ខេត្តព្រះវិហារ ៖ រមណីយដ្ឋានទេសចរណ៍ទឹកធ្លាក់ធម្មជាតិព្រះនិម្មិតនៅទន្លេមេគង្គលើ ស្ថិតក្នុងភូមិកំពង់សាមី ឃុំកំពង់ស្រឡៅ២ ស្រុកឆែប ជាប់នឹងព្រំប្រទល់ប្រទេសឡាវ ដែលមានចម្ងាយប្រមាណ១៣៤គីឡូម៉ែត្រពីទីប្រជុំជនក្រុងព្រះវិហារ ឆ្នាំនេះមានភ្ញៀវទេសចរជាតិ និងអន្ដរជាតិនាំគ្នាទៅកម្សាន្តក្នុងឱកាសបុណ្យចូលឆ្នាំថ្មីប្រពៃណីជាតិជាច្រើនពាន់នាក់ក្នុងមួយថ្ងៃៗ ក្រោយពីផ្លូវគមនាគមន៍តភ្ជាប់ពីតំបន់នានាឆ្ពោះទៅកាន់តំបន់នោះបានស្ថាបនារួចរាល់ ។
រមណីយដ្ឋានទឹកធ្លាក់ធម្មជាតិព្រះនិម្មិត គឺមានទឹកធ្លាក់គ្រប់រដូវកាលនិងមានព្រៃឈើធម្មជាតិយ៉ាងច្រើន ។ ទឹកធ្លាក់ធម្មជាតិក្នុងទន្លេមេគង្គនេះមិនចេះរីងស្ងួតទេ ទាំងរដូវប្រាំងនិងរដូវវស្សា គឺជាកន្លែងកម្សាន្តជាមួយនឹងសម្រស់ធម្មជាតិតាំងតែពីយូរលង់ណាស់មកហើយនៅក្នុងទឹកដីនៃព្រះរាជាណាចក្រកម្ពុជា ប៉ុន្ដែកន្លងទៅ ដោយសារតែប្រទេសយើងមានសង្គ្រាមអស់ជិត៣ទសវត្ស ទើបមិនអាចធ្វើការអភិវឌ្ឍហេដ្ឋារចនាសម័្ពន្ធផ្លូវគមនាគមន៍ទៅកាន់តំបន់នេះបាន ។
លោកអ៊ុំ ម៉ារ៉ា អភិបាលខេត្ដបានមានប្រសាសន៍ថា ព្រះវិហារ គឺជាខេត្ដមួយសំបូរទៅដោយសក្ដានុពលទេសចរណ៍ ក្នុងនោះមានប្រាង្គប្រាសាទដែលជាសម្បត្តិវប្បធម៌បន្សល់ទុកចំនួន២៤១ប្រាសាទ និងមានព្រៃឈើធម្មជាតិដែលដុះនៅពាសពេញភូមិសាស្ដ្រខេត្ដ ។ ថ្មីៗនេះទៀត ខេត្ដបានរៀបចំរមណីយដ្ឋានទឹកធ្លាក់ធម្មជាតិមួយន្លែងយ៉ាងធំ បន្ទាប់ពីរាជរដ្ឋាភិបាលមានយុទ្ធសាស្រ្តក្នុងការអភិវឌ្ឍផ្លូវគមនាគមន៍ជាប្រវត្ដិសាស្ដ្រទៅកាន់តំបន់ព្រំដែនឡាវ។សម្រាប់ភ្ញៀវទេសចរជាតិ និងអន្ដរជាតិដែលចង់ទៅកម្សាន្តមិនថាតែរដូវប្រាំង ឬវស្សាទេ គឺអាចទៅទស្សនាបានគ្រប់រដូវកាលដោយសារតំបន់នោះបានស្ថាបនាផ្លូវគមនាគមន៍រួចរាល់ហើយ ។ លោកអភិបាលខេត្តបានឱ្យដឹងទៀតថា ការអភិវឌ្ឍផ្លូវគមនាគមន៍ទៅដល់ព្រំប្រទល់ប្រទេសឡាវ និងការអភិវឌ្ឍតំបន់រមណីយដ្ឋានទឹកធ្លាក់ធម្មជាតិក្នុងទន្លេមេគង្គលើ បានសបញ្ជាក់ឱ្យឃើញពីការអភិវឌ្ឍជឿនលឿនមួយក្នុងការស្ដារ និងជួយកាត់បន្ថយភាពក្រីក្រដល់ប្រជាពលរដ្ឋខ្មែររស់នៅក្នុងតំបន់ដាច់ស្រយាល ។
