រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានស្នើឲ្យភាគីជប៉ុនសិក្សាជាមួយអ្នកជំនាញកម្ពុជា អំពីការកែច្នៃសំរាមនៅរាជធានីភ្នំពេញ ។
ការស្នើនេះបានធ្វើឡើងនៅថ្ងៃទី៨ សីហា ក្នុងឱកាសដែលសម្តេចតេជោ និងគណៈប្រតិភូកម្ពុជា បានអញ្ជើញទៅទស្សនកិច្ចនៅរោងចក្រកែច្នៃសំរាម SHIN-KOTO INCINERATION PLANT ដែលគ្រប់គ្រងដោយអាជ្ញាធរសម្អាតទីក្រុងតូក្យូ ហើយការអញ្ជើញដល់របស់សម្តេចតេជោនាយករដ្ឋមន្ត្រី ត្រូវបានទទួលស្វាគមន៍យ៉ាងកក់ក្តៅដោយប្រធានអាជ្ញាធរ លោក តៃជីរ៉ូ នីហ្សីកាវ៉ា ។
សម្តេចបានថ្លែងបញ្ជាក់ថា ៖« ច្បាស់ណាស់ សំរាមគឺជាបញ្ហាចម្បងធំទី២ បន្ទាប់ពីបញ្ហាចរាចរណ៍នៅក្នុងរាជធានីភ្នំពេញ ។ អគាររោងចក្រកែច្នៃសំរាមនេះមានកម្ពស់៦ជាន់ បំពាក់ដោយម៉ាស៊ីនកិនកំទេចសំរាម ហើយបែងចែកទៅតាមប្រភេទសំរាមនីមួយៗ ដែលផលិតចេញជាវត្ថុសម្រាប់ប្រើប្រាស់បានឡើងវិញ ។ កាកសំណល់មួយចំនួនគឺយកទៅធ្វើជី និងបម្លែងទៅជាថាមពលអគ្គិសនីសម្រាប់ប្រើប្រាស់ផងដែរ ។ កម្ពុជាត្រូវការរោងចក្របែបនេះ ដើម្បីកែច្នៃសំរាមដែលដឹកចេញទៅគរនៅជាយក្រុងសព្វថ្ងៃ»។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានឲ្យដឹងតាមទូរស័ព្ទកាលពីថ្ងៃទី៨ សីហា ថា នៅទីក្រុងភ្នំពេញ សំរាមជាមធ្យមមានប្រមាណជាង២.៣០០តោនក្នុង១ថ្ងៃ ហើយចំនួនសំរាមបានកើនឡើងជាលំដាប់ពីមួយថ្ងៃទៅមួយថ្ងៃ ។
លោក មាសភក្ដី បានបញ្ជាក់ថា ៖«កំណើននៃការផលិតសំរាម ដោយសារតែកំណើនប្រជាពលរដ្ឋក្នុងក្រុងភ្នំពេញ និងបង្ហាញពីជីវភាពរស់នៅល្អប្រសើរ មានការហូបចុកបានហូរហៀរផងដែរ » ។
គំនរសំរាមត្រូវគេមើលឃើញថា មានគរនៅតាមផ្លូវស្ទើរគ្រប់ទីកន្លែងក្នុងរាជធានីភ្នំពេញនាពេលរាត្រី ដោយសារមានតែក្រុមហ៊ុនប្រមូលសំរាមមួយប៉ុណ្ណោះ ។ ដើម្បីចូលរួមកាត់បន្ថយការកើនឡើងនៃគំនរសំរាម កន្លងមក សាលារាជធានីភ្នំពេញបានប្រកាសដំណើរការអនុវត្ត គម្រោងកែច្នៃសំរាមឱ្យទៅជាជីសរីរាង្គ ដោយបាននាំចូលម៉ាស៊ីនកែច្នៃសំរាមក្នុងទឹកប្រាក់ប្រមាណ៥០ម៉ឺនដុល្លារ និងមានសមត្ថភាពកែច្នៃសំរាមបាន១០០ទៅ១៥០តោនក្នុង១ថ្ងៃ ហើយគ្រោងនឹងដំណើរការនៅខែសីហានេះ ។
ម៉ាស៊ីនកែច្នៃនេះ ជាបច្ចេកវិទ្យាទំនើប ដែលអាចញែកសំរាមដោយខ្លួន ហើយកិនបំបែកសំរាមផ្ទះបាយ ឬកម្ទេចកំទីបន្លែចេញពីគ្នាដើម្បីផលិតជាជីកំប៉ុស្ត ឬជីសរីរាង្គធម្មជាតិថែមទៀតផង ។
មិនតែប៉ុណ្ណោះ វាមិនត្រឹមតែជួយកាត់បន្ថយគំនរសំរាមនៅលើទីលានប៉ុណ្ណោះទេ វាក៏អាចជួយលើកកម្ពស់វិស័យកសិកម្ម តាមរយៈការប្រើប្រាស់ជីសរីរាង្គធម្មជាតិ ដែលមិនប៉ះពាល់ដល់សុខភាពកសិករ និងសុវត្ថិភាពអ្នកបរិភោគផងដែរ ។
ជាងនេះទៀត សាលារាជធានីភ្នំពេញ ក៏គ្រោងនឹងបញ្ជាទិញម៉ាស៊ីនកែច្នៃសំរាមចំនួន២គ្រឿងបន្ថែមទៀត ដើម្បីឈានទៅកាត់បន្ថយបរិមាណសំរាមនៅទីលានឱ្យបានកាន់តែច្រើន ប្រសិនបើគម្រោងនៃការសាកល្បងម៉ាស៊ីនកែច្នៃដំបូងនេះទទួលបានជោគជ័យ ។ សាលារាជធានីភ្នំពេញ ក៏នៅតែត្រូវការដៃគូវិនិយោគបន្ថែមទៀតក្នុងការកែច្នៃសំរាមឱ្យទៅជាថាមពលអគ្គិសនី ខណៈដែលរណ្តៅសំរាមនៅក្នុងខណ្ឌដង្កោ តំបន់ A និង B ចាប់ផ្តើមពេញណែនលើសចំណុះ ៕
ចែករំលែកព័តមាននេះ