អាណោចអាធ័មណាស់ សម្រែកជួយផងរបស់មីងធ្វើឱ្យក្មួយលូកដៃជួយបែរជាស្លា.ប់ទាំងអស់គ្នា
ខេត្តព្រៃវែង ៖ ហេតុការណ៍ដ៏គួរឱ្យអាណោចអាធ័មមួយបានកើតឡើង និងធ្វើឱ្យមានការភ្ញាក់ផ្អើលដល់មនុស្សម្នានាំគ្នារត់ទៅចោមរោមមើលយ៉ាងកកកុញ
ខេត្តព្រៃវែង ៖ ហេតុការណ៍ដ៏គួរឱ្យអាណោចអាធ័មមួយបានកើតឡើង និងធ្វើឱ្យមានការភ្ញាក់ផ្អើលដល់មនុស្សម្នានាំគ្នារត់ទៅចោមរោមមើលយ៉ាងកកកុញ ដោយសារតែមានមនុស្សលង់ទឹកស្លាប់ដល់ទៅ៣នាក់ក្នុងពេលតែ១។ ហេតុការណ៍នេះបានកើតឡើងកាលពីវេលាម៉ោង៩និង៤០នាទីព្រឹកថ្ងៃទី៩ សីហា នៅខាងក្រោយឡឥដ្ឋ១កន្លែង ដែលស្ថិតនៅតាមបណ្តោយផ្លូវជាតិលេខ១ ក្នុងភូមិស្ទឹងស្លូត ឃុំអ្នកលឿង ស្រុកពាមរក៍ ខេត្តព្រៃវែង ។ ជនរងគ្រោះដែលស្លាប់បាត់បង់ជីវិតក្នុងហេតុការណ៍នេះ ទី១-ឈ្មោះ នៅ សោភ័ណ ភេទស្រី អាយុ២២ឆ្នាំ មុខរបរជាកម្មករឡឥដ្ឋ, ទី២-ឈ្មោះ ធូ ចិន្តា ភេទស្រី អាយុ៥ឆ្នាំ និងទី៣-ឈ្មោះ រី រតនា ភេទប្រុស អាយុ៧ឆ្នាំ កុមារទាំង២ត្រូវជាក្មួយរបស់ជនរងគ្រោះទី១ហើយឪពុកម្តាយគឺជាកម្មករឡឥដ្ឋនៅក្បែរកន្លែងកើតហេតុ ។
តាមប្រភពព័ត៌មានពីក្រុមគ្រួសារជនរងគ្រោះបានឱ្យដឹងថា នៅព្រឹកថ្ងៃកើតហេតុជនរងគ្រោះ នៅ សោភ័ណ បាននាំក្មេងតូចៗចំនួន៥នាក់ជិះទូកទៅឃ្វាលក្របីនៅលើទួលខាងត្បូងបឹងទៅតាមទម្លាប់ដួចរាល់ៗថ្ងៃ ហើយក្រោយពីដេញឃ្វាលក្របីរួច ក៏នាំគ្នាជិះទូកត្រឡប់មកផ្ទះវិញ ប៉ុន្តែពេលមកដល់កន្លែងកើតហេតុដែលជារណ្តៅស្រះគេជីកយកអាចម៍ដីមិនដឹងជាយ៉ាងម៉េច ស្រាប់តែជនរងគ្រោះធ្លាក់ទឹកលង់ស្លាប់បែបនេះទៅវិញ ។ តាមការអះអាងរបស់ក្មេងប្រុសម្នាក់ដែលជិះនៅលើទូកនោះដែរបានបញ្ជាក់ប្រាប់ថា ពេលដែលពួកគេជិះទូកមកដល់កន្លែងកើតហេតុ មិនដឹងថាមកពីមូលហេតុអ្វី ស្រាប់តែឃើញស្ត្រីរងគ្រោះ នៅ សោភ័ណ ធ្លាក់ពីលើទូកចូលក្នុងទឹកហើយស្រែកហៅឱ្យជួយផង ភ្លាមនោះកុមារ៉ា រី រតនា និងកុមារី ធូ ចិន្តា ដែលត្រូវជាក្មួយបានលូកដៃទៅចាប់ទាញមីង ហើយក៏ត្រូវមីងដែលកំពុងលង់ទឹក ទាញធ្លាក់ចូលទឹកលង់ទាំងអស់គ្នាតែម្តង ទើបក្មេងតូចៗ៣នាក់ដែលនៅលើទូកនាំគ្នាស្រែកយំ និងស្រែកហៅឱ្យគេជួយធ្វើឱ្យភ្ញាក់ផ្អើលដល់ក្រុមកម្មករឡឥដ្ឋដែលនៅក្បែរនោះ នាំគ្នាឆោឡោ និងចុះទៅជួយរាវរកជនរងគ្រោះភ្លាមៗ ប៉ុន្តែទំរាំរាវរកឃើញអ្នកទាំង៣បានស្លាប់បាត់បង់ជីវិតអស់ទៅហើយ ។
ដោយឡែកខាងសមត្ថកិច្ចបានបញ្ជាក់ប្រាប់ថា បឹងខាងក្រោយឡឥដ្ឋនោះទឹកមានជម្រៅត្រឹមជង្គង់ប៉ុណ្ណោះគឺមិនជ្រៅនោះទេ ប៉ុន្តែត្រង់កន្លែងដែលជនរងគ្រោះលង់នោះកាលពីប៉ុន្មានឆ្នាំមុនគេបានជីកយកអាចម៍ដីដាក់ឡឥដ្ឋ ទើបកើតទៅជាស្រះ១ដែលមានទទឹង៥ម៉ែត្រ បណ្តោយ៨ម៉ែត្រ និងជម្រៅជាង៤ម៉ែត្រ ហើយជាអកុសលជនរងគ្រោះបានធ្លាក់ចំកែងស្រះនោះទើបធ្វើឱ្យលង់ស្លាប់បែបនេះ បើធ្លាក់ខុសកន្លែងនោះតែ២ម៉ែត្រទៀតប៉ុណ្ណោះ ជនរងគ្រោះក៏មិនស្លាប់ដែរ ព្រោះទឹកត្រឹមស្មងជើងប៉ុណ្ណោះ ។
គួរបញ្ជាក់ផងដែរថា ក្រោយពេលស្រង់សពជនរងគ្រោះទាំង៣នាក់យកមកដល់ផ្ទះវិញស្ត្រីដែលត្រូវជាម្តាយមីងកុមាររងគ្រោះ និងទើបតែសម្រាលកូនរួចបាន៧ថ្ងៃ ដោយសារតែនឹកអាណិតក្មួយពេកបានស្រែកយំរហូតគាំងនិងដួលសន្លប់ ហើយត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យភ្លាមៗផងដែរ ចំណែឯសាកសពជនរងគ្រោះទាំង៣ពេលនេះក្រុមគ្រួសារកំពុងរៀបចំធ្វើបុណ្យហើយ ៕
ចែករំលែកព័តមាននេះ