ការធ្វើអាជីវកម្មទិញសិទ្ធិបន្តចាប់ផ្តើមលូតលាស់នៅកម្ពុជា
រាជធានីភ្នំពេញ ៖ ការធ្វើអាជីវកម្មទិញសិទ្ធិ ឬហៅថា Franchise ត្រូវបានគេទទួលស្គាល់ថា ជាអាជីវកម្មមួយដែលមានឈ្មោះ ឬម៉ាកយីហោរួចជាស្រេច ព្រមទាំងមានឈ្មោះល្បីល្បាញ និង
រាជធានីភ្នំពេញ ៖ ការធ្វើអាជីវកម្មទិញសិទ្ធិ ឬហៅថា Franchise ត្រូវបានគេទទួលស្គាល់ថា ជាអាជីវកម្មមួយដែលមានឈ្មោះ ឬម៉ាកយីហោរួចជាស្រេច ព្រមទាំងមានឈ្មោះល្បីល្បាញ និងអាចរកប្រាក់ចំណេញបានច្រើន។ នៅកម្ពុជាប៉ុន្មានឆ្នាំចុងក្រោយនេះឃើញថា អាជីវកម្មមួយនេះបាននិងកំពុងចាប់ផ្តើមរីកលូតលាស់គួរឲ្យកត់សម្គាល់ ដោយសារតែមានម៉ាកយីហោល្បីៗបរទេសមួយចំនួនត្រូវបានទិញសិទ្ធិមកធ្វើអាជីវកម្ម ខណៈដែលអាជីវកម្មក្នុងស្រុកខ្លះ ក៏គ្រោងលក់សិទ្ធិបន្ដទៅឲ្យដៃគូដើម្បីធ្វើអាជីវកម្មផងដែរ ។
នាយកគ្រប់គ្រងទូទៅនៃក្រុមហ៊ុន EFG លោក ទេប វីរៈ មានប្រសាសន៍ថា បើមើលទីផ្សារទូទៅមានការកើនពី១០ទៅ១៥%ក្នុង១ឆ្នាំ នារយៈពេល៥ឆ្នាំចុងក្រោយនេះ ព្រោះមានម៉ាកយីហោអាជីវកម្មតូច-ធំច្រើនបានចូលមកកម្ពុជា ។
លោកថ្លែងថា ៖« ដូចយើងឃើញនៅលើទីផ្សារទាំងអស់គ្នាហើយថា ខាងហាងកាហ្វេ Amazon គាត់លក់សិទ្ធិ Franchise ដល់អ្នកក្នុងស្រុក ឃើញមានច្រើន ព្រោះប្រជាជនគិតថា ម៉ាកដែលល្បីនេះអាចឱ្យអាជីវកម្មគាត់រីកចម្រើន ហើយនៅពេលខាងមុខ ParkCafe គាត់កំពុងរៀបចំលក់ Franchise នៅក្នុងស្រុកដែរ » ។
លោកបន្តថា ៖« ការទិញសិទ្ធិធ្វើអាជីវកម្មបន្ត ជាធម្មតា ការធ្វើអាជីវកម្មបែបហ្នឹងងាយនឹងជោគជ័យ ព្រោះអ្នកលក់សិទ្ធិឱ្យយើង គាត់នៅជួយយើងពីខាងក្រោយ តែសម្រាប់បុគ្គល ឬក្រុមហ៊ុនមួយចង់ធ្វើឱ្យអាជីវកម្មជោគជ័យ វាត្រូវការពេលវេលាយូរណាស់ អ្នកខ្លះចាប់ផ្តើមអាជីវកម្មមិនបានប៉ុន្មានខែផងដួលរំលំទៅវិញក៏មាន ដោយសារការធ្វើមិនបានល្អ » ។
ការទិញសិទ្ធិជំនួយបែបនេះ មានអត្ថប្រយោជន៍សំខាន់ណាស់ ព្រោះអ្នករកស៊ីមិនចាំបាច់ខំប្រឹងប្រែងបង្កើតផលិតផលថ្មី ហើយផ្សព្វផ្សាយរកទីផ្សារ ដែលត្រូវការពេលវេលាយូរ ។ គេមានមុខជំនួញ និងទីផ្សាររួចជាស្រេច អាចដំណើរការលក់ដូរភ្លាមបានតែម្ដង ។ អ្វីដែលសំខាន់ គឺត្រូវធ្វើយ៉ាងណា ឲ្យផលិតផលនោះនៅមានគុណភាពដូចផលិតផលដើម ។
ដូច្នេះ បើអ្នកមានលុយច្រើនហើយចង់បើកមុខជំនួញនោះ អាចរកទិញសិទ្ធិជំនួញដើម្បីបើកមុខរបរ ។ ការទិញសិទ្ធិនេះ ថ្វីដ្បិតតែចំណាយប្រាក់ច្រើនបន្ដិច ប៉ុន្ដែមិនសូវគ្រោះថ្នាក់នៅក្នុងការរកស៊ីទេ ដោយហេតុថា ផលិតផលនោះវាល្បីស្រាប់ទៅហើយ ហើយក៏មានម្ចាស់ដើមជាអ្នកជួយទំនុកបម្រុងផងដែរ ។
ទោះបីយ៉ាងណា លោក ទេប វីរៈ ជំរុញឱ្យអ្នកដែលចង់ទិញសិទ្ធិពីក្រុមហ៊ុននាំចូលម៉ាកយីហោ ឬអាជីវកម្មក្នុងស្រុកណាមួយ គួរតែសិក្សាឲ្យបានល្អិតល្អន់ ដើម្បីជៀសវាងកុំឱ្យទឹកប្រាក់ដែលចំណាយទិញសិទ្ធិហើយ បែរជាអាជីវកម្មលក់អត់ដាច់ ហើយមិនដឹងពេលណា ទើបស្រង់បានមកវិញ ៕
ចែករំលែកព័តមាននេះ