ខេត្តតាកែវ ៖ ពលរដ្ឋក្នុងឃុំបានកាម ស្រុកព្រៃកប្បាស ខេត្តតាកែវ សម្ដែងការព្រួយបារម្ភយ៉ាងខ្លាំង ចំពោះក្រុមឈ្មួញយកគ្រឿងចក្រស្ដារប្រឡាយខុសពីពួកគាត់ស្នើសុំ។ ពលរដ្ឋបានលើកឡើងថា ពួកគាត់ស្នើសុំស្ដារប្រឡាយតាមរយៈលោកមេភូមិ មេឃុំ ដោយស្តារប្រឡាយត្រឹមជ្រៅ១ម៉ែត្រកន្លះទេ តែបែរជាក្រុមឈ្មួញកាយជម្រៅលើសការស្នើសុំ ដើម្បីយកដីលក់។
ពលរដ្ឋបានបន្តទៀតថា ពួកគាត់លែងហ៊ានធ្វើដំណើរតាមខ្នងប្រឡាយក្នុងភូមិដូងខ្ពស់ទៀតហើយ ព្រោះខ្លាចមានគ្រោះថ្នាក់ដោយសារប្រឡាយនេះ ជ្រៅចោទ គ្មានស្ដង់ដារបច្ចេកទេសពីមន្ត្រីជំនាញនោះទេ។ ចំណែកចៅហ្វាយស្រុក ក៏មិនដែលចុះមកដល់ទីតាំងស្ដារប្រឡាយនេះដែរ ពួកគាត់លើកឡើងទៀតថា ចាំមើល! នៅរដូវវស្សា ភ្លៀងធ្លាក់មក ប្រឡាយចោទជ្រៅ នេះនឹងបាក់ដី បាក់ផ្លូវ ហើយនឹងមានក្មេងៗជាច្រើននាក់ បើមិនប្រយ័ត្ននឹងធ្លាក់ទឹក។
ពាក់ព័ន្ធករណីខាងលើ លោក ឌឹម គឹមសាន្ត ចៅហ្វាយស្រុកព្រៃកប្បាស បានអោយដឹងថា លោកពិតជាបានឃើញពាក្យសុំពីពលរដ្ឋស្នើសុំស្ដារប្រឡាយនៅចំណុចខាងលើពិតមែន គឺសុំស្ដារជម្រៅត្រឹមតែ១ម៉ែត្រកន្លះនោះទេ ហើយក៏បានអនុញ្ញាតិអោយ និងបានប្រាប់ទៅខាងបច្ចេកទេសអោយតាមដានមើលបន្ថែមទៀត ជាពិសេសលោកមេឃុំបានកាម ត្រូវត្រួតពិនិត្យយ៉ាងយកចិត្តទុកដាក់ និងរាយការណ៍មកសាលាស្រុកវិញ បើក្រុមឈ្មួញមិនអនុវត្តតាមការស្នើសុំរបស់ពលរដ្ឋ។
បើយោងតាមប្រភពពីប្រជាពលរដ្ឋបានអោយដឹងថា តាមពិតថៅកែគ្រឿងចក្រ គេកាយតាមការស្នើសុំ តែមកពីលោក នៅ រ៉ន មន្ត្រីធនធានទឹកស្រុកព្រៃកប្បាស ជាអ្នកបញ្ជាអោយថៅកែគ្រឿងចក្រកាយអោយជ្រៅជាងការស្នើសុំរបស់ពួកគាត់ ដើម្បីបានអាចម៌ដីលក់ច្រើន ហើយបានលុយយកទៅចែកគ្នាចាយ។
ពលរដ្ឋនាំគ្នាសំណូមពរដល់លោក អ៊ូច ភា អភិបាលខេត្តតាកែវ មេត្តាតាមដានការងាររបស់លោក ឌឹម គឺមសាន្ត ចៅហ្វាយស្រុកព្រៃកប្បាសផង ចំពោះរឿងអនុញ្ញាតិអោយឈ្មួញកាយប្រឡាយ១ម៉ែត្រកន្លះ តែដល់ក្រុមឈ្មួយកាយលើស រអៀសខ្លួនមិនព្រមចុះមកត្រួតពិនិត្យ តើដឹកនាំបម្រើរាស្ត្ររបៀបម៉េចនឹង?។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