មុខសញ្ញាចោរគាស់បន្ទប់ជួលម្នាក់ ត្រូវពលរដ្ឋចាប់វាយទ្រមខ្លួន
រាជធានីភ្នំពេញ ៖ ប្រជាពលរដ្ឋបានធ្វើការចាប់ខ្លួនយុវជនម្នាក់ ដែលមានការសង្ស័យថាជាមុខសញ្ញាចោរ គាស់បន្ទប់ដែលកម្មករ កម្មការិនី
រាជធានីភ្នំពេញ ៖ ប្រជាពលរដ្ឋបានធ្វើការចាប់ខ្លួនយុវជនម្នាក់ ដែលមានការសង្ស័យថាជាមុខសញ្ញាចោរ គាស់បន្ទប់ដែលកម្មករ កម្មការិនី រោងចក្រកាត់ដេរជួលស្នាក់នៅ ប៉ុន្តែខណៈនោះនៅមិនទាន់យកបានអ្វីនៅឡើយទេ ហើយក្រោយពេលចាប់បានពួកគាត់នាំគ្នាវាយ បណ្ដាលឲ្យរងរបួសបែកក្បាលហូរឈាមជោគខ្លួន និងទ្រមខ្លួនទើបនាំទៅប្រគល់ឲ្យនគរបាលប៉ុស្តិ៍ចោមចៅ នាំយកទៅធ្វើការសួរនាំ និងកសាងសំណុំរឿងដើម្បីចាត់ការតាមផ្លូវច្បាប់។ ហេតុការណ៍នេះបានកើតឡើង កាលពីវេលាម៉ោង៩ និង១០នាទីព្រឹក ថ្ងៃទី១០ ខែសីហា ឆ្នាំ២០១៧ នៅចំណុចផ្ទះជួលមួយកន្លែង ដែលមានទីតាំងស្ថិតនៅខាងក្រោយរោងចក្រកាត់ដេរ QMI ភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យម្នាក់នោះឈ្មោះ ឌី បឿ អាយុ១៨ឆ្នាំ ស្នាក់នៅក្នុងភូមិកើតហេតុខាងលើ មានស្រុកកំណើតនៅក្នុងភូមិត្រពាំងត្រយឹង ឃុំចំបក់ ស្រុកបាទី ខេត្តតាកែវ។ តាមប្រភពព័ត៌មានបានឲ្យដឹងថា នៅមុនពេលកើតហេតុ យុវជនសង្ស័យរូបនោះបានដើរចូលម្ដុំផ្ទះជួលខាងលើ ក្នុងបំណងធ្វើសកម្មភាពគាស់បន្ទប់ផ្ទះជួលដែលកម្មកររោងចក្រកាត់ដេរ ដែលក្នុងពេលនោះម្ចាស់បន្ទប់មិនបានៅឡើយ ព្រោះជាប់រវល់ទៅធ្វើការបាត់អស់។
ដោយមានការសង្ស័យ ព្រោះមិនដែលធ្លាប់ឃើញ និងមិនមែនជាមនុស្សដែលជួលផ្ទះស្នាក់នៅទីនោះផង ហើយម្យ៉ាងទៀតកន្លងមកធ្លាប់មានករណីគាស់បន្ទប់លួចទ្រព្យសម្បត្តិជាញឹកញាប់ផងនោះ ប្រជាពលរដ្ឋក៏បានតាមឃ្លាំមើល ពេលនោះជនសង្ស័យបានឡើងទៅលើជាន់ទី១ និងបានធ្វើសកម្មភាពឆ្គឹះសោបន្ទប់ តែមិនទាន់បានលួចយកបានអ្វីនៅឡើយទេ ក៏ត្រូវប្រជាពលរដ្ឋនាំគ្នាឡោមព័ទ្ធចាប់បាន រួចបានព្រួតគ្នាវាយម្នាក់១ដៃ១ជើងរហូតបែកក្បាលហូរឈាមស្រោចមុខ បន្ទាប់មកបានប្រគល់ឲ្យនគរបាលប៉ុស្តិ៍ចោមចៅសួរនាំ និងចាត់ការតាមច្បាប់៕
ចែករំលែកព័តមាននេះ