រាជធានីភ្នំពេញ ៖ បើទោះជាមានការរិះគន់ថា ប្រព័ន្ធឃោសនារបស់គណៈកម្មាធិការជាតិអូឡាំពិកកម្ពុជា(NOCC) ហាក់ខ្វះសមត្ថភាពក្នុងការផ្សព្វផ្សាយពីសកម្មភាពកីឡានៅគ្រប់សហព័ន្ធក្រោមឱវាទរបស់
រាជធានីភ្នំពេញ ៖ បើទោះជាមានការរិះគន់ថា ប្រព័ន្ធឃោសនារបស់គណៈកម្មាធិការជាតិអូឡាំពិកកម្ពុជា(NOCC) ហាក់ខ្វះសមត្ថភាពក្នុងការផ្សព្វផ្សាយពីសកម្មភាពកីឡានៅគ្រប់សហព័ន្ធក្រោមឱវាទរបស់ខ្លួនក៏មន្ត្រីជាន់ខ្ពស់របស់ស្ថាប័នមួយនេះបានអះអាងថា អង្គភាពNOCCមានក្រុមផ្សព្វផ្សាយពីសកម្មភាពកីឡារបស់ខ្លួនគ្រប់គ្រាន់ ។ ក្នុងនោះមន្ត្រីដដែលក៏បានប្រកាសថា នឹងពង្រឹងក្រុមការងារផ្សព្វផ្សាយរបស់ខ្លួនដោយមិនចាំបាច់ពឹងលើបណ្ដាញផ្សព្វផ្សាយខាងក្រៅនាំតែលំបាកនោះផង ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានអះអាងថា នៅក្នុងស្ថាប័នរបស់លោកគ្រប់គ្រងរាល់ថ្ងៃ គឺមានអង្គភាពព័ត៌មានរបស់ខ្លួនច្បាស់លាស់មិនចាញ់ស្ថាប័នព័ត៌មានអាជីពនោះទេ ដោយក្រុមការងារដែលបានបង្កើតឡើង គឺមានទាំងក្រុមអ្នកថតរូប និងក្រុមអ្នកសរសេរព័ត៌មានយ៉ាងល្អនោះផង ។ ក្រុមទាំងនោះមួយចំនួនត្រូវបានជ្រើសចេញពីអ្នកយកព័ត៌មានអាជីពដែលមានបទពិសោធន៍យូរឆ្នាំ និងមួយចំនួនជ្រើសចេញពីអ្នកមានជំនាញថ្មី ហើយយកមកបណ្ដុះបណ្ដាលបន្ថែម ។ លោកថា NOCC មានប្រព័ន្ធផ្សព្វផ្សាយរបស់ខ្លួនធំៗចំនួន២ គឺមានផេករបស់NOCC និងវេបសាយរបស់NOCC ដោយប្រព័ន្ធផ្សព្វផ្សាយទាំង២មានតួនាទីបង្ហោះ និងសរសេរពីសកម្មភាពរបស់គណៈកម្មាធិការជាតិអូឡាំពិក និងសហព័ន្ធទាំងឡាយដែលមានសកម្មភាពដើម្បីផ្ដល់ព័ត៌មានទៅកាន់សាធារណជន ។ ស្ថានភាពសព្វថ្ងៃលោកថាក្រុមផលិតព័ត៌មានរបស់ខ្លួនមានបរិមាណគ្រប់គ្រាន់ បើទោះជាមានអ្នកខ្លះយល់ថា ព័ត៌មានដែលផ្សព្វផ្សាយលើផេក និងវេបសាយរបស់ NOCC ដែលលោកបានបញ្ជាក់មិនត្រូវបានគេឃើញ ។ លោកថា បើទោះជាមិនមានការផ្សព្វផ្សាយពីសំណាក់អ្នកសារព័ត៌មានអាជីពនៅតាមបណ្ដាស្ថាប័នផ្សេងៗ ក៏ផេក និងវេបសាយដែលបានដំណើរការនៅតែផលិតព័ត៌មានពីសកម្មភាពរបស់គណៈកម្មាធិការជាតិអូឡាំពិកកម្ពុជាទាំងមូលបានគ្រប់គ្រាន់ ។
