CCW និង GMAC ស្វាគមន៍ផែនការចុះជួបកម្មករតាមបណ្តារោងចក្រ
រាជធានីភ្នំពេញ ៖ ការសម្រេចចុះជួប និងពិនិត្យមើលពីស្ថានភាពការងារ និងការរស់នៅរបស់បងប្អូនកម្មករ-កម្មការិនី ដើម្បីឈ្វេងយល់ពីសុខទុក្ខ និងតម្រូវការនានាពីសំណាក់ប្រមុខ
រាជធានីភ្នំពេញ ៖ ការសម្រេចចុះជួប និងពិនិត្យមើលពីស្ថានភាពការងារ និងការរស់នៅរបស់បងប្អូនកម្មករ-កម្មការិនី ដើម្បីឈ្វេងយល់ពីសុខទុក្ខ និងតម្រូវការនានាពីសំណាក់ប្រមុខ
រាជធានីភ្នំពេញ ៖ ការសម្រេចចុះជួប និងពិនិត្យមើលពីស្ថានភាពការងារ និងការរស់នៅរបស់បងប្អូនកម្មករ-កម្មការិនី ដើម្បីឈ្វេងយល់ពីសុខទុក្ខ និងតម្រូវការនានាពីសំណាក់ប្រមុខរាជរដ្ឋាភិបាលកម្ពុជា ដែលគ្រោងយកថ្ងៃអាទិត្យរៀងរាល់សប្ដាហ៍ ចាប់ពីថ្ងៃទី២០ សីហា ឆ្នាំ២០១៧ តទៅ ត្រូវបានស្វាគមន៍ពីសហភាពចលនាកម្មករកម្ពុជា ហៅកាត់ថា (CCW) និងសមាគមកាត់ដេរនៅកម្ពុជា ហៅកាត់ថា (GMAC) ។
អគ្គលេខាធិការនៃសហភាពចលនាកម្មករកម្ពុជា បានឲ្យដឹងតាមទូរស័ព្ទកាលពីថ្ងៃទី៦ សីហា ថា វាជាឱកាសល្អ និងជាកិត្តិយសណាស់សម្រាប់បងប្អូនកម្មករ-កម្មការិនី ដែលថ្នាក់ដឹកនាំកំពូលបានចំណាយពេលដ៏មមាញឹកចុះមកដល់ទីតាំង និងកន្លែងធ្វើការដើម្បីដឹងពីស្ថានភាពផ្ទាល់បែបនេះ ។
លោក ព្រាប មុន្នីសុវណ្ណ អគ្គលេខាធិការរូបនេះបានថ្លែងថា ៖« ខ្ញុំគិតថា វាជារឿងល្អមែនទែនដែលរាជរដ្ឋាភិបាលបានគិតគូរពីបញ្ហាសុខទុក្ខដល់កម្មករ ពិសេស គឺសម្ដេចអគ្គមហាសេនាបតីតេជោ ហ៊ុន សែន ដែលលោកជានាយករដ្ឋមន្ត្រី បានចំណាយពេលដ៏មានតម្លៃចុះមកពិនិត្យផ្ទាល់ទៀត ខណៈដែលសម្តេចកំពុងតែមមាញឹកខ្លាំងទៅលើកិច្ចការប្រទេសជាតិ។ និយាយរួមទៅ កម្រមានណាស់ នៅក្នុងស្រុកខ្មែរយើង អត់ធ្លាប់មានទេដែលថ្នាក់ដឹកនាំកំពូលចុះជួបកម្មករ-កម្មការិនីតាមរោងចក្របែបនេះ » ។
លោកបន្ដថា ៖« ខ្ញុំគ្រាន់តែឃើញព័ត៌មាននេះភ្លាម ខ្ញុំមានក្ដីរំភើបជួសតំណាងបងប្អូនកម្មករនិយោជិតទៅហើយ ដោយសារតែនេះជាដំណឹងមួយល្អសម្រាប់បងប្អូនដែលកំពុងបម្រើការក្នុងវិស័យកាត់ដេរ » ។
