រឹបអូសឈើប្រណីត២៥៨ដុំ លើរថយន្តមួយគ្រឿង
ខេត្តស្ទឹងត្រែង ៖ ឈើប្រណីតជាមួយនឹងរថយន្តស៊ាំយ៉ុងមួយគ្រឿង ត្រូវកម្លាំងកងរាជអាវុធហត្ថក្រុងស្ទឹងត្រែង បង្ក្រាបរឹបអូសមកបញ្ជាការដ្ឋានកងរាជអាវុធហត្ថខេត្ត
ខេត្តស្ទឹងត្រែង ៖ ឈើប្រណីតជាមួយនឹងរថយន្តស៊ាំយ៉ុងមួយគ្រឿង ត្រូវកម្លាំងកងរាជអាវុធហត្ថក្រុងស្ទឹងត្រែង បង្ក្រាបរឹបអូសមកបញ្ជាការដ្ឋានកងរាជអាវុធហត្ថខេត្ត កាលពីវេលាម៉ោង១១និង៣០នាទីយប់ ថ្ងៃទី៨ ខែសីហា ឆ្នាំ២០១៧ ស្ថិតក្នុងភូមិរាជនុកូល សង្កាត់ស្ទឹងត្រែង ក្រុងស្ទឹងត្រែង។ ប្រភពព័ត៌មានបានឲ្យដឹងថា រថយន្តដឹកឈើប្រណីតចេញពីខេត្តស្ទឹងត្រែងបច្ចុប្បន្នត្រូវឆ្លងកាត់សមត្ថច្រើន តែមិនជាបញ្ហាសម្រាប់ឈ្មួញជនជាតិវៀតណាមនោះឡើយ ដោយមុននឹងធ្វើសកម្មភាពមានការទំនាក់ទំនងទៅសមត្ថកិច្ចនោះជាមុន ដើម្បីកុំមានភ្ញាក់ផ្អើល និងដេញប៉ផាប់ចាប់ប៉ភីង។
ប្រភពដដែលបន្តថា សកម្មភាពបច្ចុប្បន្នឈ្មួញជនជាតិវៀតណាមជាអ្នកឈរជើងប្រមូលទិញឈើប្រណីត បន្ទាប់មកជួលក្រុមរថយន្តដឹកស៊ីឈ្នួលរ៉ាប់រងលើការដឹកជញ្ជូនទៅគោលដៅ និងរត់ការទៅសមត្ថកិច្ចពាក់ព័ន្ធ។ មន្ត្រីកងរាជអាវុធហត្ថឲ្យដឹងថា រថយន្តខាងលើត្រូវបានបង្ក្រាបនៅលើកំណាត់ផ្លូវជាតិលេខ៧ ខណៈដឹកឈើប្រណីតចេញពីខេត្តស្ទឹងត្រែងទៅខេត្តក្រចេះ។ ក្រោយពីប្រទះឃើញកម្លាំងអាវុធហត្ថក្រុងឆែកឆេរទើបឈានដល់ការបង្ក្រាប និងឃាត់ខ្លួនមនុស្សពីរនាក់ផងដែរ។
មន្ត្រីដដែលបន្តថា នៅព្រឹកថ្ងៃទី៩ ខែសីហា ឆ្នាំ២០១៧ កម្លាំងអាវុធហត្ថបានចងក្រងឯកសារប្រគល់ជូនជំនាញរដ្ឋបាលព្រៃឈើថែរក្សាបន្ត។ ចំណែកមនុស្សពាក់ព័ន្ធពីរនាក់កសាងសំណុំរឿងបញ្ជូនទៅតុលាការ។ មន្ត្រីខណ្ឌរដ្ឋបាលព្រៃឈើខេត្តស្ទឹងត្រែងបានឲ្យដឹងនៅរសៀលថ្ងៃទី៩ ខែសីហា ឆ្នាំ២០១៧នេះថា ឈើប្រណីតទាំងនោះមានចំនួន២៥៨ដុំ នៅមិនទាន់ធ្វើការវាស់វែងនៅឡើយទេ បច្ចុប្បន្នត្រូវបានថែរក្សាទុកនៅផ្ទះខណ្ឌរដ្ឋបាលព្រៃឈើក្បែរគល់ស្ពានមេគង្គ ចំណែករថយន្តផ្ញើទុកនៅបញ្ជាការដ្ឋានកងរាជអាវុធហត្ថខេត្តបណ្តោះអាសន្ន៕
ចែករំលែកព័តមាននេះ