យ៉ាងណាក៏ដោយលោកថា ពឹងលើព័ត៌មានរបស់លោកតែមួយផ្នែក គឺមិនអាចសុសសាយបានទេ ទើបNOCCត្រូវចំណាយលើការផ្សព្វផ្សាយតាមរយៈស្ថាប័នព័ត៌មានធំៗផ្សេងទៀតមិនអាចកាត់ផ្ដាច់គ្នាបាន ។ លោកបានហៅផេក និងវេបសាយរបស់NOCCថាជាប្រភពផ្ដល់ទិន្នន័យទាន់ហេតុការណ៍ ដោយមានទាំងរូបថតបង្ហាញពីសកម្មភាពផង ដើម្បីឱ្យស្ថាប័នផ្សព្វផ្សាយនានាងាយស្រួលក្នុងការស្រង់ព័ត៌មានយកទៅសរសេរបន្ត ។ លោកនិយាយថា៖«រាល់ថ្ងៃផេក និងវេបសាយរបស់NOCC មានសកម្មភាពខ្លាំង តែយើងដឹងហើយបណ្ដាញផ្សព្វផ្សាយយើងតែមួយមិនអាចសុសសាយបាន តែវាស្រួលត្រង់ថា ពីមុននៅពេលអ្នកព័ត៌មានចង់បានព័ត៌មានគឺលុះត្រាចំណាយពេលមកសម្ភាសន៍ ឬទាក់ទងសម្ភាសន៍ តែឥឡូវអត់ទេ ពួកគាត់មើលតែលើផេក និងវេបសាយរបស់យើង គឺគាត់ផ្សាយបានហើយ សូម្បីតែរូបក៏យើងមានក្រុមការងារយើងបង្ហោះរហូតដែរ អ៊ីចឹងវាស្រួលជាងមុន!» ។
លោកថា ប្រព័ន្ធព័ត៌មានដែលអាចផ្សព្វផ្សាយពីសកម្មភាពកីឡាបានលឿន និងទូលំទូលាយសព្វថ្ងៃ គឺដោយសារតែក្រុមផលិតព័ត៌មានរបស់លោកបានរួមចំណែកមួយផ្នែក។ ជាក់ស្ដែងក្នុងចំណោមក្រុមថតរូប ក្រុមបង្ហោះព័ត៌មាន និងក្រុមផលិតព័ត៌មាន លោកក៏បានរៀបចំក្រុមចែកចាយដំណឹងតាមអុីម៉េល និងតាមប្រព័ន្ធបញ្ជូនព័ត៌មានផ្សេងទៀតដើម្បីចែកចាយដំណឹងឱ្យគ្រប់ស្ថាប័នព័ត៌មានផងដែរ ។ មកទល់សព្វថ្ងៃលោកថា រាប់ទាំងក្រុមព័ត៌មានដែលជាក្រុមផ្ទាល់ខ្លួនរបស់NOCC និងក្រុមព័ត៌មានជាដៃគូគឺមានចំនួនច្រើន ដោយលោកបានហៅក្រុមផ្សព្វផ្សាយព័ត៌មានរបស់ស្ថាប័នទាំងមូលថា បានក្ដោបក្ដាប់ទូទាំងប្រទេសអត់មានចន្លោះនោះផង។
លោកនិយាយថា៖«រាល់ថ្ងៃបើនិយាយពីប្រព័ន្ធផ្សព្វផ្សាយ គឺNOCC ក្ដោបអស់មួយស្រុកខ្មែរហើយ ដោយសារតែអ្នកសារព័ត៌មានណាក៏មកយកព័ត៌មានពីយើងទៅផ្សាយ។ មើលមើល៍រាល់ថ្ងៃមានស្ថាប័នធំៗណាមួយដែលមិនមានផ្សព្វផ្សាយពីសកម្មភាពរបស់NOCC» ។ លោកមិនអាចបញ្ជាក់ពីខ្ទង់ចំណាយលើការផ្សព្វផ្សាយនៅរាល់សកម្មភាពផលិតព័ត៌មាន