ភ្ញៀវទេសចររាប់ពាន់នាក់ដែលបានទៅដល់ទីនោះនិយាយថា ការអភិវឌ្ឍតំបន់ដាច់ស្រយាលជាប់ព្រំដែនប្រទេសឡាវមិនត្រឹមតែបង្កើនការយល់ដឹង និងជួយកាត់បន្ថយភាពក្រីក្រដល់ប្រជាពលរដ្ឋក្នុងតំបន់នោះប៉ុណ្ណោះទេ គឺនៅថ្ងៃអនាគតតំបន់នោះពិតជានឹងក្លាយទៅជាតំបន់ធ្វើពាណិជ្ជកម្មឆ្លងដែនរវាងប្រទេសទាំងពីរ កម្ពុជា-ឡាវដ៏ធំទៀតផង ។ អ្នកទេសចរដែលចូលទៅដល់ទីនោះបានដឹងច្បាស់ថា កូនខ្មែរទាំងអស់ដែលរស់នៅក្នុងតំបន់ដាច់ស្រយាលនោះ៩៥% មិនចេះនិយាយភាសាខ្មែរទេ គឺពួកគេនិយាយតែភាសាឡាវ ព្រោះហាក់ដូចជានៅឆ្ងាយដាច់ស្រយាលខ្លាំង គ្មានទំនាក់ទំនងគ្នារវាងខ្មែរនឹងខ្មែរដោយសាតែកន្លងមកគ្មានផ្លូវគមនាគមន៍អាចធ្វើចរាចរណ៍ទៅដល់ទីនោះបាន ។
ការអភិវឌ្ឍផ្លូវគមនាគមន៍និងតំបន់ទេសចរណ៍ទៅកាន់ព្រំដែនឡាវនាពេលនេះ គឺនាំមកនូវផលប្រយោជន៍យ៉ាងធំធេងសម្រាប់ប្រជាពលរដ្ឋខ្មែរក៏ដូចជារាជរដ្ឋាភិបាលកម្ពុជា ដែលបានអនុវត្ដយុទ្ធសាស្ត្រចតុកោណដំណាក់កាលទី២ ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ។
លោកគង់ វិបុល ប្រធានមន្ទីរទេសចរណ៍ខេត្ដឱ្យដឹងដែរថា ទោះជាតំបន់នេះ ទើបតែមានការអភិវឌ្ឍក៏ដោយ ក៏មន្ទីរទេសចរណ៍ខេត្ដរួមជាមួយអាជ្ញាធរខេត្ដ និងអាជ្ញាធរមូលដ្ឋានបានយកអស់ស្មារតីក្នុងការអភិវឌ្ឍរមណីយដ្ឋានទេសចរណ៍ព្រះនិមិ្មតក្នុងឃុំកំពង់ស្រឡៅដែលមានព្រំប្រទល់ជាប់ឃុំព្រះរំកិល ស្រុកថាឡាបរិវ៉ាត់ ខេត្ដស្ទឹងត្រែង និងម្ខាងទន្លេជាប់ស្រុកមឿងខូង ប្រទេសឡាវ ដើម្បីឱ្យតំបន់នោះក្លាយទៅជាតំបន់ទេសចរណ៍ដ៏ធំមួយ សម្រាប់ទាក់ទាញភ្ញៀវទេសចរជាតិនិងអន្ដរជាតិចូលទៅកម្សាន្តដោយមិនគិតពេលវេលា គឺអាចធ្វើដំណើរចូលទៅកម្សាន្ដបានគ្រប់រដូវកាល ។ លោកគង់ វិបុល បានបន្តថា ក្នុងឱកាសបុណ្យចូលឆ្នាំថ្មីប្រពៃណីជាតិថ្មីៗកន្លងទៅរយៈពេលបីថ្ងៃចាប់ពីថ្ងៃទី១៤ មេសា ដល់ថ្ងៃទី១៦ មេសា ភ្ញៀវចូលទៅកម្សាន្ដទីនោះទាំងភ្ញៀវជាតិ និងអន្ដរជាតិមានចំនួន៦.៧៦៨នាក់ រថយន្ដមានចំនួន៤៦២គ្រឿង និងម៉ូតូចំនួន១.៤៤៧គ្រឿង ដែលទៅពីគ្រប់បណ្ដាខេត្ដ-ក្រុងនៅទូទាំងប្រទេស ។ ពេលនេះមន្ទីរទេសចរណ៍ខេត្ដ កំពុងបន្ដរៀបចំ និងសាងសង់ក្យូសសម្រាប់ភ្ញៀវអង្គុយលេង សាងសង់បន្ទប់អនាម័យ និងសាងសង់បន្ទប់សម្រាប់ស្រី្តផ្លាស់សម្លៀកបំពាក់ឱ្យបានសមរម្យ មានសណ្ដាប់ធ្នាប់ ព្រោះជាទីកន្លែងមុជទឹកកម្សាន្តដ៏មនោរម្យ ៕
ចែករំលែកព័តមាននេះ