ខេត្តប៉ៃលិន ៖ សមត្ថកិច្ចបានចាប់ឃាត់ខ្លួនជនសង្ស័យម្នាក់ បន្ទាប់ពីវាយជនរងគ្រោះម្នាក់ បណ្តាលឱ្យរងរបួសធ្ងន់ សន្លប់នៅនឹងកន្លែង បន្ទាប់ពីឈ្លោះទាស់ទែងពាក្យសម្តីគ្នាបន្តិចបន្តួច ។ ហើយរហូតមកដល់ពេលនេះ ជនរងគ្រោះ កំពុងសម្រាកព្យាបាលនៅមន្ទីរពេទ្យនៅឡើយ ហើយក្រុមគ្រួសារ ក៏ប្តឹងឱ្យនគរបាលធ្វើការចាប់ឃាត់ខ្លួនតែម្តង ។
ហេតុការណ៍ ចាប់ឃាត់ខ្លួនជនសង្ស័យ ដែលបានវាយទៅលើជនរងគ្រោះនេះ បានកើតឡើងកាលពីវេលាម៉ោង0២និង៣០នាទីទាបភ្លឺ ថ្ងៃទី១០ ខែសីហា ឆ្នាំ២០១៧ ស្ថិតនៅកន្លែងផ្ទះជួលយីហោ ដារ៉ា ក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ៖ នៅវេលាម៉ោងប្រហែល០២ទាបភ្លឺ ថ្ងៃទី១០ ខែសីហា ឆ្នាំ២០១៧ មានស្ត្រីម្នាក់ជាប្រពន្ធរបស់ជនរងគ្រោះ ឈ្មោះ អាត សុឃៀង អាយុ៣០ឆ្នាំ ជាបុគ្គលិកកាស៊ីណូ បានទូរស័ព្ទប្ដឹងសមត្ថកិច្ច ខណ:ប្ដីរបស់ខ្លួន ឈ្មោះ ចាន់ បូរ៉ា (ហៅអិប) អាយុ៣៣ឆ្នាំ ជាសន្តិសុខខារ៉ាអូខេមួយកន្លែង ស្នាក់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ត្រូវបានជនដៃដល់ម្នាក់ ឈ្មោះ គង់ ប៊ុនណា ភេទប្រុស អាយុ៣៥ឆ្នាំ ជាអ្នកគិតលុយខារ៉ាអូខេ វាយជាច្រើនដៃ បណ្តាលឲ្យជនរងគ្រោះសន្លប់មិនទាន់ដឹងខ្លួន ។ ហើយកម្លាំងជំនាញ ក៏បានចុះទៅនាំខ្លួនជនសង្ស័យខាងលើ នៅវេលាម៉ោងប្រហែល០២និង៣០នាទីទាបភ្លឺ ថ្ងៃខែឆ្នាំដដែល នៅផ្ទះជួលយីហោ ដារ៉ា ស្ថិតនៅក្នុងភូមិខាងលើ ទៅកាន់ស្នងការដ្ឋាននគរបាលខេត្តប៉ៃលិន ដើម្បីសាកសួរបំភ្លឺ ។
ពាក់ព័ន្ធនឹងបញ្ហានេះ បច្ចុប្បន្ន ជនសង្ស័យត្រូវបានលោកព្រះរាជអាជ្ញាអមសាលាដំបូងខេត្តប៉ៃលិន តូច សុភក្ដី បញ្ជាឲ្យឃាត់ខ្លួនបណ្តោះអាសន្នសិន ដោយជនសង្ស័យមានភាពស្រវឹង មិនទាន់ស្វាយស្រានៅឡើយទេ ៕
ចែករំលែកព័តមាននេះ