និងសហការជាមួយបណ្ដាញសារព័ត៌មានពាក់ព័ន្ធឱ្យមកយកព័ត៌មានទៅផ្សាយបន្តនោះទេ ដោយលោកបញ្ជាក់ថា អ្វីៗគឺមានការចំណាយតែលោកមិនអាចបញ្ជាក់ថាក្នុងមួយខែចំណាយអស់ប៉ុន្មាន ឬមួយឆ្នាំប៉ុន្មាន ទើបអាចចាត់ចែងរឿងផ្សព្វផ្សាយព័ត៌មានពីគណៈកម្មាធិការជាតិអូឡាំពិកបានទូលំទូលាយនោះទេ ។
លោក វ៉ាត់ ចំរើន បញ្ជាក់ថា ប្រព័ន្ធព័ត៌មានគឺមានសារសំខាន់បំផុត ក្នុងការចែកចាយនូវដំណឹង និងសកម្មភាពដែលបានកើតឡើងទៅកាន់មហាជនឱ្យមានការដឹងឮ ។
លោកបានហៅអ្នកមើលស្រាលការផ្សព្វផ្សាយថាជាជម្រើសមិនស្គាល់ពីតម្លៃនៃការផ្សព្វផ្សាយ និងមិនចង់ចែករំលែកសកម្មភាពដែលបានធ្វើឱ្យមានការដឹងឮនោះផង ។
ជាក់ស្ដែងនៅក្នុងព្រឹត្តិការណ៍ស៊ីហ្គេមក្នុងប្រទេសម៉ាឡេស៊ីនាប៉ុន្មានថ្ងៃខាងមុខនេះ លោកថា បើទោះជាខាងគណៈកម្មាធិការជាតិអូឡាំពិកកម្ពុជាមានក្រុមព័ត៌មានជារបស់ផ្ទាល់ខ្លួន ក៏នៅតែបញ្ជូនអ្នកសារព័ត៌មានអាជីពជាច្រើននាក់ផ្សេងទៀតដើម្បីឱ្យទៅយកព័ត៌មានដល់ទីនោះ ដើម្បីចែកចាយដំណឹងឱ្យបានច្បាស់លាស់ ហើយរហ័ស ។
លោកនិយាយថា៖«សម្រាប់NOCC យកចិត្តទុកដាក់រឿងពង្រឹងការផ្សព្វផ្សាយណាស់ មើលតែស៊ីហ្គេមប៉ុន្មានថ្ងៃខាងមុខហ្នឹង គឺយើងសុខចិត្តចំណាយលុយច្រើនអញ្ជើញអ្នកសារព័ត៌មានយើងឱ្យទៅយកដោយផ្ទាល់!» ។ លោកប្រកាសពង្រឹងប្រព័ន្ធផ្សព្វផ្សាយជុំវិញសកម្មភាពរបស់ស្ថាប័នឱ្យកាន់តែខ្លាំងដោយលោកប្រកាសថានឹងធ្វើឱ្យផេក និងវេបសាយរបស់ខ្លួនក្លាយជាបណ្ដាញសារព័ត៌មានឈានមុខមួយសម្រាប់ផ្ដល់ព័ត៌មានកីឡានោះផង ដោយលោកបញ្ជាក់ថា បើរង់ចាំតែការផ្សព្វផ្សាយរបស់ស្ថាប័នផ្សេងៗគឺអាចនឹងមិនបានគ្រប់ជ្រុង។ លោកថា អ្នកបម្រើការនៅក្នុងវេបសាយរបស់NOCCមានចំនួនប្រមាណ១០នាក់ ដោយក្នុងចំណោមនោះគឺមានអ្នកគ្រប់គ្រងផ្នែកបច្ចេកវិទ្យា ផ្នែកបង្ហោះ ផ្នែកផលិតព័ត៌មាន និងឆ្លើយតបការសាកសួរ ។ ដោយឡែក សម្រាប់ផេករបស់NOCCក៏មានអ្នកបម្រើការចំនួនប្រមាណជា១០នាក់ដែរ ដោយរួមមានអ្នកថតរូប អ្នកបង្ហោះរូប និងអ្នកផលិតព័ត៌មានផងដែរ ។
