ការដកអ្នកបើកបរយន្តហោះ អាចនឹងជួយសន្សំសំចៃប្រាក់ក្រុមហ៊ុនអាកាសចរណ៍បានរាប់ប៊ីលានដុល្លារ ប៉ុន្តែសំណួរសួរថា តើអ្នកដំណើរនឹងហ៊ានជិះដែរឬទេ ?
យោងតាមការរាយការណ៍របស់ UBS ឲ្យដឹងថា
ការដកអ្នកបើកបរយន្តហោះ អាចនឹងជួយសន្សំសំចៃប្រាក់ក្រុមហ៊ុនអាកាសចរណ៍បានរាប់ប៊ីលានដុល្លារ ប៉ុន្តែសំណួរសួរថា តើអ្នកដំណើរនឹងហ៊ានជិះដែរឬទេ ?
យោងតាមការរាយការណ៍របស់ UBS ឲ្យដឹងថា វិស័យអាកាសចរណ៍អាចសន្សំប្រាក់បាន៣៥ប៊ីលានដុល្លារក្នុង១ឆ្នាំ ប្រសិនបើពួកគេប្រើប្រាស់យន្តហោះគ្មានអ្នកបើកបរ ប៉ុន្តែសេចក្ដីរាយការណ៍ខាងលើព្រមានថា មានអ្នកដំណើរតែ១៧%ប៉ុណ្ណោះ ដែលហ៊ានធ្វើដំណើរក្នុងយន្តហោះគ្មានអ្នកបើកបរ ។
UBS និយាយថា បច្ចេកវិទ្យាត្រូវការដើម្បីបង្កើតយន្តហោះដែលអាចបញ្ជាបានពីចម្ងាយ អាចនឹងកើតមានឡើងក្នុងឆ្នាំ២០២៥ ។ ការអភិវឌ្ឍក្រោយឆ្នាំ២០៣០ អាចនឹងបង្កើតឲ្យមានយន្តហោះ និងឧទ្ធម្ភាគចក្រអាចហោះហើរបាន ដោយមិនត្រូវការអ្នកបើកបរ ។
សេចក្ដីរាយការណ៍ខាងលើឲ្យដឹងថា ៖«បច្ចេកវិទ្យាដែលកំពុងអភិវឌ្ឍន៍ក្នុងពេលបច្ចុប្បន្ន នឹងអនុញ្ញាតឲ្យយន្តហោះផ្តល់ជំនួយដល់អ្នកបើកបរក្នុងគ្រប់ដំណាក់កាលនៃការហោះហើរ ។ វាអាចដកអ្នកបើកបរចេញពីការគ្រប់គ្រងការហោះហើរ និងប្រព័ន្ធហោះហើរបានគ្រប់ស្ថានការណ៍ » ។
ជើងហោះហើរដឹកអ្នកដំណើរបានផ្តល់ជំនួយដល់អ្នកបើកបររួចទៅហើយ ដែលធ្វើឲ្យអ្នកបើកបរអាចគ្រប់គ្រងយន្តហោះដោយខ្លួនឯងតែប៉ុន្មាននាទីប៉ុណ្ណោះជាមធ្យម ។
យ៉ាងណាក្តី អ្នកបើកបរនៅតែបន្តតាមដាន គ្រប់គ្រងទិសដៅ និងប្រព័ន្ធហោះហើរ ទាក់ទងជាមួយអ្នកគ្រប់គ្រងចរាចរណ៍លើអាកាស និងរៀបចំដំណាក់កាលហោះហើរបន្តជាដើម ។
អ្នកវិភាគក្នុង UBS បាននិយាយថា ការប្តូរទៅប្រើប្រាស់យន្តហោះគ្មានអ្នកបើកបរ អាចនឹងកើតមានឡើងក្នុងរយៈពេលជាច្រើនឆ្នាំខាងមុខទៀត ហើយយន្តហោះដឹកទំនិញអាចនឹងមានបច្ចេកវិទ្យានេះមុនគេ ។
ការផ្លាស់ប្តូរនេះអាចសន្សំសំចៃប្រាក់ជាច្រើន។ ក្រុមហ៊ុនអាកាសចរណ៍តែងតែមានអ្នកបើកបរចំនួន១០នាក់សម្រាប់យន្តហោះ១គ្រឿង ។ ការកាត់បន្ថយចំនួនអ្នកបើកបរ អាចនឹងធ្វើឲ្យពួកគេចំណាយកាន់តែតិចលើការហ្វឹកហាត់, ប្រាក់បៀវត្សរ៍ និងការចំណាយផ្សេងទៀត ។
ប្រសិនបើមានការកាត់បន្ថយការចំណាយខាងលើ តម្លៃសំបុត្រយន្តហោះក៏អាចចុះថ្លៃផងដែរ និងអាចចុះដល់១១%ក្នុងសហរដ្ឋអាមេរិក ។
ប៉ុន្តែការស្ទង់មតិមនុស្សប្រមាណ៨ពាន់នាក់ដោយ UBS ឲ្យដឹងថា ៥៤%នៃអ្នកចូលរួមបានឆ្លើយថា ពួកគេប្រហែលជាមិនអាចជិះយន្តហោះគ្មានអ្នកបើកបរទេ ហើយមានតែ១៧%ប៉ុណ្ណោះមកពីសហរដ្ឋអាមេរិក ចក្រភពអង់គ្លេស បារាំង អាល្លឺម៉ង់ និងអូស្ត្រាលី និយាយថា ពួកគេនឹងទិញសំបុត្រយន្តហោះគ្មានអ្នកបើកបរ ។
លើសពីនេះ នៅតម្រូវឲ្យមានការផ្លាស់ប្តូរច្បាប់ និងការប្រឆាំងពីសហជីពអ្នកបើកបរយន្តហោះផងដែរ ព្រោះពួកគេនឹងបាត់បង់ការងារ ៕
ចែករំលែកព័តមាននេះ