កុមារដែលឪពុកម្តាយលែងលះគ្នាប្រឈមមុននឹងបញ្ហាសុខភាពទ្វេដង ជាងកុមារដែលមកពីគ្រួសារមានសុភមង្គល ។ នេះបើតាមការស្រាវជ្រាវថ្មី ។ ការសិក្សានេះបានរកឃើញថា ការលែងលះធ្វើឲ្យកុមារមានហានិភ័យទ្វេដងក្នុងការវិវឍ្ឍទៅជាបញ្ហាពោះវៀន បញ្ហាស្បែក ប្រព័ន្ធសរសៃប្រសាទ និងសូម្បីតែប្រដាប់ភេទរបស់ពួកគេ និងសរីរាង្គទឹកនោម ។
ក្រុមអ្នកជំនាញជឿថា វាជារបៀបដែលឪពុកម្តាយដោះស្រាយស្ថានភាពនេះ មិនមែនជាការលែងលះនោះទេ ដែលបណ្តាលឲ្យមានផលប៉ះពាល់ដល់សុខភាពនេះ ។
អ្នកដឹកនាំការសិក្សាលោកស្រី María Dolores Seijo Martínez នៅសាកលវិទ្យាល័យ Santiago de Compostela ក្នុងប្រទេសអេស្ប៉ាញនិយាយថា វាមិនមែនជាការលែងលះទេដែលមានផលប៉ះពាល់អវិជ្ជមានចំពោះសុខភាពរបស់កុមារ ប៉ុន្តែការគ្រប់គ្រងស្ថានភាពនេះមិនត្រឹមត្រូវជាមូលហេតុដែលធ្វើឲ្យមានផលប៉ះពាល់ដល់សុខភាពរបស់កុមារ ។
ការដោះស្រាយបញ្ហាលែងលះមិនល្អពាក់ព័ន្ធនឹងជម្លោះជាច្រើនរវាងឪពុក និងម្តាយ ធ្វើឱ្យវាមានការលំបាកក្នុងការរក្សាការទាក់ទងល្អរវាងពួកគេ ។ ប្រសិនបើកុមារប្រឈមមុខនឹងស្ថានភាពគ្រួសារបែបនេះក្នុងរយៈពេលយូរ ពួកគេនឹងប្រឈមនឹងភាពតានតឹងដ៏ខ្លាំង ។
ភាពតានតឹងដ៏ខ្លាំង និងអូសបន្លាយអស់រយៈពេលយូរជាមូលហេតុសំខាន់ដែលធ្វើឲ្យសុខភាពរបស់កុមារធ្លាក់ចុះ ។
លោកស្រីMaría Dolores Seijo Martínez និយាយថា ៖ «យើងចាំបាច់ត្រូវគាំទ្រដល់ក្រុមគ្រួសារដើម្បីកាត់បន្ថយផលវិបាកទាំងនេះចំពោះកុមារ ។ អ្នកជំនាញក្នុងការទាក់ទងដោយផ្ទាល់ជាមួយកុមារ ដូចជាអ្នកថែទាំសុខភាព ឬបុគ្គលិករបស់សាលារៀនមានតួនាទីយ៉ាងសំខាន់ក្នុងការកាត់បន្ថយភាពតានតឹងដែលប៉ះពាល់ដល់សុខភាពរបស់កុមារ ដោយសារពួកគេមានមុខងារក្នុងការការពារ និងទប់ស្កាត់បញ្ហា ផ្សេងៗចំពោះកុមារ »៕
ចែករំលែកព័តមាននេះ