ប្រពន្ធខលរកប្ដីច្រើនដងមិនលើក គាស់បន្ទប់មើលស្រាប់តែ…
រាជធានីភ្នំពេញ ៖ បុរសជាមេការផ្ទះសំណាក់ម្មាក់បានដេកស្លា.ប់នៅក្នុងបន្ទប់ផ្ទះសំណាក់មួយកន្លែង ហើយត្រូវបានស្ត្រីជាប្រពន្ធប្រទះឃើញ បង្កឲ្យមានការភ្ញាក់ផ្អើល
រាជធានីភ្នំពេញ ៖ បុរសជាមេការផ្ទះសំណាក់ម្មាក់បានដេកស្លាប់នៅក្នុងបន្ទប់ផ្ទះសំណាក់មួយកន្លែង ហើយត្រូវបានស្ត្រីជាប្រពន្ធប្រទះឃើញ បង្កឲ្យមានការភ្ញាក់ផ្អើល កាលពីវេលាម៉ោង៧ និង៣០នាទីព្រឹក ថ្ងៃទី១០ ខែសីហា ឆ្នាំ២០១៧នែះ នៅក្នុងបន្ទប់លេខ៧ ផ្ទះជួលមួយដែលមានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ បុរសដែលជាជនរងគ្រោះរូបនោះ ឈ្មោះ ឆេង ណាល់ អាយុ៣៤ឆ្នាំ ជាមេការផ្ទះសំណាក់មួយកន្លែងនៅក្នុងសង្កាត់ភ្នំពេញថ្មី ខណ្ឌសែនសុខ មានប្រពន្ធឈ្មោះ អ៊ី សាមុន អាយុ៣១ឆ្នាំ មុខរបរកម្មការិនីរោងចក្រកាត់ដេរ និងមានស្រុកកំណើតនៅក្នុងភូមិព្រៃដំរី ឃុំព្រៃឈរ ស្រុកកំពង់ត្របែក ខេត្តព្រៃវែង។
តាមប្រភពព័ត៌មានបានឲ្យដឹងថា កាលពីវេលាយប់ថ្ងៃទី៩ ខែសីហា មុនពេលកើតហេតុ ស្ត្រីជាប្រពន្ធបានទៅធ្វើការវេនយប់ ចំណែកបុរសនោះបានដេកនៅក្នុងបន្ទប់ផ្ទះជួលខាងលើតែម្នាក់ឯងប៉ុណ្ណោះ គ្មានអ្នកដេកជាមួយឡើយ ហើយមិនមាននរណាបានដឹងថាគាត់មានរឿងអ្វីកើតឡើងនោះឡើយ។ លុះដល់ព្រឹកថ្ងៃកើតហេតុប្រពន្ធបានខលរកប្ដីតាមទម្លាប់ដូចរាល់ដងស្រាប់តែខលមិនលើកទាល់តែសោះ ដែលជាហេតុធ្វើឲ្យនាងមានការងឿងឆ្ងល់យ៉ាងខ្លាំង ហើយក្រោយពេលចេញពីធ្វើការនាងបានប្រញាប់ប្រញាល់ត្រលប់ទៅកាន់បន្ទប់ជួល និងបានស្រែកហៅប្ដីផងព្រមទាំងគោះទ្វារផង ប៉ុន្តែមិនបានឮមាត់ប្ដីឆ្លើយ និងបើកទ្វារឲ្យឡើយ ទើបនាងឲ្យអ្នកជិតខាងជួយគាស់ទ្វារមើល ឃើញប្ដីស្លាប់បាត់ទៅហើយ។
ប្រភពដដែលបានបន្តទៀតថា ខណៈនោះនាងជាប្រពន្ធមានការតក់ស្លុតយ៉ាងខ្លាំងស្ទើរគាំងបេះដូងស្លាប់តាមប្ដីទៅហើយ និងបានស្រែកទ្រហ៊ោយំបង្កឲ្យមានការភ្ញាក់ផ្អើលយ៉ាងខ្លាំង ហើយបានរាយការណ៍ជូនកម្លាំងនគរបាលប៉ុស្ដិ៍ចោមចៅចុះទៅកាន់ទីនោះ ធ្វើការពិនិត្យជាក់ស្ដែង និងធ្វើរបាយការណ៍ និងធ្វើកំណត់ហេតុជាក់ស្ដែង ហើយនគរបាលបានសន្និដ្ឋានថា ជនរងគ្រោះស្លាប់ដោយជំងឺគាំងបេះដូង បន្ទាប់មកនគរបាលបានប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណីរនៅស្រុកកំណើត៕
ចែករំលែកព័តមាននេះ