កូរ៉េខាងជើង-អាមេរិក ៖ យោងតាមទីភ្នាក់ងារព័ត៌មានផ្លូវការកូរ៉េខាងជើង KCNA ថា ក្រុងព្យុងយ៉ាងប្រកាសពីចេតនាអនុវត្តផែនការវាយប្រហារដោយមីស៊ីលប្រឆាំងបណ្តាមូលដ្ឋានយោធាអាមេរិកនៅកោះហ្គាម ចាប់ពីពាក់កណ្តាលខែសីហានេះទៅ ។
KCNA ដែលដកស្រង់របាយការណ៍របស់ឧត្តមសេនីយ៍ KIM RAK GYOM មេបញ្ជាការកងកម្លាំងយុទ្ធសាស្ត្ររបស់ប្រទេសរាយការណ៍នាថ្ងៃទី៩ សីហា ថា ក្រុងព្យុងយ៉ាងនឹងអនុវត្តផែនការវាយប្រហារដោយមីស៊ីលបាលីស្ទិកយុទ្ធសាស្ត្ររយៈមធ្យម ឬរយៈឆ្ងាយ HWASONG-12 ប្រឆាំងបណ្តាមូលដ្ឋានយោធាអាមេរិក ស្ថិតនៅលើកោះហ្គាមក្នុងមហាសមុទ្រប៉ាស៊ីហ្វិក ចាប់ពីពាក់កណ្តាលខែសីហានេះទៅ រួចផែនការនេះនឹងដាក់ជូនអគ្គមេបញ្ជាការជាន់ខ្ពស់លោកគីម ជុងអ៊ុន ។
ឧត្តមសេនីយ៍រូបនេះគូសបញ្ជាក់ថា បណ្តាមីស៊ីល HWASONG-12 ដែលបាញ់ចេញ ដោយកងកម្លាំងយុទ្ធសាស្ត្រកូរ៉េខាងជើង នឹងហោះហើរកាត់ពីលើទីក្រុងស៊ីម៉ាន ក្រុងហ៊ីរ៉ូស៊ីម៉ា និងក្រុងកូអីុជី របស់ជប៉ុន ។ មីស៊ីលនឹងហោះក្នុងចម្ងាយ៣៣៥៦,៧គីឡូម៉ែត្រ រយៈពេល១.០៦៥វិនាទី គឺប្រមាណ១៨នាទី ហើយនឹងធ្លាក់ក្នុងមហាសមុទ្រចម្ងាយត្រឹម៣០ ឬ៤០គីឡូម៉ែត្រប៉ុណ្ណោះ គឺកោះហ្គាម ។
អាជ្ញាធរយោធាកូរ៉េខាងជើងថ្លែងនាព្រឹកថ្ងៃទី១០ សីហា ថា ខ្លួនកំពុងពិនិត្យសម្រាប់ការបាញ់មីស៊ីលបាលីស្ទិករយៈមធ្យម៤គ្រាប់ ទៅកាន់ជុំវិញកោះហ្គាម ។ មេបញ្ជាការកងកម្លាំងយុទ្ធសាស្ត្រកូរ៉េខាងជើងនិយាយថា កងកម្លាំងយុទ្ធសាស្ត្រគ្រោងបាញ់មីស៊ីល បាលីស្ទិករយៈមធ្យម៤គ្រាប់ដំណាលៗគ្នាក្នុងក្របខណ្ឌនៃគម្រោងប្រឆាំងមូលដ្ឋានយោធាសំខាន់ៗរបស់អាមេរិកនៅកោះហ្គាម ដើម្បីបញ្ជូនសារព្រមានរបស់យើងចំពោះសហរដ្ឋអាមេរិក ។
ការប្រកាសនេះរបស់ក្រុងព្យុងយ៉ាងធ្វើឡើងបន្ទាប់ពីការគំរាមកំហែងដាក់គ្នាទៅវិញទៅមក រវាងកូរ៉េខាងជើង និងសហរដ្ឋអាមេរិក ។ ប្រធានាធិបតីអាមេរិកលោកដូណាល់ ត្រាំ សន្យាកាលពីថ្ងៃទី៨ សីហា ថា «ភ្លើង និងកំហឹង» នឹងជះលើកូរ៉េខាងជើង ប្រសិនបើខ្លួនគំរាមកំហែងជាថ្មីដល់ប្រទេសលោក ។ នាថ្ងៃដដែលនេះដែរ ទីភ្នាក់ងារព័ត៌មានកូរ៉េខាងជើង KCNA បានដកស្រង់សេចក្តីប្រកាសរបស់កងកម្លាំងយុទ្ធសាស្ត្ររបស់ប្រទេសថា ក្រុងព្យុងយ៉ាងសិក្សាពីលទ្ធភាពវាយប្រហារបណ្តាមូលដ្ឋានយោធាអាមេរិកនៅកោះហ្គាមចម្ងាយ៤.០០០គីឡូម៉ែត្រ ពីក្រុងព្យុងយ៉ាងតាមរយៈមីស៊ីលយុទ្ធសាស្ត្រ HWASONG-12 ។
ចំណែកទូរទស្សន៍អាមេរិក NBC បានដកស្រង់ប្រភពព័ត៌មានយោធាដែលថា មន្ទីរប៉ង់តាហ្គោនក៏បានរៀបចំដែរ ផែនការវាយប្រហារប្រឆាំងបណ្តាទីតាំងបាញ់មីស៊ីលរបស់កូរ៉េខាងជើង រួចផែនការនេះនឹងអនុវត្តប្រសិនបើប្រធានាធិបតីលោកត្រាំ ចុះហត្ថលេខាលើក្រិត្យសមស្របមួយ ។ យោងតាម NBC ថា ការវាយប្រហារដោយបណ្តាយន្តហោះទម្លាក់គ្រាប់បែកយុទ្ធសាស្ត្រអាមេរិក B-1B LANCER មានមូលដ្ឋាននៅកោះហ្គាមអាចសំដៅលើទីតាំងបាញ់មីស៊ីល និងរក្សាទុកមីស៊ីលកូរ៉េខាងជើង២០កន្លែង ។
