ខេត្តកំពង់ស្ពឺ ៖ កូនប្រុសអកត្តញ្ញូម្នាក់ដល់ថ្នាក់គំរាមសម្លាប់ឪពុកម្តាយ បើរកលុយឱ្យចាយមិនបាន ទីបំផុតកូនប្រុសរូបនេះ ត្រូវបានសមត្ថកិច្ចចាប់ខ្លួន ក្រោយធ្វើសកម្មភាពបំផ្លាញនិងវាយប្អូនប្រុសយកម៉ូតូទៅលក់ ដោយសមត្ថកិច្ចបានកសាងសំណុំរឿងបញ្ជូនទៅកាន់ការិយាក័យជំនាញចាត់ការបន្ត ។ ករណីហិង្សាដណ្តើមយកម៉ូតូពីប្អូនទៅលក់នេះ កើតឡើងកាលពីវេលាម៉ោង០២រសៀលថ្ងៃទី១១ សីហា ស្ថិតនៅភូមិត្រពាំងខ្យង ឃុំទួលអំពឹល ស្រុកបសេដ្ឋ ខេត្តកំពង់ស្ពឺ ។
ប្រភពឱ្យដឹងថា ជនសង្ស័យខាងលើឈ្មោះលី គឹមស្រស់ អាយុ២០ឆ្នាំ ។ បើតាមសាច់ញាតិជនថា ជនសង្ស័យបានចាប់វាយប្អូនបង្កើតឱ្យសន្លប់ ហើយដណ្តើមយកម៉ូតូពីប្អូនប្រុសយកទៅលក់ ដើម្បីយកលុយស៊ីចាយ និងជក់ថ្នាំញៀន ។ ជននេះ តែងបង្ករឿងជារឿយៗ និងបំផ្លាញទ្រព្យសម្បត្តិក្នុងផ្ទះជាច្រើនដង តែដោយយល់ថាជាបងប្អូនជាប់សាច់ឈាម ទើបចេះតែអនុគ្រោះម្តងជា២ដង ។
តែលើកនេះ ទ្រាំមិនបាន ក៏ប្តឹងឱ្យសមត្ថកិច្ចចាប់ខ្លួនតែម្តង ។ នៅចំពោះមុខសមត្ថកិច្ច ជនសង្ស័យបានសារភាពថា ដោយសារតែខូចចិត្តរឿងប្រពន្ធលែងលះ ទើបហៅគ្នីគ្នាជក់ថ្នាំញៀន ដើម្បីបន្លប់ទុក្ខ ។
ចែករំលែកព័តមាននេះ