លោកមុន្នីសុវណ្ណ ក៏បានលើកឡើងផងដែរថា ផែនការចុះសួរសុខទុក្ខបងប្អូនកម្មករនិយោជិតនាពេលនេះ គឺធ្វើឡើងដោយឆន្ទៈរបស់ប្រមុខថា្នក់ដឹកនាំកំពូល ដែលតែងតែគិតគូរពីសុខទុក្ខរបស់ប្រជាពលរដ្ឋ និងមិនជាប់ពាក់ព័ន្ធនឹងនយោបាយបោះឆ្នោតឆ្នាំ២០១៨ខាងមុខនោះទេ ។
លោកថ្លែងថា ៖« ខ្ញុំគិតថា ការចុះនេះវាមិនមានអ្វីចម្លែកទេ ដោយសារតែសម្ដេចតែងតែចុះជួបបងប្អូនប្រជាពលរដ្ឋទូទៅដែលជួបការលំបាកជារឿយៗ ហើយនេះគឺជាបេសកកម្មរបស់សម្ដេច ដែលតែងខ្វល់ខ្វាយពីសុខទុក្ខរបស់ពលរដ្ឋទាំងមូល ។ អីចឹង ខ្ញុំគិតថា វាមិនពាក់ព័ន្ធនឹងនយោបាយបោះឆ្នោតអីទេ » ។
ពាក់ព័ន្ធនឹងការដំឡើងប្រាក់ឈ្នួលអប្បបរមាឆ្នាំ២០១៨វិញ អគ្គលេខាធិការសហភាពចលនាកម្មករកម្ពុជារូបនេះបានបង្ហើបថា នឹងមានការដំឡើងក្នុងកម្រិតណាមួយ ក្រោយពីបញ្ចប់ការចរចានាពេលខាងមុខ ។
លោកបញ្ជាក់ថា ៖« ពាក់ព័ន្ធនឹងប្រាក់ឈ្នួលអប្បបរមាវិញ ថ្វីដ្បិតតែវាមិនខ្ពស់ជាងប្រទេសដទៃ ប៉ុន្ដែគឺបានដំឡើងជាបន្ដបន្ទាប់ ហើយខ្ញុំជឿជាក់ថា អាចនឹងឡើងបន្ថែមទៀត ប៉ុន្ដែត្រង់ថាដំឡើងបានកម្រិតណា យើងមិនទាន់អាចកំណត់បានទេ ព្រោះតែកំពុងស្ថិតក្នុងដំណើរការនៃការចរចា ហើយយើងក៏មិនទាមទារអ្វីឲ្យលើសដោយមិនគិតពីផលប្រយោជន៍ខាងនិយោជកដែរ ដោយហេតុថា យើងតែងតែសិក្សាអំពីគម្លាតរវាងនិយោជក និងសហជីពកម្មករ ដែលមានរាជរដ្ឋាភិបាលជាអ្នកសម្របសម្រួល ព្រោះអីយើងក៏គិតគូរដែរពាក់ព័ន្ធនឹងបញ្ហារបស់វិនិយោគិនដែលមកវិនិយោគនៅខ្មែរយើង។ អីចឹងយើងមិនចង់ឲ្យមានការបាត់បង់ ឬចន្លោះប្រហោងណាមួយទេ ហើយបច្ចុប្បន្ននេះ យើងអត់មានយកបាតុកម្ម កូដកម្ម មកប្រើជាគោលដៅក្នុងការគំរាមកំហែងរាជរដ្ឋាភិបាល ឬក៏គំរាមកំហែងខាងភាគីនិយោជកនោះទេ ។ យើងមានតែយន្ដការមួយគត់ គឺការចរចា ដែលហៅថា ជាកិច្ចសន្ទនាសង្គម » ។
ស្របជាមួយការលើកឡើងរបស់អគ្គលេខាធិការនៃសហភាពចលនាកម្មករកម្ពុជា សមាគមកាត់ដេរនៅកម្ពុជា ដែលហៅកាត់ថា (GMAC) បានសម្ដែងនូវការស្វាគមន៍ផែនការនេះផងដែរ ។
អគ្គលេខាធិការរងនៃសមាគមរោងចក្រកាត់ដេរនៅកម្ពុជា លោក កាំង ម៉ូនីកា បានអបអរសាទរចំពោះផែនការរបស់ប្រមុខរាជរដ្ឋាភិបាលនាពេលនេះ ដោយលោកបានលើកឡើងក្នុងសេចក្ដីប្រកាសព័ត៌មានមួយកាលពីថ្ងៃទី៥ សីហា ថា ផែនការធ្វើទស្សនកិច្ចនេះ គឺជាការមានទំនាក់ទំនងដោយផ្ទាល់ ការយកចិត្តទុកដាក់ និងការគិតគូរពីសុខទុក្ខពីសំណាក់ប្រមុខថ្នាក់ដឹកនាំរបស់ព្រះរាជាណាចក្រកម្ពុជាចំពោះបងប្អូនកម្មករ-កម្មការិនី ។
