ខេត្តកំពង់ធំ ៖ លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានផ្ដាំផ្ញើប្រជាពលរដ្ឋសហគមន៍ថា ក្នុងនាមជាអ្នកម្ចាស់ស្រុក ត្រូវចូលរួមអភិរក្សថែរក្សានិងខិតខំអភិវឌ្ឍតំបន់ប្រាសាទសំបូរព្រៃគុក ជាមួយកម្លាំងសមត្ថកិច្ច និងអាជ្ញាធរពាក់ព័ន្ធ ដើម្បីទាក់ទាញភ្ញៀវទេសចរឲ្យមកទស្សនាកាន់តែច្រើន និងត្រូវរៀបចំផ្ទះស្នាក់ (Home Stay) សេវាមគ្គុទ្ទេសក៏ និងសេវាពាក់ព័ន្ធផ្សេងៗទៀត ដើម្បីត្រៀមខ្លួនទទួលទេសចរដែលកំពុងកើនឡើងជារៀងរាល់ថ្ងៃ។
លោករដ្ឋមន្ត្រីក្រសួងទេសចរណ៍បានបន្តថា តំបន់ប្រាសាទសំបូរព្រៃគុក ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោក ដែលទទួលបានការស្ងើចសរសើរយ៉ាងខ្លាំងចំពោះស្នាដៃរបស់បុព្វបុរសខ្មែរពីសំណាក់សហគមន៍អន្តរជាតិ និងកំពុងត្រូវបានផ្សព្វផ្សាយយ៉ាងទូលំទូលាយទៅកាន់ទីផ្សារទេសចរណ៍ពិភពលោក។
ទន្ទឹមនឹងនេះ ភ្ញៀវទេសចរដែលមកទស្សនាកម្ពុជា ពិសេសតំបន់ប្រាសាទសំបូរព្រៃគុកនេះ ក៏កំពុងកើនឡើងពីមួយថ្ងៃទៅមួយថ្ងៃផងដែរ។ ដូច្នេះប្រជាពលរដ្ឋម្ចាស់ស្រុកចាំបាច់ត្រូវខិតខំអភិរក្ស និងអភិវឌ្ឍតំបន់នេះ ប្រកបដោយនិរន្តរភាព បង្កើតផលិតផលទេសចរណ៍ថ្មី មានផ្ទះស្នាក់ជាលក្ខណៈប្រពៃណី មានសេវាបម្រើគ្រប់គ្រាន់ប្រកបដោយគុណភាព និងការផ្តល់ការពេញចិត្តដល់ទេសចរ។ ព្រោះបើមានការពញចិត្តពេលត្រលប់ទៅវិញពួកគាត់នឹងផ្សព្វផ្សាយបន្តដល់មិត្តភក្តិ គ្រួសារ បងប្អូនបន្តទៀត។
លោករដ្ឋមន្ត្រី បានលើកឡើងបន្ថែមពីគម្រោងអភិវឌ្ឍទេសចរណ៍ជាច្រើន ពិសេសការកាត់បន្ថយភាពក្រីក្រតាមរយៈការបង្កើតការងារ និងឱកាសបង្កើនប្រាក់ចំណូលសម្រាប់សហគ្រាសខ្នាតតូច សិប្បកម្មខែ្មរ និងផលិតផលក្នុងស្រុកផ្សេងទៀត ដែលជួយធ្វើឲ្យមានភាពរីកចម្រើនផ្នែកសេដ្ឋកិច្ចរបស់ប្រជាពលរដ្ឋក្រីក្រ ជាពិសេសស្ដ្រី៕
ចែករំលែកព័តមាននេះ