សំណុំរឿងលោកស្រី ថាក់ ឡានី សមាជិកព្រឹទ្ធសភាគណបក្ស សម រង្ស៊ី (មានវីដេអូ)
រាជធានីភ្នំពេញ ៖ នៅព្រឹកថ្ងៃទី១០ សីហា សាលាឧទ្ធរណ៍បានបើកសវនាការលោកស្រី ថាក់ ឡានី
រាជធានីភ្នំពេញ ៖ នៅព្រឹកថ្ងៃទី១០ សីហា សាលាឧទ្ធរណ៍បានបើកសវនាការលោកស្រី ថាក់ ឡានី សមាជិកព្រឹទ្ធសភាគណបក្ស សម រង្ស៊ី ពីបទបរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ។ សវនាការនេះត្រូវបានលោកមេធាវី សំ សុគង់ ការពារសិទ្ធិឲ្យលោកស្រី ថាក់ ឡានី ដាក់ពាក្យសូមពន្យារពេលសវនាការ ប៉ុន្តែត្រូវបានលោកចៅក្រម ប្លង់ សំណាង បដិសេធ និងបន្តសវនាការ ។
តំណាងមហាអយ្យការធ្វើសេចក្តីសន្និដ្ឋាននៅតែតម្កល់បទចោទប្រកាន់នៅដដែល និងសូមឲ្យលោកចៅក្រមតម្កល់សាលក្រមសាលាដំបូងរាជធានីភ្នំពេញទុកជាបនាការ ។ លោកមេធាវី គី តិច ការពារលោកនាយករដ្ឋមន្ត្រី ហ៊ុន សែន ធ្វើសេចក្តីសន្និដ្ឋានស្នើសុំឲ្យលោកចៅក្រមតម្កល់សាលក្រមសាលាដំបូងរាជធានីភ្នំពេញនៅដ៏ដែល។ សវនាការរឿងក្តីខាងលើនេះត្រូវបានលោកចៅក្រមសម្រេចលើកពេលទៅប្រកាសសាលដីកានៅព្រឹកថ្ងៃទី២៩ ខែសីហា ឆ្នាំ២០១៧ ខាងមុខនេះ ។
សូមបញ្ជាក់ថា លោក អ៊ី ឋាវរៈ ចៅក្រមសាលាដំបូងរាជធានីភ្នំពេញកាលពីរសៀលថ្ងៃទី១៧ ខែវិច្ឆិកា ឆ្នាំ២០១៦ បានប្រកាសសាលក្រមផ្តន្ទាទោសលោកស្រី ថាក់ ឡានី សមាជិកព្រឹទ្ធសភាគណបក្ស សម រង្ស៊ី ឲ្យជាប់ពន្ធនាគារ១ឆ្នាំ៦ខែ និងបង់ប្រាក់ពិន័យ៨លានរៀល ពីបទបរិហារកេរ្តិ៍ជាសាធារណៈ និងញុះញង់ឲ្យប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គមប្រព្រឹត្តកាលពីថ្ងៃ២៩ ខែកក្កដា វេលាម៉ោង៨និង៣០នាទីនៅភូមិតាប៉ាង ឃុំតាប៉ាង ស្រុកលំផាត់ ខេត្តរតនគិរី ព្រមទាំងបង្គាប់ឲ្យចាប់ខ្លួនភ្លាមៗក្រោយពេលប្រកាសសាលក្រម ។ ចៅក្រមក៏បានបង្គាប់ឲ្យជនជាប់ចោទបង់សំណងជំងឺចិត្ត១០០រៀលទៅលោកនាយករដ្ឋមន្ត្រី ហ៊ុន សែន ដែលជាដើមបណ្តឹងតំណាងដោយលោកមេធាវី គី តិច ។
លោកស្រី ថាក់ ឡានី ត្រូវ បានដកអភ័យឯកសិទ្ធិព្រឹទ្ធសភាពកាលពីថ្ងៃទី១ ខែតុលា ដើម្បីបើកផ្លូវឲ្យតុលាការកោះហៅ និងជំនុំជម្រះលើសំណុំរឿងបរិហារកេរ្តិ៍លោកនាយករដ្ឋមន្ត្រី ហ៊ុន សែន ក្រោយពេលគេឃើញលោកស្រីនិយាយក្នុងវីដេអូឃ្លីបមួយថា សម្តេចនាយករដ្ឋមន្ត្រី ហ៊ុន សែន គឺជាអ្នកបាញ់សម្លាប់អ្នកវិភាគសង្គមលោក កែម ឡី កាលពីថ្ងៃទី១០ ខែកក្កដា ។ សម្តេចនាយករដ្ឋមន្ត្រី ហ៊ុន សែន បានប្តឹងលោកស្រីដោយទាមទារសំណង១០០រៀល និងឲ្យតុលាការអនុវត្តតាមច្បាប់ ៕
ចែករំលែកព័តមាននេះ