ខេត្តបាត់ដំបង ៖ ប្រភពពីសមត្ថកិច្ចបានឱ្យដឹងបន្តនាព្រឹកថ្ងៃទី១២ សីហា ថា ក្រោយពីលោកនួន សាន ព្រះរាជអាជ្ញាអមសាលាដំបូងខេត្ត បានដឹកនាំកម្លាំងចម្រុះចុះសួរនាំជាថ្មី ដើម្បីស្វែងរកមូលហេតុពិត ដែលនាំឱ្យកើតមានអគ្គិភ័យឆេះឃ្លាំងស្ដុកប្រេងនៅក្នុងស្ថានីយប្រេងឥន្ធន:L.H.R ផ្អើលក្រុងបាត់ដំបង កាលពីព្រឹកថ្ងៃទី១១ សីហា នោះ ជាលទ្ធផលជំហានដំបូង ត្រូវបានគេសង្ស័យថា អាចបង្កើតឡើងដោយអ្នកគ្រប់គ្រងស្ថានីយប្រេងឈ្មោះថន មីដា ដែលដួលសន្លប់នេះតែម្ដង ដែលអាចពាក់ព័ន្ធនឹងការជំពាក់ប្រាក់ក្រុមហ៊ុនប្រេង ។
ប្រភពដដែលឱ្យដឹងទៀតថា ជុំវិញការអះអាងរបស់បុគ្គលិកស្ថានីយប្រេងនេះថា អគ្គិភ័យនេះ អាចបណ្ដាលមកពីការទុស្សេខ្សែចរន្តអគ្គិសនីនោះ គឺមិនមែនជាការពិតទេ ។ ព្រោះបុគ្គលិកអគ្គិសនីដែលចូលរួមចុះទៅត្រួតពិនិត្យទីតាំងកើតហេតុ ជាមួយកម្លាំងចម្រុះ ដែលដឹកនាំដោយលោកព្រះរាជអាជ្ញាផងនោះបានរកឃើញថា ឃ្លាំងស្ដុកប្រេងនោះមិនមានតខ្សែចរន្តអគ្គិសនីចូលទេ មានតែខ្សែកាមេរ៉ាសុវត្ថិភាព ហើយខ្សែកាមេរ៉ាសុវត្ថិភាពនេះ ក៏មិនអាចបង្កជាអគ្គិភ័យបានដែរ។ ដូច្នេះ អគ្គិភ័យដែលឆេះឃ្លាំងស្ដុកប្រេងក្នុងស្ថានីប្រេង L.H.R នេះ អាចមានអ្នកបង្កើតឡើង ។
មន្ត្រីជំនាញបានប្រាប់ទៀតថា ក្រោយពីធ្វើការស្រាវជ្រាវអស់រយៈពេលជាច្រើនម៉ោង ដែលមានការបំភ្លឺពីសាក្សីផង កម្លាំងចម្រុះបានដាក់ការសង្ស័យទៅលើឈ្មោះថន មីដា អ្នកគ្រប់គ្រងស្ថានីប្រេងL.H.R នេះ គឺជាអ្នកបង្កើតឱ្យមានអគ្គិភ័យ ។ មន្ត្រីដដែលបានបញ្ជាក់ថា ក្រោយពីបង្កឱ្យមានអគ្គិភ័យកើតឡើង អ្នកគ្រប់គ្រងឈ្មោះថន មីដា បានធ្វើជាចូលទៅពន្លត់ភ្លើង រហូតរត់ទៅដួលសន្លប់ ក្រោមដើមស្វាយក្បែរនោះ ដោយសារពុលផ្សែង ហើយត្រូវសមត្ថកិច្ចដឹកទៅកាន់មន្ទីរពេទ្យភ្លាមៗដែរ ។
បើតាមសមត្ថកិច្ចដែលចុះស្រាវជ្រាវបានបង្ហើបឱ្យដឹងថា ឈ្មោះថន មីដា នេះ នៅជំពាក់ប្រាក់ក្រុមហ៊ុនប្រេងជាច្រើនបុង ដែលអាចចំនួនរាប់ម៉ឺនដុល្លារមិនព្រមសង ។ ហើយនៅព្រឹកថ្ងៃកើតហេតុ ខាងក្រុមហ៊ុនប្រេងបានមកទារលុយនេះ តែមិនទាន់ធ្វើដំណើរមកដល់ផង ក៏ស្រាប់តែមានកើតអគ្គិភ័យឆេះឃ្លាំងស្ដុកប្រេងរបស់ឈ្មោះថន មីដា នេះតែម្ដង ។ ដូច្នេះ គេសង្ស័យការឆេះឃ្លាំងប្រេងនេះ អាចជាប់ពាក់ព័ន្ធប្រាក់ជំពាក់នេះ ។
ទោះបីជាយ៉ាងណា បើតាមមន្ត្រីការិយាល័យនគរបាលព្រហ្មទណ្ឌកំរិតធ្ងន់នៃស្នងការខេត្តបានឱ្យដឹងថា លោកនួន សាន ព្រះរាជអាជ្ញាអមសាលាដំបូងខេត្ត និងលោកស្នងការខេត្តបានសម្រេចបញ្ជាឱ្យឃាត់ខ្លួនឈ្មោះថន មីដា អាយុ២៨ឆ្នាំ ជាអ្នកគ្រប់គ្រងស្ថានីយប្រេង L.H.R នេះហើយ កាលពីល្ងាចថ្ងៃទី១១ សីហា ដើម្បីសួរនាំបន្ត ក្រោយជននេះដឹងខ្លួនវិញនៅឯមន្ទីរពេទ្យ ហើយពេលកំពុងឃុំខ្លួនបណ្ដោះអាសន្ននៅក្នុងស្នងការខេត្ត ដើម្បីរងចាំចំណាត់ការបន្តពីតុលាការ ។
ចែករំលែកព័តមាននេះ