រាជធានីភ្នំពេញ ៖ បុគ្គលគ្រប់រូបតែងមានគោលដៅ និងផែនការបង្កើតក្រុមគ្រួសារមួយដ៏កក់ក្តៅនាថ្ងៃអនាគត ។ ហេតុនេះ ទើបអ្នករាល់គ្នាតែងយកចិត្តទុកដាក់ក្នុងការរៀបចំគម្រោងជីវិត និងមានការសន្សំសំចៃប្រាក់កាសដើម្បីបំពេញនូវតម្រូវការចាយវាយ និងផ្គត់ផ្គង់ជីវភាពរស់នៅរបស់ក្រុមគ្រួសារ ឬមនុស្សជាទីស្រឡាញ់របស់ខ្លួន ប៉ុន្តែរឿងដែលប្រជាពលរដ្ឋមួយចំនួនបានមើលរំលងនោះ គឺការត្រៀមលក្ខណៈដើម្បីទ្រទ្រង់ជីវភាពគ្រួសាររបស់ពួកគេនៅពេលគេមិននៅ ព្រោះគ្រោះថ្នាក់អាចកើតមានគ្រប់ពេលវេលាទាំងអស់ ដែលយើងមិនអាចទាយទុកមុនបានឡើយ ។ ហេតុនេះហើយទើបធ្វើឲ្យមានការយល់ច្រឡំទៅលើគុណសម្បត្តិនៃសេវាធានារ៉ាប់រងលើជីវិត ។
ជាក់ស្តែង សេវាធានារ៉ាប់រងលើជីវិត គឺជាកញ្ចប់សេវាកម្មមួយប្រភេទ តម្រូវឲ្យអតិថិជនបង់ប្រាក់ទៅតាមកញ្ចប់សេវាកម្មរបស់ខ្លួន ។ ឧទាហរណ៍ថា អតិថិជនបានជួបគ្រោះថ្នាក់ជាយថាហេតុណាមួយ និងត្រូវការប្រាក់កាសជាបន្ទាន់ក្នុងការចាយវាយទៅលើសេវាព្យាបាលនោះអ្នកទាំងនោះនឹងទទួលបានប្រាក់សំណងពីក្រុមហ៊ុនមកវិញ ឬមានលក្ខខណ្ឌផ្សេងៗទៀតដែលអតិថិជនអាចទទួលបានទៅតាមកិច្ចព្រមព្រៀងលើកញ្ចប់សេវាកម្មដែលអតិថិជនបានទិញ មានដូចជា ធានារ៉ាប់រងអាយុជីវិត ធានារ៉ាប់រងសម្រាកមន្ទីរពេទ្យ ឬធានារ៉ាប់រងគ្រោះថ្នាក់បុគ្គលជាដើម ។
លោក Tapas Kuila នាយកគ្រប់គ្រងប្រចាំប្រទេស នៃក្រុមហ៊ុនធានារ៉ាប់រងខ្នាតតូច BIMA ក្នុងប្រទេសកម្ពុជា បានថ្លែងនារសៀលថ្ងៃទី៤ សីហា ក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងអង្គភាពប្រឆាំងអំពើពុករលួយ និងក្រុមហ៊ុនមីលវីក (ខេមបូឌា) ម៉ាយក្រូអុីនសួរេនភីអិលស៊ី (BIMA) ស្តីអំពីកម្មវិធីប្រឆាំងអំពើពុករលួយសម្រាប់ធុរកិច្ចនៅកម្ពុជាថា ៖« សេវាធានារ៉ាប់រង គឺជាផលិតផលមួយដែលមនុស្សចង់បាន ប៉ុន្តែមិនចង់ប្រើវា ព្រោះពួកគេមិនអាចមើលដឹងទេថា តើថ្ងៃណាមួយ ពួកគេនឹងជួបគ្រោះថ្នាក់ មានជំងឺឈឺថ្កាត់ ឬធ្លាក់ខ្លួនត្រូវការជំនួយជាប្រាក់កាសជាបន្ទាន់នោះឡើយ » ។
លោកបានបន្ថែមថា ៖« សេវាធានារ៉ាប់រង គឺជាការការពារផ្នែកហិរញ្ញវត្ថុទៅលើស្ថានការណ៍ដែលមិនគួរនឹងកើតឡើង តែអាចកើតឡើង ។ វាដូចជាការទិញឆត្រយកមកប្រើប្រាស់អីចឹងដែរ ។ នៅពេលយើងគ្មានឆត្រ យើងនឹងមិនអាចធ្វើអ្វីបានទេពេលមានភ្លៀងធ្លាក់ តែបើយើងមានឆត្រមកទុកនឹងខ្លួនហើយ យើងនឹងគ្មានការព្រួយបារម្ភថា តើថ្ងៃស្អែក មេឃនឹងភ្លៀង ឬរាំងនោះទេ » ។
