ខេត្តមណ្ឌលគិរី ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញដល់ប្រជាកសិករទាំងអស់ ជាពិសេស ប្រជាកសិករនៅក្នុងខេត្តមណ្ឌលគិរី ត្រូវពង្រីកផ្ទៃដីដាំដុះដំណាំដំឡូងបារាំងបន្ថែមទៀត ជៀសវាងការនាំចូលពីបរទេស ។
លោករដ្ឋមន្ត្រី វេង សាខុន បានថ្លែងបែបនេះកាលពីថ្ងៃទី៨ សីហា ក្នុងឱកាសដែលលោកអញ្ជើញចូលរួមក្នុងពិធីប្រារព្ធទិវាចម្ការបង្ហាញពីផលិតកម្មដំណាំដំឡូងបារាំង នៅមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី ។
លោករដ្ឋមន្ត្រីថ្លែងបន្ដថា ៖« ការប្រារព្ធទិវានេះឡើង គឺដើម្បីឲ្យបងប្អូនកសិករយើងបានឃើញ និងយល់ដឹងកាន់តែច្បាស់អំពីបច្ចេកទេសដាំដុះដំទ្បូងបារាំង សម្រាប់យកទៅពិចារណាពង្រីកផលិតកម្មរបស់ខ្លួន ។ ម្យ៉ាងទៀត កម្ពុជាបាននាំចូលដំឡូងបារាំងជាង៥ពាន់តោនក្នុង១ឆ្នាំៗ » ។
ក្នុងគោលបំណងកាត់បន្ថយការនាំចូលទាំងស្រុង រដ្ឋមន្ត្រីក្រសួងកសិកម្មបានផ្តល់នូវអនុសាសន៍មួយចំនួនដល់អ្នកពាក់ព័ន្ធទាំងអស់ថា មជ្ឈមណ្ឌលស្រាវជ្រាវដំទ្បូងបារាំង របស់សាកលវិទ្យាល័យភូមិន្ទកសិកម្ម ត្រូវខិតខំសិក្សាពិសោធន៍ស្រាវជ្រាវរកឱ្យឃើញនូវពូជដំទ្បូងបារាំងមានលក្ខណៈសមស្របបំផុតសម្រាប់លក្ខខណ្ឌប្រទេសកម្ពុជាយើង ដែលវាផ្តល់នូវទិន្នផលខ្ពស់ គុណភាពល្អ រសជាតិឆ្ងាញ់ ហើយត្រូវនឹងតម្រូវការទីផ្សារ ។
មន្ទីរកសិកម្ម រុក្ខាប្រមាញ់ និងនេសាទខេត្តនានា ដែលមានសក្តានុពលធនធានដីសមស្របដើម្បីបញ្ចូលបច្ចេកទេសផលិតកម្មដំណាំដំទ្បូងបារាំងនេះ ត្រូវបន្តពង្រីកការសិក្សាស្រាវជ្រាវ ថែរក្សាការស្តុកទុកដំទ្បូងបារាំងក្រោយពេលប្រមូលផលសម្រាប់បម្រើទីផ្សារនៅរដូវខ្វះខាត។
មន្ទីរកសិកម្ម រុក្ខាប្រមាញ់ និងនេសាទ ត្រូវផ្សព្វផ្សាយពីបច្ចេកទេសដាំដុះដល់កសិករនៅក្នុងមូលដ្ឋានរបស់ខ្លួន ព្រមទាំងរកគ្រប់មធ្យោបាយជួយដល់កសិករ ដើម្បីដោះស្រាយរាល់ហានិភ័យទាំងទ្បាយដែលពួកគាត់ជួបប្រទះ ។
ជាងនេះទៀត រដ្ឋមន្ត្រីក្រសួងកសិកម្មបានណែនាំដល់បងប្អូនកសិករទាំងអស់ត្រូវមានភាពឆ្លាតវៃក្នុងការក្តាប់ឱកាសទីផ្សារកសិកម្មឱ្យបានជាប់ជាប្រចាំ ជាពិសេស គួរជំរុញការដាំដុះមុខដំណាំណាដែលបានតម្លៃថ្លៃ ឬដំណាំនាំចូលជាដើម ។ ម្យ៉ាងទៀត ក៏ត្រូវមានទំនាក់ទំនងជិតស្និទ្ធជាមួយអ្នកបញ្ជាទិញ ឬអ្នកកែច្នៃ ចៀសវាងការផលិតបានហើយគ្មានទីផ្សារ ឬច្រើនលើសពីសេចក្តីត្រូវការទៅវិញ ។
លោក ជាង ហុង ព្រឹទ្ធបុរសមហាវិទ្យាល័យកសិកម្ម តំណាងសាកលវិទ្យាធិការនៃសាកលវិទ្យាល័យភូមិន្ទកសិកម្ម បានបញ្ជាក់ថា គម្រោងនេះមានរយៈពេល៣ឆ្នាំ ដោយកំណត់លើគោលការណ៍៣ គឺ ៖
១-សិក្សាស្រាវជ្រាវពូជក្នុងស្រុក ។
២-សិក្សាស្រាវជ្រាវពូជនាំចូលដែលផ្សាំ និងក្សេត្របរិស្ថាននៃខេត្តនេះ ។
៣-ផ្សព្វផ្សាយ និងជំរុញលើកទឹកចិត្តឲ្យដាំដំឡូងបារាំង ដើម្បីកាត់បន្ថយការនាំចូល ៕
ចែករំលែកព័តមាននេះ