រាជធានីភ្នំពេញ ៖ ក្នុងសន្និសីទសារព័ត៌មានស្តីពីការប្រកាសដាក់បញ្ចាំងភាពយន្តបុរាណខ្មែរ«ហ្លួងព្រះស្តេចកន» តារាភាពយន្តជើងចាស់អ្នកស្រីឌី សាវ៉េត បានសម្តែងក្តីរីករាយដែលផលិតករជើងចាស់លោកម៉ៅ អាយុទ្ធ
រាជធានីភ្នំពេញ ៖ ក្នុងសន្និសីទសារព័ត៌មានស្តីពីការប្រកាសដាក់បញ្ចាំងភាពយន្តបុរាណខ្មែរ«ហ្លួងព្រះស្តេចកន» តារាភាពយន្តជើងចាស់អ្នកស្រីឌី សាវ៉េត បានសម្តែងក្តីរីករាយដែលផលិតករជើងចាស់លោកម៉ៅ អាយុទ្ធ បង្កើតស្នាដៃដ៏អស្ចារ្យដើម្បីជាតិខ្មែរ ។ ដូច្នេះហើយអ្នកស្រីឌី សាវ៉េត ស្នើឱ្យបំពាក់មេដាយមាសដាំត្បូងពេជ្រជូនលោកម៉ៅ អាយុទ្ធ ។
អ្នកស្រីឌី សាវ៉េត បានចូលរួមសម្តែងជាតួអង្គម្តាយស្តេចកន ហើយបានដឹងពីផលលំបាកជាច្រើនរបស់លោកម៉ៅ អាយុទ្ឋ ជាផលិតករនិងអ្នកដឹកនាំរឿង ។ លោកម៉ៅ អាយុទ្ធ បានបូជាកម្លាំងកាយចិត្តផលិតភាពយន្តរឿង«ហ្លួងព្រះស្តេចកន»ឱ្យមានភាពលេចធ្លោស្របពេលដែលរឿងនេះជារឿងបែបប្រវត្តិសាស្ត្រដ៏ល្បីមួយរបស់ខ្មែរ ។
អ្នកស្រីឌី សាវ៉េត ថ្លែងថា«បើអាចខ្ញុំចង់ឱ្យអ្នកមានលុយកាក់ធូរធារជួយ ឬអ្នកពាក់ព័ន្ឋនានាជួយរៀបចំជាមេដាយមាសដាំពេជ្រមួយនៅកណ្តាលជូនដល់លោកម៉ៅ អាយុទ្ឋ ដែលលោកខំប្រឹងណាស់ក្នុងការផលិតរឿងមួយនេះ ដែលជារឿងមិនធម្មតានោះឡើយ បើមិនមានការល្អិនល្អន ់គិតពិចារណាឱ្យបានច្រើននោះទេ ពិតជាមិនអាចទៅរួចឡើយ ។ នេះក៏ដើម្បីលើកទឹកចិត្តដល់ផលិតករខ្មែរគ្រប់រូបឱ្យខិតខំលើកស្ទួយមានគំនិតអភិវឌ្ឍន៍ជាបន្តទៀតដើម្បីកុនខ្មែរដើរទៅមុខ» ។
លោកម៉ៅ អាយុទ្ឋ មិនហ៊ានទទួលយកអ្វីដែលអ្នកស្រីឌី សាវ៉េត ចង់ផ្តល់ឱ្យលោកនោះទេ។ លោកគ្រាន់តែស្នើឱ្យយុវជន និងជនរួមជាតិចូលរួមទស្សនាភាពយន្តរឿង«ហ្លួងព្រះស្តេចកន»ដើម្បីវិនិច្ឆ័យថាស្នាដៃភាពយន្តខ្មែរក្នុងសម័យជឿនលឿននេះរីកចម្រើនដល់កម្រិតណា ។
លោកម៉ៅ អាយុទ្ធ ថ្លែងថា«ការព្យាយាមរបស់ខ្ញុំ គឺប្រឹងអស់ពីលទ្ឋភាព ហើយបើបរាជ័យគឺក៏បរាជ័យជាមួយអ្នកមានជំនាញ និងភាពច្បាស់លាស់ ហើយខ្ញុំសុំតែម្យ៉ាងទេគឺសុខភាពបើសុខភាពនៅដើរបានមានភាពមាំទាំល្អ ខ្ញុំនឹងពុះពាររកស្នាដៃ ថ្មីៗជាបន្តទៀតជូនយុវជនខ្មែរព្រោះវិនាទីជរានេះគ្មានប្រាថ្នាអ្វីក្រៅពីការចារទុកស្នាដៃជូនកូនខ្មែរ ប្រទេសជាតិខ្មែរ ហើយខ្ញុំពិតជាស្រឡាញ់ការងារភាពយន្តនេះណាស់» ។
ភាពយន្តរឿង«ហ្លួងព្រះស្តេចកន»សម្ពោធនៅថ្ងៃទី១៧ សីហា ដើម្បីដាក់បញ្ចាំងនៅតាមរោងកុននានា នាថ្ងៃទី១៨ សីហា ឆ្នាំ២០១៧នៅរោងភាពយន្តLegen Major Cineplex បារាយអណ្តែតខេត្តសៀមរាប និងPlatinum Cineplexសៀមរាប ៕
ចែករំលែកព័តមាននេះ