យ៉ាងណាមិញ លោកគូសបញ្ជាក់ថា មនុស្សគ្រប់រូបគួរណាស់តែមានការធានារ៉ាប់រងលើអាយុជីវិត ដោយមិនគិតទៅលើកម្រិតជីវភាពគ្រួសារថា ធូរធារ ឬក៏ខ្វះខាតទេ ព្រោះបុគ្គលគ្រប់រូបសុទ្ធតែប្រឈមនឹងឱកាសជួបគ្រោះថ្នាក់ទាំងអស់ មិនថាស្ថិតក្នុងជីវភាពគ្រួសារណាទេ ប៉ុន្តែនៅក្នុងសង្គមខ្មែរបច្ចុប្បន្ននេះ ប្រជាពលរដ្ឋនៅមានការសង្ស័យច្រើនទៅលើការប្រើប្រាស់សេវាធានារ៉ាប់រង ដោយគ្មានការទុកចិត្តទៅលើក្រុមហ៊ុនធានារ៉ាប់រង និងមិនស្គាល់ច្បាស់ថា អ្វីទៅជាធានារ៉ាប់រង ។
នៅក្នុងការចុះអនុស្សរណៈនៃការយោគយល់ រវាងអង្គភាពប្រឆាំងអំពើពុករលួយ និងក្រុមហ៊ុនមីលវីក (ខេមបូឌា) ម៉ាយក្រូអុីនសួរេន ភីអិលស៊ី (BIMA) នេះទៀតសោត គឺជាការបង្កើននូវទំនុកចិត្តមួយដល់ភាពស្អាតស្អំរបស់ក្រុមហ៊ុន BIMA ទៅលើការធានាខុសត្រូវចំពោះសេវាកម្មរបស់ខ្លួន ដ្បិតអីក្នុងអនុស្សរណៈនៃការយោគយល់នេះ ទិសដៅ គឺដើម្បីឲ្យក្រុមហ៊ុនប្តេជ្ញាឲ្យស្ថាប័នមានភាពស្អាតស្អំ កសាងវប្បធម៌តម្លាភាព គោរពច្បាប់កម្ពុជា បដិសេដរាល់អំពើពុករលួយ អប់រំមិនឲ្យមានការសូកប៉ាន់ ពេលទំនាក់ទំនងនឹងមន្ត្រីរាជការ អ្នកផ្គត់ផ្គង់ អតិថិជន ឬក៏អង្គភាព និងអ្នកដទៃទៀត ព្រមទាំងអាចរាយការណ៍បានដោយសម្ងាត់ពីបញ្ហាប្រឈមដែលខ្លួនមាន ឬទទួលបានការគាបសង្កត់ក្រៅផ្លូវការពីស្ថាប័នដទៃ ទៅឲ្យអង្គភាពប្រឆាំងអំពើពុករលួយបើកការស៊ើបអង្កេត និងចូលរួមដោះស្រាយ ។
លោក ឃាង សេង អនុប្រធានអង្គភាពប្រឆាំងអំពើពុករលួយ បានថ្លែងថា ៖ « ដោយសារតែវិស័យឯកជន គឺជាដៃគូមិនអាចខ្វះបានក្នុងការប្រយុទ្ធប្រឆាំងនឹងអំពើពុក
រលួយ ព្រោះភាពស្អាតស្អំចេញពីបាតដៃរបស់ពួកយើងទាំងអស់គ្នា គឺមិនអាចធ្លាក់មកពីលើមេឃដោយទទេៗទេ ។ អីចឹងថ្ងៃនេះ គឺជាឆន្ទៈនៃការចូលរួមរបស់វិស័យឯកជនក្នុងប្រទេសកម្ពុជា ឲ្យកាន់តែមានសន្ទុះក្លៀវក្លា » ។
ដូចនេះ ការចុះអនុស្សរណៈនៃការយោគយល់នេះ គឺជាការប្តេជ្ញាបន្ថែមរបស់ក្រុមហ៊ុន BIMA ក្នុងការជួយរក្សាតម្លៃសុចរិតភាពជូនកម្ពុជា ដើម្បីរួមចំណែកដល់ការលើកស្ទួយសេដ្ឋកិច្ច និងបង្កើនទំនុកចិត្តជូនប្រជាពលរដ្ឋជាង៦០ម៉ឺននាក់ដែលកំពុងប្រើប្រាស់សេវានេះក្នុងប្រទេសកម្ពុជា ៕
ចែករំលែកព័តមាននេះ