន ខ្លុង ភេទប្រុស អាយុ៣៤ឆ្នាំ មុខរបរនេសាទ ត្រូវជាប្តី ។ ចំណែកជនរងគ្រោះឈ្មោះ ឃ.ឡ ភេទស្រី មានទីលំនៅ ស្រុកកោះធំ ខេត្តកណ្ដាល មុខរបរនេសាទ រងរបួសរលាកក្បាល និងមុខខាងស្ដាំ ។
តាមប្រភពពីនគរបាលបានឱ្យដឹងបន្ថែមថា នៅមុនពេលកើតហេតុជនសង្ស័យឈ្មោះ ខ្លូន ខ្លុង បានសុំលុយប្រពន្ធ(ជនរងគ្រោះ) ចំនួន ៥.០០០៛ ទៅលេងល្បែងបុកប៊ីយែរួចហើយផឹកស្រាស្រវឹងជោកជាំនៅទីនោះ ។ លុះដល់ពេលកើតហេតុខាងលើក្រោយពីលេងល្បែងចាញ់ និងផឹកស្រាអស់លុយផងនោះជនសង្ស័យក៏បានត្រលប់មកផ្ទះសុំលុយប្រពន្ធថែមទៀត ។ ដោយប្រពន្ធគ្មានលុយឱ្យក៏មានទំនាស់ពាក្យសម្ដីគ្នា ស្រាប់តែជនសង្ស័យបានលើកឆ្នាំងបាយដែលកំពុងដាំពុះនៅលើចង្ក្រានទៅចាក់ដាក់លើក្បាលប្រពន្ធបណ្ដាលឱ្យរងរបួសរលាក ក្បាល និងពេញផ្ទៃមុខខាងស្ដាំ ។
ក្រោយមកជនរងគ្រោះបានដាក់ពាក្យបណ្ដឹងមកកាន់ប៉ុស្ដិ៍រដ្ឋបាលលើកដែកឱ្យជួយអន្តរាគមន៍ ។ បន្ទាប់ពីទទួលបានបណ្ដឹងភ្លាមកម្លាំងនគរបាលប៉ុស្ដិ៍លើកដែកបានចុះដល់កន្លែងកើតហេតុរួចនាំខ្លួនជនសង្ស័យបញ្ជូនទៅកាន់អធិការដ្ឋាននគរបាលស្រុកកោះធំ ដើម្បីកសាងសំណុំរឿងចាត់ការបន្តតាមនីតិវិធី ៕
ចែករំលែកព័តមាននេះ