រាជធានីភ្នំពេញ ៖ បុរសបីនាក់ ជិះម៉ូតូហុងដាឌ្រីមមួយគ្រឿង បោះពួយយ៉ាងលឿន ខ្វះការប្រុងប្រយ័ត្ន មកដល់ត្រង់ចំណុចផ្លូវកែង ក៏ជ្រុលទៅបុករថយន្តមួយគ្រឿងទៀត ពេញទំហឹង បណ្តាលឲ្យរងរបួសបែកមុខបែកមាត់ម្នាក់ និង២នាក់ទៀតរបួសស្រាល ហេតុការណ៍នេះកើតឡើងកាលពីវេលាម៉ោង០១និង១០នាទីរំលងអធ្រាត្រ ឈានចូលថ្ងៃទី១០ ខែសីហា ឆ្នាំ២០១៧ ត្រង់ចំណុចផ្លូវលេខ៥១កែងនិងផ្លូវ២២២ ស្ថិតក្នុងសង្កាត់បឹងរាំង ខណ្ឌដូនពេញ ។
ម៉ូតូបង្កម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ កំពង់ចាម ១N-១៧៣០ បើកបរដោយបុរសបីនាក់ វ័យប្រហែល២០ឆ្នាំ ។ ចំណែកឯរថយន្តរងគ្រោះម៉ាក ម៉ែរសឺដេស V២២០ ពាក់ស្លាកលេខ ភ្នំពេញ ២AT-១០៨៨ បើកបរដោយបុរសជនជាតិចិនម្នាក់ និងនារីជនជាតិចិន៥នាក់ទៀត រួមដំណើរពីក្រោយ ។
តាមប្រភពព័ត៌មានពីកន្លែងកើតហេតុ បានឲ្យដឹងថា ៖ នៅមុនពេលកើតហេតុ គេឃើញរថយន្តរងគ្រោះបើកបរតាមបណ្តោយផ្លូវ៥១ ទិសដៅពីជើងទៅត្បូងក្នុងល្បឿនបោះពួយយ៉ាងលឿន លុះមកដល់ចំណុចកើតហេតុ ក៏ស្រាប់មានម៉ូតូបង្កបើកមកតាមបណ្តោយផ្លូវ២២២ ទិសដៅពីកើតទៅលិច ក្នុងល្បឿនយ៉ាងលឿន ខ្វះការប្រុងប្រយ័ត្ន ក៏ជ្រុលទៅបុករថយន្តចំទ្វាររថយន្តចំហៀងខាងឆ្វេង បណ្តាលឲ្យក្រពឹត និងបែកកញ្ចក់ ចំណែកម៉ូតូរងការខូចខាតវៀចខ្នងកង់ខាងមុខ និងបែកក្បាំង ឬឯអ្នកបើកបររងរបួសបែកមុខបែកមាត់ និងរួមដំណើរពីរនាក់ទៀត រងរបួសស្រាល ។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់កន្លែងកើតហេតុ និងបានទាក់ទងហៅសមត្ថកិច្ចជំនាញឲ្យចុះមកធ្វើការវាស់វែង យករថយន្តទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ដើម្បីរងចាំធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