ដោយសារថ្នាំញៀន កូនរៀបគម្រោងធ្វើស៊ីឪពុកម្តាយខ្លួនឯង
ខេត្តបាត់ដំបង ៖ ការិយាល័យបទល្មើសព្រហ្មទណ្ឌខេត្តបាត់ដំបង បង្ក្រាបករណីឆបោក នៅវេលាម៉ោង១០ ថ្ងៃទី១១ សីហា
ខេត្តបាត់ដំបង ៖ ការិយាល័យបទល្មើសព្រហ្មទណ្ឌខេត្តបាត់ដំបង បង្ក្រាបករណីឆបោក នៅវេលាម៉ោង១០ ថ្ងៃទី១១ សីហា ក្នុងមូលដ្ឋានស្រុកបវេល បានទទួលបណ្តឹងឈ្មោះ ប៉ាវ វ៉ាន់ ភេទប្រុស អាយុ៣៨ឆ្នាំ មុខរបរបុគ្គលិកអង្គការជីវិតថ្លៃថ្នូ រស់នៅភូមិស្ទឹងដាច់ ឃុំបវេល ស្រុកបវេល ខេត្តបាត់ដំបង ប្តឹងទៅលើជនមិនស្គាល់សាវតារពីបទបង្ខាំងកូនខ្លួនជំរិតទារប្រាក់ ។
ដោយកូនរបស់ខ្លួនបាត់ចេញពីផ្ទះកាលពីថ្ងៃទី០៨ សីហា ទៅកាត់សក់ រួចបាត់ខ្លួនរហូតមក ។ លុះម៉ោងប្រហែល០៩និង៣០នាទី ថ្ងៃទី១១ សីហា ក៏មានលេខទូរស័ព្ទមួយខ្សែបានទូរស័ព្ទមកលេខខ្លួន ជំរិតទារប្រាក់ចំនួន៥០០ដុល្លារដោយឲ្យផ្ញើប្រាក់តាមវីង បើមិនបានប្រាក់គ្រប់ចំនួនទេនឹងសម្លាប់កូនរបស់ខ្លួនឈ្មោះ ដេត សុវណ្ណបូរិទ្ធ ភេទប្រុស អាយុ១៧ឆ្នាំ មុខរបរសិស្សសាលា ចោល ។
ក្នុងពេលជំរិតទារប្រាក់នោះ ខ្លួនបានឮសម្លេងកូនរបស់ខ្លួនស្រែកឲ្យជួយតាមទូរស័ព្ទ ។ បន្ទាប់ពីបានទទួលបណ្តឹងកម្លាំងអាវុធហត្ថស្រុក បានចុះតាមគោលដៅវីង ក៏ប្រទះឃើញជនសង្ស័យឈ្មោះ ម៉ាន់ វណ្ណា ហៅអុល ភេទប្រុស អាយុ២០ឆ្នាំ មុខរបររត់ម៉ូតូឌុប រស់នៅភូមិព្រៃទទឹង១ ឃុំបវេល ស្រុកបវេល ជិះម៉ូតូមួយគ្រឿងម៉ាក ហុងដាC១២៥ ពណ៌ខ្មៅ ស៊េរីឆ្នាំ២០១២ ពាក់ស្លាកលេខ បាត់ដំបង ១Q-២៨៤០ ពីនាក់កូនជនរងគ្រោះ មកបើកប្រាក់នៅកន្លែងវីង ស្ថិតនៅភូមិដាច់ព្រ័ត ឃុំបវេល ស្រុកបវេលខេត្តបាត់ដំបង នៅវេលាម៉ោង១២និង៣០នាទី ថ្ងៃទី១១ សីហា នោះកម្លាំងអាវុធហត្ថស្រុកក៏ធ្វើការឃាត់ខ្លួនទាំងពីរនាក់តែម្តង រួមទាំងដកហូតទូរស័ព្ទចំនួនពីរគ្រឿង, ម៉ូតូមួយគ្រឿង, ប្រាក់ដុល្លារ១០០ដុល្លារ ជាប្រាក់ជនរងគ្រោះផ្ញើឲ្យ ។
ពេលស្តាបចម្លើយជនសង្ស័យបានឆ្លើយសារភាពថា មានមេខ្លោងម្នាក់ទៀតឈ្មោះ សោម ស៊ីណុច នាំពួកគេឲ្យធ្វើដូច្នេះ ដើម្បីឆបោកប្រាក់ឪពុកគេយកទៅទិញគ្រឿងញៀនជក់ ។ ក្រោយធ្វើសកម្មភាពឈ្មោះ ណុច បានរត់គេចខ្លួន ។ បច្ចុប្បន្នជនសង្ស័យចំនួនពីរនាក់កំពុង ឃាត់ខ្លួននៅអាវុធហត្ថស្រុក ដើម្បីក៏សាងសំណុំរឿងចាត់ការតាមនីតិវិធី ៕
ចែករំលែកព័តមាននេះ