លោកម៉ូនីកា មានប្រសាសន៍ថា ៖« ខ្ញុំយល់ឃើញថា ផែនការរបស់សម្តេចក្នុងការជួបសំណេះសំណាល និងចុះដោយផ្ទាល់នេះ គឺជារឿងល្អមួយ ។កាយវិការនេះ នឹងបង្ហាញពីការយកចិត្តទុកដាក់បន្ថែមពីថ្នាក់ដឹកនាំចំពោះបងប្អូនកម្មករ-កម្មការិនី ហើយវាពិតជាមានសារសំខាន់ណាស់ ដែលសម្តេចនឹងបានយល់ច្បាស់អំពីស្ថានភាពរបស់បងប្អូនកម្មករ-កម្មការិនីរបស់យើង ទាំងការលើកកម្ពស់ជីវភាពរស់នៅរបស់បងប្អូនកម្មករ-កម្មការិនី និងអំពីស្ថានភាពរបស់រោងចក្រនានា ដើម្បីផ្តល់ជាអនុសាសន៍ក្នុងការធ្វើឱ្យកាន់តែប្រសើរឡើងបន្ថែមទៀត » ។
លោកបន្ថែមថា សមាគមក៏សង្ឃឹមផងដែរថា ក្នុងឱកាសដែលសម្តេចនាយករដ្ឋមន្ត្រីជាមួយកម្មករ-កម្មការិនីនេះ នឹងអាចមានកិច្ចប្រជុំដោយផ្ទាល់ជាមួយថៅកែ និងម្ចាស់រោងចក្រ ។
លោក ម៉ូនីកា លើកឡើងថា ៖« ខ្ញុំគិតថា វាពិតជាមានសារសំខាន់ ប្រសិនបើសម្តេចតេជោមានគម្រោងជួបជាមួយនឹងក្រុមម្ចាស់រោងចក្រ ឬវិនិយោគិន ។ វាមានសារសំខាន់ផងដែរ ប្រសិនបើសម្តេចជួបជជែកដោយផ្ទាល់ទៅកាន់វិនិយោគិនដែលបានរួមចំណែកយ៉ាងច្រើនដល់សេដ្ឋកិច្ចកម្ពុជា ហើយសម្តេចក៏នឹងទទួលបានព័ត៌មានបន្ថែមអំពីបញ្ហាប្រឈមដែលពួកគេកំពុងជួបប្រទះក្នុងវិស័យនេះ ដូចជា លើការផ្លាស់ប្តូរសេដ្ឋកិច្ចពិភពលោក និងការប្រកួតប្រជែងខ្លាំងពីបណ្តាប្រទេសនានា ដែលនេះគឺជាការគាំទ្ររបស់រដ្ឋាភិបាលដ៏មានសារសំខាន់មួយ ដើម្បីទ្រទ្រង់ និងជាការលើកទឹកចិត្តឲ្យរក្សាបាននូវភាពរីកចម្រើន និងនិរន្តរភាពនៃវិស័យនេះ » ។
យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) បានឱ្យដឹងថា ការនាំចេញសម្លៀកបំពាក់ និងស្បែកជើង ដែលតំណាងឲ្យ៧៨ភាគរយនៃការនាំចេញសរុបរបស់ប្រទេសកម្ពុជា បានកើនឡើង៧,២ភាគរយ ស្មើនឹង៧,៣ពាន់លានដុល្លារនៅឆ្នាំ២០១៦ កើនឡើងពី៦,៨ពាន់លានដុល្លារក្នុងឆ្នាំ២០១៥ ។
យោងតាមទិន្នន័យពីសមាគមរោងចក្រកាត់ដេរកម្ពុជា (GMAC) បច្ចុប្បន្ន សមាគមនេះមានសមាជិកចំនួន៥១២ ដោយក្នុងចំណោម៥៩ក្នុងវិស័យស្បែកជើង ហើយវិស័យនេះបានស្រូបយកការងារជាង៧០ម៉ឺននាក់ ៕
ចែករំលែកព័តមាននេះ