រាជធានីភ្នំពេញ ៖ ស្ត្រីអាណិកជនខ្មែររស់នៅប្រទេសអូស្ត្រាលីម្នាក់បានទម្លាយពីការបោកប្រាស់ស្នេហា និងលុយរបស់តារាសម្តែង និងដឹកនាំរឿងលោក រចនា ដួង ។ ការទម្លាយនេះតាមហ្វេសប៊ុកកាលពីពេល ថ្មីៗកន្លងមក បន្ទាប់ចំណងស្នេហ៍របស់អ្នកទាំងពីរដាច់ដោច ។
ស្ត្រីរូបនោះបានចោទប្រកាន់លោករចនា ដួង ថាជាប្រុសបោកប្រាស់ស្នេហានាង ដោយនាងបានចំណាយលុយលើរូបលោកច្រើនម៉ឺនដុល្លារអូស្ត្រាលីពេលមកជួបលោកនៅស្រុកខ្មែរ ម្តងៗ ។
ស្ត្រីអាណិកជនខ្មែររស់នៅប្រទេសអូស្ត្រាលីឈ្មោះ Reaksmey Duong បង្ហោះសារតាមហ្វេសប៊ុកថា អ្នកស្រីបានទាក់ទងជាមួយលោករចនា ដួង ២ឆ្នាំគិតចាប់ពីឆ្នាំ២០១៥មក ហើយអ្នកស្រីបានមកស្រុកខ្មែរជួបលោកចំនួន៣ដង។ រូបនាង និងលោករចនា ដួង បានសាងអនុស្សាវរីយ៍ច្រើនជាមួយនឹងការជឿជាក់ចំពោះសម្ព័ន្ធភាពស្នេហាមួយនេះ ។ ប៉ុន្តែជា រឿយៗលោករចនា ដួង បានធ្វើរឿងជាច្រើនដែលអ្នកស្រីមិនពេញចិត្ត ហើយតែងតែចោទមកលើអ្នកស្រីជាមនុស្សដែលមានការប្រចែប្រចណ្ឌច្រើន ។
ដោយសារភាពជឿជាក់អ្នកស្រីបានកាត់ចិត្តឈប់គិត និងកែខ្លួនដើម្បីឱ្យលោករចនា ដួង ដឹងថាអ្នកស្រីពិតជាអាណិត និងចង់ជួយលោកឱ្យដល់ត្រើយ បើទោះបីជាដឹងពីធាតុពិតរបស់លោកអាក្រក់ ក៏អ្នកស្រីព្រមទទួលយកដែរ ។
បើតាមអ្នកស្រី Reaksmey Duong ថារយៈពេលប្រមាណ២ឆ្នាំ អ្នកស្រីបានចំណាយលុយខ្ទង់៥ម៉ឺនដុល្លារអូស្ត្រាលី ក្នុងការឡើងចុះ ហើយនឹងទិញរបស់ជូនលោករចនា ដួង ជាមួយនឹងការចំណាយ ផ្សេងៗទៀត ។ ជាមួយគ្នានេះផងដែរអ្នកស្រីក៏ធ្លាប់បានចេញលុយ ដើម្បីឱ្យលោករចនា ដួង ទៅដោះស្រាយចំពោះតួសម្តែងដែលលោកហៅថតថែមទៀតផង តែទីបំផុតលោកបានចោទអ្នកស្រីថា ជាមនុស្សសំរាមទៅវិញ ។
អ្នកស្រីបានស្នើសុំឱ្យលោករចនា ដួង ចេញមុខសងលុយដែលជំពាក់ជាមួយអ្នកដែលស្គាល់ជាមួយអ្នកស្រី ក្នុងពេលដែលចំណងស្នេហ៍រវាងអ្នកស្រី និងលោករចនា ដួងត្រូវបានកាត់ផ្តាច់គ្មានផ្លូវបកក្រោយ ។