នៅកោះហ្គាមមានមូលដ្ឋាន អាកាសចរណ៍អាមេរិក ANDERSON ដែលបណ្តាយន្តហោះយុទ្ធសាស្ត្រ B-1B ចុះសំចតចាក់ប្រេងពេលហោះហើរមកកាន់កូរ៉េខាងត្បូង ព្រមទាំងមូលដ្ឋាននាវាចរណ៍ APRA HARBOR ។
អាមេរិកព្រមានលោកគីម ជុងអ៊ុន ពី លទ្ធភាពបញ្ចប់របបលោកសហរដ្ឋអាមេរិកបានព្រមានកូរ៉េខាងជើងថា ការបន្តមហិច្ឆតានុយក្លេអ៊ែររបស់ប្រទេសនេះ អាចនាំទៅដល់ការបញ្ចប់នៃរបបលោកគីម ជុងអ៊ុន ដែលការគំរាមនេះធ្វើឡើង ខណៈលោកត្រាំ បន្តវោហាសាស្ត្រដោយលើកពីកម្លាំងនុយក្លេអ៊ែរដ៏លើសលុបរបស់អាមេរិក ។
ប្រមុខមន្ទីរប៉ង់តាហ្គោន លោក JIM MATTIS អំពាវនាវដល់ក្រុងព្យុងយ៉ាងបញ្ឈប់ការរត់ប្រណាំងអាវុធនុយក្លេអ៊ែរ ដោយព្រមានពីការសម្រេចចិត្តនានាដែលនឹងនាំទៅដល់ការបញ្ចប់របបលោកគីម ជុងអ៊ុន និងការកម្ទេចប្រជាជនលោក ។
ដោយគូសបញ្ជាក់ពីភាពឯកោកាន់តែខ្លាំងរបស់ក្រុងព្យុងយ៉ាងអតីតឧត្តមនាវីកងម៉ារីនរូបនេះអះអាងថា បណ្តាសកម្មភាពរបស់របបកូរ៉េខាងជើង រាល់លើកលើសពីសកម្មភាពនានារបស់យើង ហើយរបបនេះនឹងបាត់បង់រាល់ការប្រណាំងប្រជែងគ្រឿងសព្វាវុធ ឬជម្លោះដែលខ្លួនបង្កឡើង ។
លើឆាកអន្តរជាតិ ប្រទេសជាច្រើនបានសម្តែងការព្រួយបារម្ភប្រឈមមុខនឹងវោហាសាស្ត្រសង្គ្រាមប្រកាន់យកដោយប្រមុខសេតវិមាន ។ ប្រទេសអាល្លឺម៉ង់អំពាវនាវដល់បណ្តាភាគីឱ្យមានការអត់ធ្មត់ ។ ចំណែកចិនស្នើឱ្យចៀសវាងបណ្តាពាក្យពេចន៍ និងសកម្មភាពដែលអាចបង្កើនភាពតានតឹងនៅឧបទ្វីបកូរ៉េ ។
កាលពីព្រឹកថ្ងៃទី៩ សីហា ប្រធានាធិបតីអាមេរិកតាម TWITTER បានព្រមានថា អាវុធនុយក្លេអ៊ែររបស់ប្រទេសលោក ធានាថា ខ្លាំង និងមានអនុភាពបំផុតជាងពេលណាៗទាំងអស់ ។
ចំណែករដ្ឋមន្ត្រីការបរទេសអាមេរិក លោក REX TILLERSON ថ្លែងពីកោះហ្គាមអាមេរិកថា ចំពោះភ្នែករបស់លោកពុំមើលឃើញការគំរាមកំហែងបន្ទាន់ណាមួយឡើយ ។ ក្រោយការគំរាមបាញ់មីស៊ីលរបស់កូរ៉េខាងជើង លោកថា ពលរដ្ឋអាមេរិកដេកលក់ស្រួល ហើយគ្មានការបារម្ភចំពោះបណ្តាវោហាសាស្ត្រ ផ្លោងដាក់គ្នារយៈពេលប៉ុន្មានថ្ងៃចុងក្រោយនេះឡើយ ។
កោះហ្គាមជាកោះធំដាច់ស្រយាលមួយមានទំហំប្រមាណជា៥៥០គីឡូម៉ែត្រក្រឡាជាប៉ុស្តិ៍ជួរមុខគន្លឹះរបស់កងទ័ពអាមេរិកតាមផ្លូវមកកាន់អាស៊ី ។
លើកោះនេះដាក់ពង្រាយទាហានប្រមាណជា៦.០០០នាក់ រួចលើកោះនេះមានមូលដ្ឋានអាកាសចរណ៍ធំមួយ ដែលអាចទទួលបណ្តាយន្តហោះទម្លាក់គ្រាប់បែកយុទ្ធសាស្ត្រធុនធ្ងន់អាមេរិក B-52, B-2 និង B=1៕
ចែករំលែកព័តមាននេះ