យ៉ាងណាក៏ដោយលោកថា នៅលើផេក និងវេបសាយរបស់ NOCCមានការផ្សព្វផ្សាយតែបណ្ដាសហព័ន្ធណាដែលមានសកម្មភាពហើយជាសកម្មភាពនៅក្រោមការរៀបចំរបស់NOCCប៉ុណ្ណោះ។ ប៉ុន្តែបើសហព័ន្ធនោះមិនធ្វើសកម្មភាព ឬមានសកម្មភាពដែរតែជាសកម្មភាពមិនមែនជាការរៀបចំរបស់ថ្នាក់លើគឺមិនមានការផ្សព្វផ្សាយទេ ទើបអ្នកតាមដានព័ត៌មានភាគច្រើនយល់ថា ដំណឹងកីឡារបស់NOCCមិនបានទូលំទូលាយ ដែលធ្វើឱ្យសហព័ន្ធខ្លះបិះនឹងធ្វើឱ្យមហាជនភ្លេចឈ្មោះ ។ លោករំពឹងថា ការផ្សព្វផ្សាយដែលលោកបានដើររាល់ថ្ងៃ នឹងកាន់តែធ្វើឱ្យវិស័យកីឡាទទួលបាននូវការចាប់អារម្មណ៍ ជាពិសេសគឺដំណឹងប្រកួតប្រជែង និងស្នាដៃរបស់កីឡាករ-កីឡាការិនីដែលកាលពីមុនគឺមិនសូវមានការផុសផុលផ្សព្វផ្សាយនោះ ។ ក្នុងនោះលោកក៏បានរៀបចំការបង្រៀនពីរបៀបសរសេរ និងរាយការណ៍ព័ត៌មានកីឡានៅក្នុងព្រឹត្តិការណ៍ធំៗ ដើម្បីឱ្យដំណឹងកីឡារបស់NOCCកាន់តែមានភាពច្បាស់លាស់ និងត្រូវចំគោលដៅ មិនមានខ្លឹមសារបំភ្លៃដល់សាធារណជននោះផងដែរ ។
លោកនៅតែអះអាងថា ប្រព័ន្ធផ្សព្វផ្សាយរបស់NOCCមានកម្លាំងគ្រប់គ្រាន់ និងបានបន្ទោសថា សម្រាប់សហព័ន្ធខ្លះដែលមិនសូវមានដំណឹងនៅលើផេក និងលើវេបសាយ NOCC គឺមិនមែនដោយសារតែក្រុមព័ត៌មានរបស់លោកមិនគ្រប់គ្រាន់នោះទេ ប៉ុន្តែគឺបណ្ដាលមកពីសហព័ន្ធទាំងនោះមិនធ្វើសកម្មភាពណាមួយដែលអាចឱ្យក្រុមអ្នកសារព័ត៌មានធ្វើការផ្សព្វផ្សាយបាន ។ លោកទទូចឱ្យសហព័ន្ធគ្រប់ផ្នែកបង្កើនការសហការជាមួយអ្នកសារព័ត៌មាន និងព្យាយាមផ្សព្វផ្សាយពីខ្លួនឯងឱ្យបានច្រើន ដើម្បីលើកទឹកចិត្តដល់គ្រូបង្វឹក ដល់កីឡាករ កីឡាការិនីឱ្យកាន់តែមានគេស្គាល់ និងដើម្បីឱ្យសាធារណជនមានឱកាសបានដឹងពីដំណឹងថ្មីនៅពេលសហព័ន្ធទាំងមូលបានធ្វើសកម្មភាពឬគ្រោងធ្វើសកម្មភាព ។
លោកអះអាងថា ប្រព័ន្ធផ្សព្វផ្សាយគឺជាអ្នកនាំសារ ហើយបើធ្វើសកម្មភាពតែមិនមានការសហការជាមួយបណ្ដាញសារព័ត៌មានក៏មិនមានអ្នកដឹងនោះដែរ បូករួមទាំងអ្នកសារព័ត៌មានរបស់NOCCផង ៕
ចែករំលែកព័តមាននេះ