ការកើនឡើងនៃតម្រូវការសកល បានធ្វើឲ្យតម្លៃលក់ដុំរបស់ប័រកើនឡើងជិតទ្វេដងក្នុងទ្វីបអឺរ៉ុប ។ អតិថិជនបានចំណាយកាន់តែច្រើនផងដែរ ។ យោងតាមទិន្នន័យពី Euromonitor ឲ្យដឹងថា តម្លៃលក់រាយបានកើនឡើងជិត២០% ក្នុងខែមិថុនា បើធៀបនឹងឆ្នាំមុន ។
សហព័ន្ធ Federation des Entrepreneurs de la Boulangerie តំណាងចុងភៅធ្វើនំរបស់ប្រទេសបារាំង និយាយថា ស្ថានការណ៍នេះ គឺជាវិបត្តិដ៏ធំមួយ ។ ពួកគេបានព្រមានពីតម្លៃនំ croissant, tart និង brioche អាចនឹងកើនឡើងផងដែរ ។ ពួកគេនិយាយក្នុងសេចក្តីថ្លែងការណ៍ថា ៖« តម្លៃប័រមិនដែលកើនដល់កម្រិតនេះពីមុនមកទេ ។ កង្វះខាតប័រ គឺជាការគំរាមកំហែងមួយនៅចុងឆ្នាំនេះ » ។
មានកត្តាជាច្រើនដែលធ្វើឲ្យតម្លៃប័រកើនឡើងយ៉ាងខ្លាំងដូច្នេះ ដូចជា ការប្រើប្រាស់ប័រកើនឡើង ព្រោះតម្រូវការក្នុងប្រទេសមួយចំនួនកើនឡើង ដូចជាចិន ហើយអតិថិជនមួយចំនួនបានត្រឡប់មកទទួលទានប័រវិញ បន្ទាប់ពីរកឃើញថា វាមិនបង្កឲ្យមានជំងឺបេះដូងទេ ។ ជាមួយគ្នានេះ ផលិតកម្មប័រនៅអឺរ៉ុបបែរជាធ្លាក់ចុះទៅវិញ ។
លោក Raphael Moreau អ្នកវិភាគចំណីអាហារក្នុង Euromonitor និយាយថា អតិថិជនចាប់ផ្តើមប្រើប្រាស់ផលិតផលបែបធម្មជាតិ និងមិនបានឆ្លងកាត់ការកែច្នៃច្រើន ក្នុងនោះមានប័រជាដើម ។
ជាមួយគ្នានេះ តម្រូវការផលិតផលធ្វើពីទឹកដោះគោក្នុងប្រទេសចិន ក៏កំពុងកើនឡើងផងដែរ។ ក្រសួងកសិកម្មសហរដ្ឋអាមេរិកព្យាករថា ការនាំចូលទឹកដោះគោក្នុងប្រទេសចិន នឹងកើនឡើងប្រមាណ៣៨%ក្នុងឆ្នាំនេះ ដែលភាគច្រើននាំមកពីសហភាពអឺរ៉ុប និងនូវែលសេឡង់។ ក្រសួងនេះក៏បានព្យាករថា ការទទួលទានប័រក្នុងពិភពលោក នឹងកើនឡើង៣%បន្ថែមទៀតនៅឆ្នាំនេះ ។
ជាមួយគ្នានេះ ការសិក្សានាពេលថ្មីៗបង្ហាញថា ការទទួលទានប័រមិនប៉ះពាល់ខ្លាំងដល់សុខភាព ដូចដែលធ្លាប់បានគិតថា វាអាចបង្កឲ្យមានជំងឺបេះដូងឡើយ ។
លើសពីនេះ កាលពីឆ្នាំ២០១៤ ប្រទេសរុស្ស៊ីបានដាក់ទណ្ឌកម្មសេដ្ឋកិច្ចលើចំណីអាហារនាំមកពីអឺរ៉ុប ដើម្បីសងសឹកនឹងការដាក់ទណ្ឌកម្មលើខ្លួន ព្រោះតែបញ្ហាប្រទេសអ៊ុយក្រែន ។ រុស្ស៊ីបាននាំចូលប័រ២៤%ពីសហភាពអឺរ៉ុប ។ ការដាក់ទណ្ឌកម្មនេះ បានធ្វើឲ្យតម្លៃទឹកដោះគោនៅសហភាពអឺរ៉ុបធ្លាក់ចុះដល់កម្រិតទាបជាងទឹកបរិសុទ្ធទៅទៀត ។
ហេតុនេះ កសិករជាច្រើនបានក្ស័យធុន ដោយមានកសិដ្ឋានប្រមាណ១ពាន់កន្លែងនៅចក្រភពអង់គ្លេសបញ្ឈប់ផលិតកម្ម ៕
ចែករំលែកព័តមាននេះ