ជុំវិញការចោទប្រកាន់នេះ តួសម្តែងក្នុងបទ «ពុកខ្ញុំជាប៉ូលិសចរាចរណ៍»បានបដិសេធភ្លាមៗ និងអះអាងថា មិនមានរឿងដូចការចោទប្រកាន់របស់ស្ត្រីនោះទេ ។
អ្នកដឹកនាំរឿងលោករចនា ដួង អះអាងប្រាប់សារព័ត៌មានអេឡិចត្រូនិក ក្នុងស្រុកមួយថា លោកមិនបានបោកប្រាស់ដូចការនិយាយរបស់ស្ត្រីនោះឡើយ ប៉ុន្តែលោកសារភាពថា ពិតជាធ្លាប់ទាក់ទងជាមួយនាងពិតប្រាកដមែន ។ ចំនួនទឹកប្រាក់ប្រមាណ៥ម៉ឺនដុល្លារអូស្ត្រាលី គឺស្ត្រីនោះមិនមែនជះមកលើរូបលោកទេ ពោលគឺជាការចំណាយទៅលើការឡើងចុះស្រុកខ្មែរ និងការដើរលេងហូបចុកជាមួយមិត្តភក្តិអ្នកស្រី និងតារាមួយចំនួនដែលស្គាល់គ្នាប៉ុណ្ណោះ ។
លោករចនា ដួង បញ្ជាក់ថា ប្រសិនបើស្ត្រីនោះពិតជាបានផ្តល់លុយចំនួន៥ម៉ឺនដុល្លារមែននោះ មិនមែនរូបលោកមានជីវភាពដូចសព្វថ្ងៃ ដោយជួលផ្ទះគេនៅទេ ។ ចំពោះលុយជាង៣ពាន់ដុល្លារដែលបានមកពីស្ត្រីនោះ លោកក៏មានគម្រោងសងទៅវិញដែរ តែនាងមិនឱ្យសង ទើបនៅជំពាក់រហូតដល់សព្វថ្ងៃ ។
ការបកស្រាយរបស់លោករចនា ដួង នេះអ្នកស្រីReaksmey Duong បានឆ្លើយតបទៅវិញថា«នាងខ្ញុំមិនបានថាលោកបោកប្រាក់ខ្ញុំដល់៥ម៉ឺនដុល្លារនោះទេ មុននឹងលោកធ្វើការបកស្រាយសូមចូលអាននូវអ្វីដែលខ្ញុំបានសរសេរផង ។ ចំពោះអ្នកដែលគេយល់គេអានទៅគេដឹងហើយថា ខ្ញុំចង់បានន័យថា តាំងពីខ្ញុំបានស្គាល់មានការទាក់ទងគ្នាមក គឺខ្ញុំចំណាយអស់៥ម៉ឺនដុល្លារទាំងការឡើងចុះស៊ីចាយ ហើយផ្ញើជូនគាត់ និងទិញរបស់ឲ្យគាត់ ផ្ញើលុយជួយបងប្អូនពេលបងប្អូនចូលពេទ្យ ។
ទីបញ្ចប់ខ្ញុំសូមបញ្ជាក់ថា បើលោក និងខ្ញុំគ្មានទំនាក់ទំនងនឹងគ្នាទេ ខ្ញុំក៏គ្មានពេលចុះទៅរកលោកដែរ ហើយលោកក៏មិនចោលការងារមករកខ្ញុំដែរ សំខាន់បំផុតមុនខ្ញុំចុះទៅតើលោកមានពេលទំនេរ រួចការងារឬនៅ ?
នៅទីបញ្ចប់ខ្ញុំគ្រាន់តែចង់ឱ្យលោកយកលុយ១ម៉ឺនដុល្លារ ដែលលោកបានជំពាក់គេទៅសងគេវិញផង ព្រោះយើងលែងមានទំនាក់ទំនងនឹងគ្នាហើយ ខ្ញុំសុំដកខ្លួនមិនដឹង មិនឮ» ៕
ចែករំលែកព័តមាននេះ